ភ្នំពេញ​៖​ ថ្លែង​តាមរយៈបណ្ដាញសង្គមហ្វេសប៊ុកផ្លូវការរបស់លោក​ ខៀវ​ កាញារីទ្ធ​ ឧត្តមប្រឹក្សាព្រះមហាក្សត្រ និងជាតំណាងរាស្រ្តមណ្ឌលខេត្តកំពង់ចាម​ បានលើកឡើងថា៖​ មិនមែនដោយចៃដន្យទេដែលសត្វស្លាបមានជម្ងឺទៅទំលើសំបុកស្រមោចនោះ ! នៅពេលវាមានជម្ងឺ សត្វស្លាបខ្លះមិនបានហោះទៅរកទីសុវត្ថិភាពទេតែវាហោះទៅរកស្រមោច ។

លោក​ ខៀវ​ កាញារីទ្ធ​ បានថ្លែង​បន្តថា​ គេបានសង្កេតឃើញថា សត្វក្អែកនៅពេលណាវាដឹងខ្លួនថាវាឈឺ ឬ មានប៉ារ៉ាសុីតទន្ទ្រានរាងកាយវានោះ វាបានបញ្ចេញសភាវគតិថែរក្សាខ្លួនដ៏អស្ចារ្យមួយ៖​ វាហោះទៅទំជិតសំបុកស្រមោច ត្រដាងស្លាប ហើយនៅស្ងៀម ដើម្បីអោយស្រមោចមករោមវា ។

លោក​ ខៀវ​ កាញារីទ្ធ​ បានបន្តថា​ កាយវិការនេះមិនមែនជាចៃដន្យទេ ។ ស្រមោចបញ្ចេញអាសុីដ Formic  ដែលជាសារធាតុគីមីធម្មជាតិដែលមានលក្ខណៈប្រឆាំងនឹងមេរោគនិងប៉ារ៉ាសុីត ( Antimicrobial and antiparasitic properties ) បាន ។ ដោយបណ្តោយអោយស្រមោចរត់ពេញតាមរោមវានោះ ក្អែកទទួលបាននូវការមុជសារធាតុគីមីធម្មជាតិ ដែលអាចជួយវាអោយកម្ចាត់បាក់តេរី ផ្សិត ចៃ និងកន្ទួលស្បែកដោយមិនចាំបាច់មានជំនួយពីមនុស្សបាន ។

ជាមួយគ្នានេះ​ លោកបានសង្កត់ធ្ងន់ថា​ ហើយមិនមែនមានតែសត្វក្អែកទេ មានសត្វស្លាបមួយចំនួនទៀតបានមក«មុជស្រមោច»បែបនេះដែរ ហើយនេះជាតឹកតាងដែលបង្ហាញថា ធម្មជាតិខ្លួនឯងក៏មានឱសថព្យាបាលដែរ អោយតែយើងចេះសង្កេត៕

ដោយ​៖តារា​