ភ្លៀងធ្លាក់ខ្លាំងជាបន្តបន្ទាប់បានបណ្តាលឱ្យមានទឹកជំនន់ធ្ងន់ធ្ងរ និងការរអិលបាក់ដីនៅក្នុងតំបន់ជាច្រើននៅលើកោះ Kyushu ភាគខាងត្បូងប្រទេសជប៉ុន។ អាកាសធាតុខ្លាំងបានបង្ខំឱ្យអាជ្ញាធរក្នុងតំបន់ចេញការព្រមានកម្រិតខ្ពស់បំផុត និងជម្លៀសប្រជាជនរាប់សែននាក់ជាបន្ទាន់ ដើម្បីធានាសុវត្ថិភាព។

យោងតាមព័ត៌មានពីទីភ្នាក់ងារគ្រប់គ្រងអគ្គីភ័យ និងគ្រោះមហន្តរាយ (FDMA) កាលពីថ្ងៃទី 8 ខែសីហា គ្រោះរអិលបាក់ដីបានកើតឡើងនៅទីក្រុង Aira ខេត្ត Kagoshima ដោយបានកប់ផ្ទះមួយខ្នងនៅក្រោមថ្ម និងដី។ មនុស្ស២នាក់ដែលជាប់នៅក្នុងផ្ទះនោះ ត្រូវបានក្រុមអ្នកជួយសង្គ្រោះជួយសង្រ្គោះជាបន្ទាន់ ហើយបញ្ជូនទៅមន្ទីរពេទ្យ។
នៅថ្ងៃដដែល អាជ្ញាធរបានចេញសេចក្តីណែនាំអំពីការជម្លៀសប្រជាជនជាង ៣៦ម៉ឺននាក់នៅក្នុងខេត្ត Kagoshima និងខេត្ត Miyazaki ដែលនៅជិតខាង ដោយសារមានការព្រួយបារម្ភអំពីទឹកជំនន់ និងការបាក់ដីបន្ថែមទៀត។ ការព្រមានអំពីគ្រោះមហន្តរាយត្រូវបានដំឡើងដល់កម្រិតខ្ពស់បំផុតក្នុងកម្រិតបីជាន់ ដែលបង្ហាញថាកម្រិតគ្រោះថ្នាក់បច្ចុប្បន្នគឺធ្ងន់ធ្ងរខ្លាំងណាស់។
រូបភាពទូរទស្សន៍ក្នុងស្រុកបានបង្ហាញពីការកើនឡើងនៃទឹកជន់លិច ជាមួយនឹងទឹកភក់ដែលហូរចុះទន្លេដែលជិតនឹងហៀរ។ នៅទីក្រុង Kirishima ទឹកបានឡើងដល់ជង្គង់នៅក្នុងផ្សារទំនើបដ៏ធំមួយ ដែលបណ្តាលឱ្យមានការរំខានដល់អាជីវកម្មទាំងស្រុង។
ភ្លៀងធ្លាក់ខ្លាំងក៏បានប៉ះពាល់យ៉ាងធ្ងន់ធ្ងរដល់ប្រព័ន្ធដឹកជញ្ជូនក្នុងតំបន់ផងដែរ។ ខ្សែរថភ្លើង និងឡានក្រុងជាច្រើននៅ Kyushu ត្រូវបានផ្អាក ដោយសារលក្ខខណ្ឌអាកាសធាតុដ៏គ្រោះថ្នាក់។ លើសពីនេះទៀត ជើងហោះហើរក្នុងស្រុករាប់សិបជើងទៅ និងមកពីអាកាសយានដ្ឋាន Kagoshima ត្រូវបានលុបចោល ដែលបង្កការរំខានដល់អ្នកដំណើររាប់ពាន់នាក់។
ប្រឈមមុខនឹងការវិវឌ្ឍន៍ដ៏ស្មុគស្មាញនៃគ្រោះមហន្តរាយ នាយករដ្ឋមន្ត្រីជប៉ុន Shigeru Ishiba បានកោះប្រជុំបន្ទាន់មួយ និងបានដឹកនាំការបង្កើតក្រុមការងារថ្នាក់ជាតិ ដើម្បីសម្របសម្រួលការឆ្លើយតបទៅនឹងស្ថានភាព។ នាយករដ្ឋមន្ត្រីបាននិយាយនៅក្នុងសន្និសីទកាសែតនៅទីក្រុងតូក្យូថា “រដ្ឋាភិបាលនឹងប្រមូលធនធានទាំងអស់ដើម្បីការពារអាយុជីវិត និងសុវត្ថិភាពរបស់ប្រជាជន”៕

រូបថត​: Hanoi online