ភ្នំពេញ៖ ក្រោយពីកម្ពុជាបានដាក់លិខិតទៅតុលាការយុត្ដិធម៌អន្ដរជាតិ (ICJ) ដើម្បីដោះស្រាយជម្លោះព្រំដែននៅតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំ ៣ ថៃហាក់បង្វែចំណាប់អារម្មណ៍ទៅលើផែនទីរបស់ប្រាសាទតាមាន់ធំនៅក្នុងទឹកដីកម្ពុជាថា ត្រូវបានរំកិលចេញពីដីរបស់ខ្លួននៅលើ Google Maps។
បេីយោងតាម The Nation Thailand បានចុះផ្សាយថា អ្នកនាំពាក្យកងយោធពលទាហ៊ានថៃ នៅថ្ងៃពុធនេះ បានស្វែងរកការបន្ធូរបន្ថយការព្រួយបារម្ភជាសាធារណៈ ដែលបង្កើនការភ័យខ្លាចថាប្រទេសថៃអាចបាត់បង់ទីតាំងប្រាសាទ និងទឹកដីជុំវិញនោះ។
អ្នកនាំពាក្យ RTA ឧត្តមសេនីយ Winthai Suvari បាននិយាយថា៖ «ព្រំដែនផែនទីដែលបង្ហាញនៅលើ Google Maps មិនមានទម្ងន់ស្របច្បាប់ទេ ហើយប្រទេសថៃបានអនុវត្តអធិបតេយ្យភាពលើទីតាំងបុរាណខ្មែរយ៉ាងខ្ជាប់ខ្ជួន»។
ថៃចាត់ទុកប្រាសាទតាមាន់ធំនេះស្ថិតនៅក្នុងទឹកដីរបស់ខ្លួន ជាពិសេសនៅក្នុងតំបន់ បានណុងខាន់ណាឃុំតាមឿង ស្រុកភ្នំដុងរ៉ាក់ (ភ្នំដងរែក) ខេត្ត សុរិន។
យ៉ាងណាមិញ ប្រាសាទតាមាន់ធំ ស្ថិតក្នុងទឹកដីកម្ពុជានៃភូមិគូ ឃុំអំពិល ស្រុកបន្ទាយអំពិល ខេត្តឧត្តរមានជ័យ តាមផ្លូវជាតិលេខ ៥៦ ដែលមានចម្ងាយ ពីទីរួមក្រុងសំរោង ៤៨គីឡូម៉ែត្រ។
មិនត្រឹមតែតំបន់ប្រាសាទតាមាន់ធំនោះទេ កម្ពុជាស្វែងរកកិច្ចអន្ដរាគមន៍ពីតុលការ ICJ ទាំងតំបន់ប្រាសាទតាមាន់តូច ដែលបច្ចុប្បន្នត្រូវបានដៅក្នុងដីថៃដោយ Google Maps មកកម្ពុជាវិញផងដែរ៕
រូបភាព៖ ផែនទីតំបន់ប្រាសាទមាន់តូច ដែល Google Maps ដាក់ជាទីដីថៃ ខណៈប្រាសាទតាមាន់ធំ ក្នុងទីដីខ្មែរ ដែលធ្វើឱ្យថៃឆេះដុំ។ រូបថត Google Maps
