ភ្នំពេញ៖ យ៉ាងហោចណាស់មានតារាស្រីប្រុសលំដាប់ជួរមុខរបស់ថៃគឺ លោក James Jirayu នឹងដឹកដៃកញ្ញា Bella ធ្វើដំណើរពិសេសមកកាន់ទីក្រុងភ្នំពេញដើម្បីជួបជាមួយប្រិយមិត្តរបស់ខ្លួនជាច្រើននៅប្រទេសកម្ពុជានៅថ្ងៃទី៩ ខែតុលា ឆ្នាំ២០១៦ខាងមុខនេះ។

ដំណើរមកដល់ទឹកដីដ៏ស្រស់បំព្រងរបស់កម្ពុជាលើកនេះ កំពូលតារាភាពយន្តដ៏ល្បីទាំងពីរដួងប្រចាំស្ថានីយទូរទស្សន៍ដ៏ល្បីរបស់ថៃTV3 នឹងទទួលពិធីស្វាគមន៍ ក៏ដូចជាចូលរួមក្នុងជំនួបពិសេសមួយមានឈ្មោះថា «វេទិកាតារាថៃប្រចាំ PNN ២០១៦» នៅឯផ្សារទំនើបអ៊ីអន ក្រុងភ្នំពេញ ។

លោក James Jirayu និងកញ្ញា Bella បានចាប់ដៃគូសម្តែងជាមួយគ្នាក្នុងរឿងភាគដ៏ល្បីបំផុតរបស់ថៃចំនួនពីរគឺរឿងសុភាពបុរសទាំង៥ ឬ Suparburoot Jutathep Series និងរឿងភរិយាបណ្តូលចិត្ត ឬ Beloved Loyal Wife។ ក្នុងពេលឆាប់ៗខាងមុខនេះ ភីអិនអិនក៏នឹងចាក់ផ្សាយជូនទូរទស្សនិកជនបានតាមដានទស្សនានូវរឿងទាំងពីរនេះផងដែរ។

James មានឈ្មោះពិត Jirayu Tangsrisuk គឺជាតារាសម្តែង អ្នកចម្រៀង និងជាអ្នកបង្ហាញម៉ូដ។ នៅក្នុងឆ្នាំ២០១១ James ឈ្នះនៅក្នុងការប្រកួតរបស់ផលិតផលគ្រឿងសម្អាង Mistine ហើយក៏បានចាប់ផ្តើមអាជីពជាអ្នកបង្ហាញម៉ូដ។ ២០១៣ គឺជាឆ្នំាដែលJames ចាប់ផ្តើមប្រឡូកក្នុងការសម្តែងរបស់ខ្លួនជាលើកដំបូងនៅក្នុងរឿងភាគដ៏ល្បីបំផុតរបស់ថៃ «Suparburoot Jutathep» ដោយចាប់ដៃគូជាមួយតួឯកស្រីកញ្ញា Bella Ranee។ ឆ្នាំនោះដដែល James និងBella បានទទួលពានរង្វាន់ជា Fantasy Couple of the Yearពី Kerd Awards បន្ទាប់ពីពួកគេបានសម្តែងរួមគ្នានៅក្នុងរឿងមួយនេះ។ នៅឆ្នាំ២០១៥ James ចាប់ដៃគូជាមួយយ៉ាយ៉ា សម្តែងនៅក្នុងរឿង Neung Nai Suang ឬចិត្តស្អប់បង្កប់ស្នេហ៍ ដែលភីអិនអិនបានចាក់ផ្សាយរឿងនេះរួចមកហើយនាពេលកន្លងមក។

សម្រាប់ឆ្នាំ២០១៦នេះវិញ តារាប្រុសវ័យ២៣ឆ្នាំ James Jirayu និងតារាស្រីវ័យ២៦ឆ្នាំ Bella Ranee បានសម្តែងរួមគ្នាម្តងទៀតនៅក្នុងរឿងភរិយាបណ្តូលចិត្ត ឬ Beloved Loyal Wife ដែលភីអិនអិនបានសិទ្ធិផ្តាច់មុខក្នុងការចាក់ផ្សាយនាពេលឆាប់ៗខាងមុខនេះ។

កញ្ញា ទូច បុប្ផា ប្រធានផ្នែកកម្មវិធីផ្សាយរបស់ ភីអិនអិន បានបញ្ជាក់ថា៖ «ភីអិនអិនទទួលបាននូវការសំណូមពរយ៉ាងច្រើនសន្ធឹកសន្ធាប់ពីសំណាក់អ្នកគាំទ្រភាពយន្តភាគថៃរបស់ភីអិនអិន ស្នើសុំឲ្យអញ្ជើញលោកJames ជាដៃគូជាមួយកញ្ញាBellaទើបក្រុមយើងសម្រេចចិត្តអញ្ជើញពួកគាត់រួមគ្នា ម្យ៉ាងទៀតពួកគាត់ទាំងពីរក៏ជាដៃគូសម្តែងសាកសមបំផុតសម្រាប់ប្រចាំឆ្នាំ២០១៦នេះផងដែរ»។ PNN ជាស្ថានីយទូរទស្សន៍ថ្មី និងទំនើបបំផុតនៅក្នុងប្រទេសកម្ពុជា បានចុះកិច្ចសន្យាផ្ដាច់មុខមួយកាលពីខែឧសភា ឆ្នាំ២០១៥ ក្នុងការទទួលបានសិទ្ធិចាក់ផ្សាយខ្សែភាពយន្តភាគល្បីៗ និងថ្មីៗបំផុតរបស់ស្ថានីយ៍ទូរទស្សន៍ប៉ុស្តិ៍លេខ៣ថៃ៕

ដោយ៖ វឌ្ឍនា