ថៃ៖ សោកនាដកម្មមួយបានកើតឡើងនៅខេត្ត ណារ៉ាធីវ៉ាត ភាគខាងត្បូងប្រទេសថៃក្នុងឆ្នាំ២០០៤ នោះគឺហេតុការណ៍តាក់បៃ (Tak Bai) ដែលរដ្ឋាភិបាលក្រុងបាងកក ក្រោមការដឹកនាំរបស់លោក ថាក់ស៊ីន ស៊ីណាវ៉ាត្រ បានសម្លាប់អ្នកកាន់សាសនាឥស្លាមយ៉ាងរង្គាល។
ហេតុការណ៍នោះកើតឡើងនៅថ្ងៃទី២៥ខែតុលាឆ្នាំ២០០៤ ពេលប្រជាជនម៉ាឡេ-ឥស្លាមប្រមាណ ១ ៥០០នាក់ បានប្រមូលផ្ដុំគ្នានៅមុខប៉ុស្តិ៍ប៉ូលិសតាក់បៃ ដើម្បីតវ៉ាប្រឆាំងការចាប់ខ្លួនអ្នកភូមិ៦នាក់។
ភ្នាក់ងារសន្តិសុខថៃ រួមមានកងទ័ពនិងប៉ូលិស បានប្រើប្រាស់កម្លាំងដើម្បីបំបែកហ្វូងបាតុករ ខណៈក្នុងអំឡុងពេលនៃការបង្ក្រាបនោះ បាតុករ៧នាក់ត្រូវបានបាញ់សម្លាប់។
បន្ទាប់មក ទាហានបានចាប់ខ្លួនបាតុករប្រមាណ ១ ៣០០នាក់ ហើយបង្ខំឲ្យពួកគេដេកផ្អៀងលើគ្នាដាក់ក្នុងរថយន្តយោធាចំនួន២៦គ្រឿង ដើម្បីដឹកទៅកាន់ទីតាំងឃុំឃាំងមួយទៀត។ ដោយសារការចង្អៀតខ្លាំងនិងត្រូវចងដៃពីក្រោយ មនុស្ស៧៨នាក់បានស្លាប់ដោយសារថប់ដង្ហើម។
សរុបទៅ បាតុករចំនួន៨៥នាក់បានបាត់បង់ជីវិត នៅក្នុងហេតុការណ៍នោះ។
នៅពេលនោះ រដ្ឋាភិបាលរបស់លោកថាក់ស៊ីន ត្រូវគេរិះគន់យ៉ាងចាស់ដៃចំពោះការដោះស្រាយវិបត្តិនេះ។ ដោយនិយាយលាងខ្លួនយកល្អ លោកថាក់ស៊ីនខំភូតកុហកថា ការស្លាប់ទាំងនោះមិនមែនជាកំហុសរបស់ទាហានទេ ប៉ុន្តែបណ្តាលមកពីភាពទន់ខ្សោយនិងភាពអត់ឃ្លានរបស់បាតុករ។
គណៈកម្មការស៊ើបអង្កេតដែលត្រូវបានតែងតាំងដោយរដ្ឋាភិបាល បានរកឃើញថាវិធីសាស្ត្រប្រើប្រាស់ដើម្បីបំបែកបាតុករគឺមិនសមស្របនឹងគោលការណ៍អន្តរជាតិទេ។
ហេតុការណ៍ «តាក់បៃ» បានក្លាយជាចំណុចរបត់ដ៏សំខាន់មួយនៅក្នុងជម្លោះនាភាគខាងត្បូងប្រទេសថៃ ដោយបង្កើនកំហឹង និងការមិនទុកចិត្តរបស់ប្រជាជនម៉ាឡេ-ឥស្លាម ទៅលើរដ្ឋាភិបាលថៃកាន់តែខ្លាំង៕ដោយ៖តារា
(រូបថត៖ CNA) (រូបថត៖ Reuters)
