ខេត្តកំពង់ស្ពឺ៖ មុខសញ្ញាសង្ស័យជួញដូរថ្នាំញៀនម្នាក់ត្រូវបានសមត្ថកិច្ចឆែកឃើញមានថ្នាំញៀនជាប់ខ្លួនអំឡុងពេលល្បាតក្នុងមូលដ្ឋានដើម្បីការពារសន្តិសុខជូនប្រជាពលរដ្ឋ។

ការឃាត់ខ្លួននេះធ្បើឡើងកាលពីវេលាម៉ោង០៣រសៀលថ្ងៃទី៣០ ខែសីហា ឆ្នាំ២០១៦ នៅចំណុចតាមផ្លូវខ្នងប្រឡាយខាងត្បូង ភូមិព្រៃផ្តៅ ឃុំត្រពាំងគង ស្រុកសំរោងទង ខេត្តកំពង់ស្ពឺ។ ជនសង្ស័យឈ្មោះ តាំង សុខគៀន ហៅកៅ ភេទប្រុស អាយុ១៩ឆ្នាំ នៅភូមិអន្លង់គង់ ឃុំត្រពាំងគង ស្រុកសំរោងទង ខេត្តកំពង់ស្ពឺ។

លោកវរសេនីយ៍ទោ ឃុត សុផល អធិការនគរបាលស្រុកបានឲ្យដឹងថា កម្លាំងផ្នែកគ្រឿងញៀនសហកាជាមួយកម្លាំងផ្នែកព្រហ្មទណ្ឌស្រុក និងកម្លាំងប៉ុស្តិ៍ត្រពាំងគង បានធ្វើល្បាតនៅចំណុចតាមផ្លូវខ្នងប្រឡាយខាងត្បូងភូមិព្រៃផ្តៅ ឃុំត្រពាំងគង ស្រុកសំរោងទង បានប្រទះឃើញមុខសញ្ញាគួរឲ្យសង្ស័យក៏បានឃាត់ខ្លួនធ្វើការសាកសួរនិងឆែកឆេររកឃើញនៅម្សៅក្រាមពណ៌ស សង្ស័យជាគ្រឿងញៀន០១កញ្ចប់តូច ទូរស័ព្ទ០១គ្រឿង ម៉ូតូ០១គ្រឿងម៉ាក វីវ៉ា ពណ៌ខ្មៅ ពាក់ស្លាកលេខ តាកែវ 1B-1820 ។

លោកអធិការបន្តថា ក្រោយឆែករកឃើញមានថ្នាំញៀនហើយកម្លាំងរបស់លោកបានបន្តធ្វើការឆែកឆេរផ្ទះរបស់មុខសញ្ញាខាងលើ ដោយមានការចូលរួមពីលោកមេឃុំ និងលោកមេភូមិក្នុងនោះឆែកឆេររកឃើញម្សៅក្រាម ពណ៌សសង្ស័យជាគ្រឿងញៀន០១កញ្ចប់តូច ទុយយោកែច្នៃសម្រាប់ច្រកគ្រឿងញៀន និងសម្ភារៈមួយចំនួនទៀត ។

នៅព្រឹកថ្ងៃទី៣១ ខែសីហា ឆ្នាំ២០១៦ នេះកម្លាំងជំនាញបានកសាងសំណុំរឿងបញ្ជូនទៅការិយាល័យប្រឆាំងគ្រឿងញៀនចាត់ការតាមនីតិវិធី៕

ដោយ៖ សេនាស័ក្តិ