ខេត្តពោធិ៍សាត់ ៖ យ៉ាងហោចណាស់លៀសកន្លះៗការ៉ុងប្រមាណ២៣០កំណាត់ការ៉ុង ត្រូវបានសមត្ថកិច្ចសហការគ្នាដឹកយកទៅចាក់ចូលទឹកបឹងទន្លេសាបវិញ នៅគ្រាដែលគេសង្ស័យថាក្រុមឈ្មួញដឹកជញ្ជូនយកមកដាក់នៅមាត់ទឹក ដើម្បីត្រៀមលើកឡើងរថយន្តទៅរកទីផ្សារ។ នេះបើតាមការបញ្ជាក់ពីមន្រ្តីជំនាញរដ្ឋបាលជលផល កាលពីល្ងាចម្សិលមិញ ថ្ងៃចន្ទ ១១រោច ខែអាសាឍ ឆ្នាំម្សាញ់ សប្គស័ក ព.ស. ២៥៦៩ ត្រូវនឹងថ្ងៃទី២១ ខែកក្កដា ឆ្នាំ២០២៥ ។
សេចក្ដីរាយការណ៍ឱ្យដឹងទៀតថា ករណីកម្លាំងសហការគ្នាចុះពិនិត្យ ទប់ស្កាត់និងបង្រ្កាបបទល្មើសធនធានជលផលខាងលើ គឺនៅចំណុចមាត់ទឹកបឹងទន្លេសាប (កំពង់ឃ្នៀស)ស្ថិតនៅភូមិកំពង់លើ ឃុំក្បាលត្រាច ស្រុកក្រគរ ខេត្តពោធិ៍សាត់ ។
ប្រភពដដែលបញ្ជាក់ទៀតថា លៀសចំនួន២៣០កំណាត់ការ៉ុងនេះ ទំនងអាចក្រុមឈ្មួញលួចធ្វើនេសាទនៅបឹងទន្លេសាប រួចដឹកជញ្ជូនតាមរយៈកាណូតយកមកទុកដើម្បីបម្រុងលើកឡើងរថយន្តដឹកទៅទីផ្សារ ប៉ុន្តែត្រូវបានកម្លាំងសហការប្រទះឃើញធ្វើការទប់ស្កាត់ និងបង្រ្កាប។ បច្ចុប្បន្ន វត្ថុតាង(លៀស)សមត្ថកិច្ចបានមូលមត្តិគ្នាសម្រេចដឹកជញ្ជូនយកទៅចាក់ចូលទឹកបឹងធម្មជាតិ(បឹងទន្លេសាប)វិញ ។
ដោយឡែក បើយោងតាមការលើកឡើងពីមជ្ឈដ្ឋាននានា ចុងក្រោយថ្មីៗនេះ គេឃើញសមត្ថកិច្ចសហការទប់ស្កាត់ និងបង្រ្កាបបទល្មើសធនធានធម្មជាតិ(ជលផល)២ករណីហើយ(ខ្ចៅ និងលៀស)នេះឯង ដែលហាក់បីដូចជាចង់យឺតពេលបន្តិច ព្រោះខ្ចៅ និងលៀសដែលត្រូវបង្រ្កាបនេះ វាអាចងាប់ភាគច្រើនបាត់ទៅហើយ ខណៈបច្ចុប្បន្នសមត្ថកិច្ចជំនាញពាក់ព័ន្ធច្រើនស្អេកស្កះនៅបឹងទន្លេសាប គួរណាស់ធ្វើការបង្រ្កាបនៅគ្រាដែលកំពុងនេសាទជាក់ស្ដែង ព្រោះការនេសាទដោយប្រើប្រាស់ឧបករណ៍ អូសដោយកម្លាំងម៉ាស៊ីនគ្មានលិខិតអនុញាតនេះ បង្កការប៉ះពាល់ដល់ធនធានជលផលធ្ងន់ធ្ងរ ជាពិសេសសមត្ថកិច្ចពុំដែលឃើញអនុវត្តលើក្រុមឈ្មួញខ្ចៅនិងលៀសនេះនោះទេ ម្យ៉ាងទៀត រដូវនេះជារដូវបិទនេសាទថែមទៀត ៕
ដោយៈ ប៉ឹម ពិន
