រដ្ឋអាជ្ញាពិសេសកូរ៉េខាងត្បូងបានស្នើឱ្យតុលាការចេញដីកាចាប់ខ្លួនអតីតប្រធានាធិបតី Yoon ពីបទចោទប្រកាន់ថាលោកមិនអើពើនឹងការកោះហៅរបស់ប៉ូលិស។

លោក Cho Eun-suk ប្រធានរដ្ឋអាជ្ញាពិសេសស៊ើបអង្កេត Yoon Suk-yeol បានស្នើសុំតុលាការក្រុង Seoul Central District នៅ ថ្ងៃទី 25 ខែមិថុនា ដើម្បីអនុម័តដីកាចាប់ខ្លួនអតីតប្រធានាធិបតី ដោយចោទប្រកាន់ថា Yoon មិនអើពើនឹងការកោះហៅរបស់ប៉ូលិសបន្ទាប់ពីការស៊ើបអង្កេតពិសេសបានចាប់ផ្តើមនៅថ្ងៃទី 18 ខែមិថុនា។
តំណាងអយ្យការបាននិយាយថា ការខកខានរបស់ Yoon ក្នុងការអនុលោមតាមដីកាកោះហៅ ក៏ដូចជាការបដិសេធរបស់គាត់ក្នុងការអនុលោមតាមការកោះហៅមួយផ្សេងទៀតនៅថ្ងៃទី 12 ខែមិថុនា “ឆ្លុះបញ្ចាំងយ៉ាងច្បាស់ថាគាត់មិនមានចេតនាឆ្លើយតបទៅនឹងការកោះហៅនាពេលខាងមុខ” ។ ក្រោយពីទទួលយកសំណុំរឿងនេះពីប៉ូលិសនៅថ្ងៃទី២៣ ខែមិថុនា តំណាងអយ្យការបានស្នើសុំដីកាចាប់ខ្លួន ដើម្បី «រក្សាការបន្តការស៊ើបអង្កេត»។
តុលាការត្រូវបានគេរំពឹងថានឹងធ្វើការសម្រេចចិត្តលើដីកាចាប់ខ្លួន Yoon នៅដើមថ្ងៃនេះ។ រដ្ឋអាជ្ញា Park Ji-young បាននិយាយថា “យើងនឹងប្រកាសវាភ្លាមៗ ប្រសិនបើតុលាការអនុម័តវា”។
មេធាវីរបស់ Yoon នៅថ្ងៃនេះបានហៅចំណាត់ការរបស់រដ្ឋអាជ្ញាដើម្បីស្វែងរកដីកាចាប់ខ្លួន “ខុសច្បាប់ គ្មានវិជ្ជាជីវៈ និងរំលោភសិទ្ធិការពារក្តី”។
មេធាវីបានអះអាងថា លោក Yoon មិនទាន់បានទទួលដីកាពីអយ្យការទេ
រហូតមកដល់ពេលនេះ។ មេធាវីបានលើកឡើងថា៖ «គាត់មិនទាន់ត្រូវបានគេផ្តល់ព័ត៌មានអំពីទីតាំងការិយាល័យអយ្យការ អត្តសញ្ញាណរបស់រដ្ឋអាជ្ញាទទួលបន្ទុក ឬស្ថាប័នណានឹងធ្វើការសាកសួរ»។
ក្រុមមេធាវីបានកត់សម្គាល់ថា ការលើកឡើងរបស់រដ្ឋអាជ្ញាលើដីកាកោះហៅរបស់ប៉ូលិសជាហេតុផលសម្រាប់ការស្វែងរកដីកាចាប់ខ្លួនមិនមានសុពលភាពផ្លូវច្បាប់នោះទេ ដោយសារប៉ូលិស និងរដ្ឋអាជ្ញាគឺជាភ្នាក់ងារស៊ើបអង្កេតឯករាជ្យពីរ។
Yoon ត្រូវបានចាប់ខ្លួនកាលពីខែមករា ប៉ុន្តែត្រូវបានដោះលែងវិញបន្ទាប់ពីឃុំខ្លួនបាន ៥២ ថ្ងៃតាមដីការបស់តុលាការ។ លោកត្រូវបានបណ្តេញចេញពីតំណែងប្រធានាធិបតីដោយតុលាការធម្មនុញ្ញក្នុងខែមេសា ហើយកំពុងប្រឈមមុខនឹងការស៊ើបអង្កេតឧក្រិដ្ឋកម្មលើការចោទប្រកាន់ពីបទបះបោរ និងការរំលោភបំពានអំណាចទាក់ទងនឹងច្បាប់អាជ្ញាសឹក៕ ដោយធីរីណា

រូបថត​: AFP