ប្រទេសថៃ ៖ នៅថ្ងៃទី២៣ ខែកក្កដា ឆ្នាំ២០២៥ មេបញ្ជាការយោធភូមិភាគទី២ថៃ ចេញបញ្ជាបិទច្រកឆ្លងដែនកម្ពុជា-ថៃ និងទីកន្លែងទេសចរណ៍។

អ្វីដែលចម្លែកគឺក្នុងលិខិតបញ្ជាចំណុចទី៣នេះ គេផ្អាកការអនុញ្ញាតឱ្យទៅទស្សនាប្រាសាទតាមាន់ និងប្រាសាទតាក្របី ដោយយកលេសថា ដើម្បីជួសជុលប្រព័ន្ធរក្សាសុវត្ថិភាព។

  ពលរដ្ឋខ្មែរថា ៖ ចង់បិទឬបើកតែខាងឯងទៅ តែបើមករញ៉េរញ៉ៃជាមួយខាងកម្ពុជា យើង មិនហ៊ានសន្និដ្ឋានអ្វីទេ ! 

សូមបញ្ជាក់ថា ៖ ជំហររបស់រាជរដ្ឋាភិបាលកម្ពុជាក្នុងបញ្ហាជម្លោះព្រំដែនជាមួយថៃ៖

( ៥ចំណុចសំខាន់ៗនេះ គឺជាការបញ្ជាក់របស់សម្តេចធិបតី ហ៊ុន ម៉ាណែត ) 

ថ្ងៃទី២២ ខែកក្កដា ឆ្នាំ២០២៥

១. តំបន់ឬទីកន្លែងដែលមានវិវាទ ឬមិនទាន់ដាច់ស្រេចថាស្ថិតក្នុងដែនអធិបតេយ្យភាពរបស់ប្រទេសណាមួយ គឺគ្មានភាគីណាមានសិទ្ធិធ្វើសកម្មភាពឬដាក់ចេញនូវវិធានការជាឯកតោភាគីនៅក្នុងតំបន់ឬទីកន្លែងនោះ។ រាល់វិធានការនានាដែលអាចអនុវត្តបាន ត្រូវមានការឯកភាពគ្នារវាងភាគីទាំងពីរជាមុនសិន។

២. បន្ទាត់ក្រហមនៅតែជាបន្ទាត់ក្រហម មិនមានការប្រែប្រួលទេ។ សូមកុំបំពាន។

៣. កម្ពុជាមិនរំលោភបំពានលើអ្នកណាទេ ប៉ុន្តែកម្ពុជាក៏មិនឲ្យអ្នកណាមួយរំលោភបំពានលើខ្លួននោះដែរ។ កម្ពុជាមានសមត្ថភាពគ្រប់គ្រាន់និងបានត្រៀមខ្លួនជាស្រេចក្នុងការការពារខ្លួននិងការពារបូរណភាពទឹកដី តាមគ្រប់មធ្យោបាយទាំងអស់ប្រឆាំងនឹងការរំលោភបំពាន។

៤. វិធីសាស្រ្តបៀមឈាមព្រួសដាក់អ្នកដទៃ មិនមែនជាវិធីសាស្រ្តដែលមានសីលធម៌និងសុច្ចរិតភាពនោះទេ។ វិធីសាស្ត្របែបនេះមិនត្រូវប្រើទេ បើយើងពិតជាចង់កសាងនូវទំនុកចិត្តរវាងគ្នានិងគ្នា។

៥. កម្ពុជានៅតែរក្សាជំហរក្នុងការស្វែងរកដំណោះស្រាយលើបញ្ហានេះ ដោយមធ្យោបាយអហឹង្សា ឲ្យបានឆាប់រហ័ស ប្រកបដោយភាពច្បាស់លាស់និងចីរភាព៕

ដោយ ៖ សិលា