ខេត្តកណ្ដាល៖ កម្លាំងកងរាជអាវុធហត្ថស្រុកកណ្តាលស្ទឹងបានឃាត់ខ្លួនបុរសជាជនសង្ស័យដៃដល់ម្នាក់ បន្ទាប់ពីធ្វើសកម្មភាពយ៉ាងឃោរឃៅយកចបជីកវាយទៅលើប្តីប្រពន្ធមួយគូបណ្ដាលឲ្យស្ត្រីជាប្រពន្ធស្លាប់ និងបុរសជាប្តីរងរបួសធ្ងន់ ហើយជនដៃដល់បានរត់គេចខ្លួនអស់រយៈពេលជាង ៤ថ្ងៃ។ ហេតុការណ៍នេះបានកើតឡើងកាលពីយប់ថ្ងៃទី២០ ខែសីហា ឆ្នាំ២០២៥ នៅចំណុចផ្លូវលំស្ថិតក្នុងភូមិត្រពាំងស្វា ឃុំទ្រា ស្រុកកណ្ដាលស្ទឹង។
ប្រភពពីកម្លាំងកងរាជអាវុធហត្ថបានឲ្យដឹងថា ជនរងគ្រោះមាន២នាក់គឺស្ត្រីឈ្មោះ ម៉ាន់ សុគន្ធា អាយុ៤០ឆ្នាំ ដែលស្លាប់ពេលបញ្ជូនដល់មន្ទីរពេទ្យ និងបុរសឈ្មោះ កុយ ពៅ អាយុ៥១ឆ្នាំ ដែលរងរបួសធ្ងន់កំពុងសម្រាកព្យាបាល។ ចំណែកជនសង្ស័យមានឈ្មោះ ប៉ែន សុថារិទ្ធ ភេទប្រុស អាយុ៣៣ឆ្នាំ រស់នៅភូមិត្រពាំងស្វា ឃុំទ្រា។ ជនសង្ស័យមានលទ្ធផលតេស្តទឹកនោមវិជ្ជមាន(+)សារធាតុញៀន។ វត្ថុតាងដែលចាប់យកបានរួមមាន ម៉ូតូ១គ្រឿង និងចបជីកដែក១ដើមប្រវែង ០,៧៧ម៉ែត្រ។
តាមការបំភ្លឺពីកូនស្រីជនរងគ្រោះឈ្មោះ អឿន កញ្ញា (១៥ឆ្នាំ) បានឲ្យដឹងថា កន្លងមកជនសង្ស័យតែងតែគប់ដុំថ្មលើដំបូលផ្ទះម្តាយរបស់ខ្លួនជាប្រចាំ។ លុះដល់រសៀលថ្ងៃទី២០ ខែសីហា ជនសង្ស័យបម្រុងវាយប្អូនប្រុសរបស់នាង ស្រាប់តែម្តាយរបស់នាងឃើញ ហើយបានស្រែកឃាត់ រហូតបង្កជាជម្លោះពាក្យសម្ដី។ នៅវេលាយប់កើតហេតុ ជនសង្ស័យបានទៅវាយឪពុករបស់នាងមុន បណ្តាលឲ្យរងរបួសធ្ងន់ រួចក៏បន្តវាយទៅលើម្តាយនាងចំនួន៥ចបជីកចំក្បាល បណ្ដាលឲ្យស្លាប់ពេលបញ្ជូនដល់មន្ទីរពេទ្យ។ ក្រោយធ្វើសកម្មភាពរួច ជនសង្ស័យបានរត់គេចខ្លួនបាត់។
ក្រោយទទួលព័ត៌មានភ្លាម កម្លាំងកងរាជអាវុធហត្ថខេត្តនិងស្រុកបានចុះដល់កន្លែងកើតហេតុ សាកសួរជុំវិញកន្លែងកើតហេតុ និងស្រាវជ្រាវកំណត់អត្តសញ្ញាណជនសង្ស័យ។ រហូតដល់ថ្ងៃទី២៥ សីហា វេលាម៉ោង ៨និង ២០នាទី កម្លាំងជំនាញបានចុះទៅឃាត់ខ្លួនជនសង្ស័យនៅចំណុចភូមិត្រពាំងស្វា ជាប់ព្រំប្រទល់ស្រុកបាទី ខេត្តតាកែវ។ នៅចំពោះមុខសមត្ថកិច្ច ជនសង្ស័យបានសារភាពថា ខ្លួនខឹងប្រពន្ធជនរងគ្រោះដែលជេរម៉ែរបស់ខ្លួន ទើបយកចបជីកប្រវែង ០,៧៧ម៉ែត្រ វាយទៅលើជនរងគ្រោះជាប្តីនិងប្រពន្ធ។ ក្រោយមកកម្លាំងកងរាជអាវុធហត្ថបានសហការជាមួយអាវុធហត្ថស្រុកបាទី នាំខ្លួនជនសង្ស័យទៅចង្អុលបង្ហាញកន្លែងលាក់ចបជីកដែលជាវត្ថុតាងផងដែរ។ តាមការពិនិត្យ ជនសង្ស័យមានសារធាតុញៀនក្នុងខ្លួនវិជ្ជមាន(+)។
ប្រតិបត្តិការនេះធ្វើឡើងតាមការអនុវត្តភារកិច្ចស្នូលរបស់កងរាជអាវុធហត្ថ និងតាមប្រសាសន៍ដឹកនាំដ៏ខ្ពង់ខ្ពស់ពីលោកនាយឧត្តមសេនីយ៍ សៅ សុខា និងលោក គួច ចំរើន អភិបាលខេត្តកណ្ដាល។ បច្ចុប្បន្ន ជនសង្ស័យកំពុងត្រូវបាននាំខ្លួនមកសាកសួរនៅអង្គភាពជំនាញដើម្បីបន្តនីតិវិធី៕
