ជនជាតិជប៉ុនជាច្រើនមានការភ្ញាក់ផ្អើលនៅពេលឃើញដុំភ្លើងភ្លឺពេញផ្ទៃមេឃ ប៉ុន្តែអ្នកជំនាញបាននិយាយថាវាជាបាតុភូតធម្មជាតិ។

វីដេអូនិងរូបថតដែលត្រូវបានបង្ហោះនៅលើប្រព័ន្ធផ្សព្វផ្សាយសង្គមដោយអ្នកស្រុកជាច្រើននៅក្នុងខេត្ត Kagoshima និង Miyazaki បានបង្ហាញពីពន្លឺដ៏ខ្លាំងមួយបានលេចឡើងនៅម៉ោងប្រហែល 11:08 យប់ នៅថ្ងៃទី 19 ខែសីហា។
លោក Yoshihiko Hamahata ដែលកំពុងបើកបរក្នុងខេត្ត Miyazaki នៅពេលនោះបាននិយាយថា “ពន្លឺពណ៌សដែលខ្ញុំមិនធ្លាប់ឃើញពីមុនមកបានធ្លាក់ពីលើ។ វាភ្លឺខ្លាំងណាស់ដែលខ្ញុំអាចមើលឃើញយ៉ាងច្បាស់នូវទម្រង់នៃផ្ទះជុំវិញ។ វាមានពន្លឺដូចថ្ងៃ។ ខ្ញុំមិនដឹងថាមានអ្វីកើតឡើង និងភ្ញាក់ផ្អើលយ៉ាងខ្លាំង” ។
លោក Toshihisa Maeda ប្រធានសារមន្ទីរអវកាស Sendai ក្នុងទីក្រុង Kagoshima បាននិយាយថា ដុំភ្លើងត្រូវបានបង្កឡើងដោយធូលី កម្ទេចកម្ទីរបស់ភពតូចៗ និងវត្ថុផ្សេងៗទៀតនៅក្នុងលំហអាកាសដែលកំពុងឆេះនៅពេលដែលវាចូលទៅក្នុងបរិយាកាសផែនដី។
លោកបាននិយាយថា ពន្លឺភ្លឺច្បាស់ដែលឃើញនៅភាគខាងលិចប្រទេសជប៉ុនទំនងជាដុំភ្លើងភ្លឺខ្លាំងដែលបង្កឡើងដោយអាចម៍ផ្កាយ ហើយវាអាចធ្លាក់ចូលទៅក្នុងមហាសមុទ្រប៉ាស៊ីហ្វិក។
យោងតាមអង្គការ NASA វត្ថុដែលបង្កជាដុំភ្លើងអាចមានទំហំជាងមួយម៉ែត្រ។ គ្រាប់ភ្លើងដែលផ្ទុះនៅក្នុងបរិយាកាសត្រូវបានគេហៅថា bolides ប៉ុន្តែពាក្យ fireball និង bolide ត្រូវបានគេប្រើជាញឹកញាប់ជំនួសគ្នា។
ដុំភ្លើងជាង 500,000 កើតឡើងនៅលើផែនដីជារៀងរាល់ឆ្នាំ ដែលភាគច្រើនធ្លាក់ចូលទៅក្នុងមហាសមុទ្រ និងតំបន់ដែលគ្មានមនុស្សរស់នៅ។ ទោះជាយ៉ាងណាក៏ដោយ ដុំភ្លើងធំជាងគេអាចបណ្តាលឱ្យមានការខូចខាត ដូចជាអាចម៍ផ្កាយ Chelyabinsk ដែលបណ្តាលឱ្យមានរបួស និងខូចខាតយ៉ាងទូលំទូលាយនៅពេលដែលវាបានផ្ទុះនៅ Urals របស់ប្រទេសរុស្ស៊ីក្នុងឆ្នាំ 2013 ៕ ដោយធីរីណា

រូបថត​: vnexpress