អ្នកចាំទីក្រុមជម្រើសជាតិអង់គ្លេស Joe Hart ទទួលបានស្វាគមន៍យ៉ាងកក់ក្តៅពី សំណាក់អ្នកគាំទ្ររបស់ក្លិប Torino ពេល ទៅដល់ប្រទេសអុីតាលី ។

កីឡាករវ័យ២៩ឆ្នាំនេះត្រូវបានក្រុម Torino ខ្ចីជើងពេញមួយរដូវកាលបន្ទាប់ ពីរូបគេមិនជាប់ជម្រើសដំបូងនៅក្នុងក្រុមManchester City ក្រោមការដឹកនាំរបស់ លោក Pep Guardiola។ មិនត្រឹមតែប៉ុណ្ណោះ ក្រុម Manchester City ថែមទាំងបានទិញអ្នកចាំទីClaudioBravoពីក្រុម Barcelona ទៀតផង ។

Joe Hart ក៏នឹងក្លាយទៅជាអ្នកចាំទី សញ្ជាតិអង់គ្លេសដំបូងគេបង្អស់ដែលទៅលេងនៅក្នុងក្របខ័ណ្ឌអុីតាលី Serie A បើគិតចាប់តាំងពីឆ្នាំ១៩២៩មក ។

ចំណែកនៅក្នុងក្រុម Torino វិញ កីឡាករJoe Hartនឹងយកតំណែងអ្នកចាំទីដំបូងពីកីឡាករ Daniele Padelli ដែលពុំ បានធ្វើឲ្យគ្រូបង្វឹក Sinisa Mihajlovic ចាប់អារម្មណ៍សោះ៕

ដោយ៖ ដេវីត