ភ្នំពេញ : នៅព្រឹកថ្ងៃទី១៨ ខែសីហា ឆ្នាំ២០២៥ ក្រសួងការពារជាតិ បានអោយដឹងថា ថ្ងៃអាទិត្យ ៨រោច ខែស្រាពណ៍ ឆ្នាំម្សាញ់ សប្តស័ក ព.ស. ២៥៦៩ត្រូវនឹង ថ្ងៃទី១៧ ខែសីហា ឆ្នាំ២០២៥ លោកស្រី នាយឧត្តមសេនីយ៍ ដាំ ដារីនី រដ្ឋលេខាធិការក្រសួងការពារជាតិ បានអញ្ជើញក្នុងពិធីជួបសំណេះសំណាលសួរសុខទុក្ខយោធិនកងពលតូចថ្មេីរជេីងលេខ៤២ និងតំបន់ប្រតិបត្តិការសឹករងឧត្ដរមានជ័យ ព្រមទាំងបានបន្តចុះសួរសុខទុក្ខអ្នកជំងឺដែលកំពុងសម្រាកព្យាបាលនៅគិលានដ្ឋានកងពលតូចលេខ៤២ ដែលរងរបួសនិងមានជំងឺមកពីមណ្ឌលសុវត្ថិភាពបណ្តោះអាសន្ន ក្នុងព្រឹត្តិការណ៍នៃការឈ្លានពាន និងជម្លោះតាមបណ្តោយព្រំដែនកម្ពុជា-ថៃ។
ដោយមានការយកចិត្តទុកដាក់ពី លោកនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ សូមជូនពរដល់បងប្អូនកងទ័ពដែលរងរបួសនិងមានជំងឺទាំងអស់សូមមានសុខភាពល្អ និងឆាប់ជាសះស្បេីយ។
ក្នុងពិធីជួបសំណេះសំណាលសួរសុខទុក្ខ លោកស្រីនាយឧត្តមសេនីយ៍និងប្រតិភូបាននាំយកអំណោយជាគ្រឿងឧបភោគ-បរិភោគ សម្ភារប្រើប្រាស់ និងថវិកា ជូនកងពលតូចថ្មេីរជេីងលេខ៤២ (ថវិកា១០លានរៀល)។ តំបន់ប្រតិបត្តិការសឹករងខេត្តឧត្តរមានជ័យ (ថវិកា១០លានរៀល)។ វរសេនាតូចវិស្វកម្មយោធភូមិភាគទី៤ (ថវិកា១លានរៀល)និងឧបត្ថម្ភជូនអ្នកជំងឺ១០០នាក់ កំពុងសម្រាកព្យាបាលនៅមន្ទីរពេទ្យបង្អែកខេត្ត គិលានដ្ឋានកងពលតូចលេខ៤២ គិលានដ្ឋានតំបន់ប្រតិបត្តិការសឹក (អ្នកជំងឺ និងរបួសម្នាក់ៗទទួលបានថវិកា១០០,០០០រៀល) ព្រមទាំងសម្ភារប្រើប្រាស់មួយចំនួនទៀត៕ 
ប្រភព : ក្រសួងការពារជា
