ថៃ៖ កងទ័ពថៃបានបញ្ជាក់ពីការរកឃើញមីនថ្មីប្រភេទ PMN2 ចំនួន២គ្រាប់ទៀតនៅជិតកន្លែងផ្ទុះលើកមុនដែលបណ្តាលឲ្យទាហានខ្លួន៣នាក់របួសនិងក្នុងនោះ មានម្នាក់របួសធ្ងន់ត្រូវដាច់ជើង។ ប៉ុន្តែអ្វីដែលកាន់តែហួសចិត្តនោះគឺថា ថៃបានស្នើឲ្យអាស៊ាននិងប្រទេសដទៃទៀត រួមគ្នាថ្កោលទោសកម្ពុជា ដោយចោទថា កម្ពុជា បំពានអនុសញ្ញាទីក្រុងអូតាវ៉ា ទាំងដែលមីននោះស្ថិតនៅក្នុងដីថៃសោះ។
គួររម្លឹកថា ក្រោយហេតុការណ៍ថ្ងៃទី១៦ខែកក្កដាថ្មីៗនេះ នៅតំបន់មុំ៣ ភាគីថៃបានយកលេសទាហានខ្លួនដើរជាន់មីន មកដាក់ការចោទប្រកាន់លើកម្ពុជាទាំងងងើល ហើយឡាំប៉ាថា កម្ពុជាបានលួចបង្កប់មីនថ្មីនៅក្នុងដីរបស់ខ្លួន។
លោក Winthai Suvari អ្នកនាំពាក្យកងទ័ពថៃ បាននិយាយចោទកម្ពុជាទាំងគ្មានទំនួលខុសត្រូវថា បានរំលោភលើអនុសញ្ញាទីក្រុងអូតាវ៉ា ស្តីពីការហាមប្រាមមីនប្រឆាំងមនុស្ស។ ថៃសូមស្នើឲ្យមានកិច្ចសហប្រតិបត្តិការពីរដ្ឋជាសមាជិកអាស៊ាន និងប្រទេសដទៃទៀត ដើម្បីថ្កោលទោសកម្ពុជា។
សូមជម្រាបថា ការបង្វែរស្ថានការណ៍របស់ថៃនេះ គឺដូចជាជាន់កែងខ្លួនឯង ព្រោះថៃនិយាយថា ទាហានជាន់មីននៅក្នុងដីរបស់ខ្លួន ប៉ុន្តែគេឆ្ងល់ថាតើកម្ពុជាអាចចូលទៅដាក់មីនក្នុងដីថៃបានដោយរបៀបណា បើចំណុចក្តៅនៅព្រំដែន មានទាហានល្បាតមិនដាច់នោះ?
ម្យ៉ាងភូមិភាគ២ថៃប្រកាសថា ពួកគេរកឃើញមីនថ្មីរាប់រយគ្រាប់នៅក្នុងទឹកដីថៃ តើមីនទាំងនោះថៃដាក់ដោយខ្លួនឯងរួចធ្វើជារកឃើញដើម្បីលាបពណ៌មកកម្ពុជាឬយ៉ាងណា បើគេដឹងថា ការដាក់មីនមួយគ្រាប់ៗមិនមែនចំណាយពេលឆាប់ទេ ដូចនេះតើទាហានថៃនៅព្រំដែនមិនដែលល្បាតទេឬ?
ជុំវិញករណីទាហានថៃដើរជាន់មីនផ្ទុះខ្លួនឯងនោះ ត្រូវបានក្រសួងការពារជាតិកម្ពុជា បានបញ្ជាក់រួចហើយថា ករណីផ្ទុះមីននៅតំបន់មុំបី គឺដោយសារទាហានថៃ ដើរខុសតម្រាយផ្លូវចាស់ និងមិនគោរពអ្វីដែលធ្លាប់ឯកភាពគ្នា ដែលនេះសបញ្ជាក់យ៉ាងច្បាស់ថា ទាហានថៃរំលោភដែនអធិបតេយ្យរបស់កម្ពុជា៕
ដោយ៖តារា
