ភ្នំពេញ ៖ យោងតាមសេចក្តីសម្រេចរបស់រាជរដ្ឋាភិបាលចុះលេខាដោយសម្ដេចមហាបវរធិបតី ហ៊ុន ម៉ាណែត ថ្ងៃទី៦ ខែកុម្ភៈ ឆ្នាំ២០២៤ គណៈកម្មការប្រយុទ្ធប្រឆាំងផលិតផលក្លែងក្លាយដែលបង្កគ្រោះថ្នាក់មានហានិភ័យខ្ពស់ ដល់សុខភាពនិងសុវត្ថិភាពសង្គម ហៅកាត់ថា គ.ប.ផ.ក បង្កើតឡើងដើម្បីទប់ស្កាត់រាល់សកម្មភាព ពាក់ព័ន្ធនឹងផលិតផលក្លែងក្លាយដែលបង្កគ្រោះថ្នាក់មានហានិភ័យខ្ពស់ដល់សុខភាពនិងសុវត្ថិភាពសង្គម។
គ.ប.ផ.ក. មានភារកិច្ចជាច្រើនដូចជា សហការជាមួយក្រសួង ស្ថាប័នពាក់ព័ន្ធក្នុងការរៀបចំគោលនយោបាយ យុទ្ធសាស្ត្រ និងផែនការ សកម្មភាព ដើម្បីទប់ស្កាត់រាល់សកម្មភាពពាក់ព័ន្ធនឹងផលិតផលក្លែងក្លាយដែលបង្កគ្រោះថ្នាក់មានហានិភ័យខ្ពស់ដល់សុខភាពនិងសុវត្ថិភាពសង្គម សហការជាមួយក្រសួង ស្ថាប័នពាក់ព័ន្ធក្នុងការរៀបចំតាក់តែងសេចក្តីព្រាងច្បាប់ និងលិខិតបទដ្ឋានគតិយុត្ត ពាក់ព័ន្ធនឹងការប្រយុទ្ធប្រឆាំងផលិតផលក្លែងក្លាយ។
ទន្ទឹមនេះ គ.ប.ផ.ក មានភារកិច្ចរៀបចំផែនការសកម្មភាពបណ្ដុះបណ្ដាល និងពង្រឹងសមត្ថភាពដល់មន្ត្រីមានសមត្ថកិច្ចក្នុងការ អនុវត្តច្បាប់និងលិខិតបទដ្ឋានគតិយុត្តនានា, រៀបចំផែនការយុទ្ធសាស្ត្រ ផែនការសកម្មភាព និងជំរុញការងារផ្សព្វផ្សាយអប់រំដល់សាធារណជន អំពីផលប៉ះពាល់នៃការប្រើប្រាស់ផលិតផលក្លែងក្លាយ ដើម្បីឱ្យមានការយល់ដឹងជាទូទៅអំពីបញ្ហាប្រឈម និងផលប៉ះពាល់ ក្នុងគោលបំណងឈានដល់ការលុបបំបាត់នូវការផលិត ការកែច្នៃ ការនាំចេញ ការនាំចូល ការលក់ដូរ និងការប្រើប្រាស់ផលិតផលក្លែងក្លាយ។
គ.ប.ផ.ក ក៏មានភារកិច្ច ផ្ដួចផ្ដើមគំនិតក្នុងការកំណត់វិធានការប្រយុទ្ធប្រឆាំងផលិតផលក្លែងក្លាយដែលបង្កគ្រោះថ្នាក់មានហានិភ័យខ្ពស់ដល់សុខភាពនិងសុវត្ថិភាពសង្គម, ជំរុញឱ្យមានការពង្រឹងការអនុវត្តច្បាប់និងលិខិតបទដ្ឋានគតិយុត្តពាក់ព័ន្ធនឹងផលិតផលក្លែងក្លាយឱ្យមានប្រសិទ្ធភាពខ្ពស់ សហការជាមួយស្ថាប័នជាតិ អន្តរជាតិ អង្គការ និងដៃគូអភិវឌ្ឍនានា ដើម្បីគាំទ្រសកម្មភាពប្រយុទ្ធ ប្រឆាំងផលិតផលក្លែងក្លាយ រាយការណ៍អំពីការអនុវត្តការងារក្នុងដំណាក់កាលបំពេញភារកិច្ចជាក់ស្ដែងនីមួយៗជូនប្រមុខ រាជរដ្ឋាភិបាលនិងរដ្ឋមន្ត្រីក្រសួងមហាផ្ទៃ និងទទួលអនុវត្តភារកិច្ចផ្សេងទៀតតាមប្រគល់ពីប្រមុខរាជរដ្ឋាភិបាល។
បើតាមសេចក្ដីសម្រេច គ.ប.ផ.ក មានរដ្ឋលេខាធិការក្រសួងមហាផ្ទៃ ១រូប ជាប្រធាន អមដោយអនុប្រធាន៤រូប រួមមាន អគ្គស្នងការនៃអគ្គស្នងការដ្ឋាននគរបាលជាតិ (អនុប្រធាននៃចិន្ត្រៃយ៍) អនុរដ្ឋលេខាធិការទីស្តីការគណៈរដ្ឋមន្ត្រី អនុរដ្ឋលេខាធិការក្រសួងយុត្តិធម៌ និងអនុរដ្ឋលេខាធិការក្រសួងពាណិជ្ជកម្ម ព្រមទាំងតំណាងក្រសួងស្ថាប័នមួយចំនួនទៀតជាសមាជិក។ គ.ប.ផ.ក មានលេខាធិការដ្ឋានមួយដែលមានរចនាសម្ព័ន្ធ ផ្នែករដ្ឋបាល និងផ្នែកបច្ចេកទេស។ សមាសភាព និងរបៀបរបបធ្វើការងារនៃលេខាធិការដ្ឋាន ត្រូវកំណត់ដោយសេចក្ដីសម្រេចរបស់រដ្ឋមន្ត្រីក្រសួងមហាផ្ទៃ។ បច្ចុប្បន្ន គ.ប.ផ.ក ដឹកនាំដោយឯកឧត្តម នៅ លក្ខណា រដ្ឋលេខាធិការក្រសួងមហាផ្ទៃ ជាប្រធាន។
យោងតាមរបាយការណ៍របស់លេខាធិការដ្ឋាន ក្នុងឆមាសទី១ ដើមឆ្នាំ២០២៥នេះ គណៈកម្មការប្រយុទ្ធប្រឆាំងផលិតផលក្លែងក្លាយដែលបង្កគ្រោះថ្នាក់មានហានិភ័យខ្ពស់ ដល់សុខភាពនិងសុវត្ថិភាពសង្គម សម្រេចបាននូវលទ្ធផលការងារជាអាទិ៍ រៀបចំផែនការសកម្មភាពឆ្នាំ២០២៥ រៀបចំដាក់ឱ្យដំណើរការឡើងវិញនូវទំព័រហ្វេសបុក ផ្លូវការ រៀបចំខ្លឹមសារ និងមាតិកាលើការផ្សព្វផ្សាយ អប់រំ អំពីផលប៉ះពាល់ នៃផលិតផលក្លែងក្លាយ និងផលិតផល ដែលប៉ះពាល់សុខភាពរផ្សេងៗទៀត បញ្ចប់ផែនការយុទ្ធសាស្ត្រថវិកា ៣ឆ្នាំរំកិល និងគម្រោងផែនការថវិកាប្រចាំឆ្នាំ២០២៦។
៦ខែមកនេះ គ.ប.ផ.ក ក៏បាននិងកំពុងរៀបចំសេចក្តីព្រាងអនុស្សរណៈនៃការយោគយល់គ្នា ជាមួយសមាគមឧស្សាហកម្មថ្នាំជក់កម្ពុជា បានបញ្ចប់របាយការណ៍នៃការពិនិត្យឡើងវិញ និងការវិភាគមុខងារ និងរចនាសម្ព័ន្ធលេខាធិការដ្ឋាន និងសហការរៀបចំសិក្ខាសាលាស្តីពី ការកំណត់អត្តសញ្ញាណផលិតផល ជាមួយក្រុមហ៊ុនមេធាវី អន្តរជាតិជាដើម៕
ដោយ ៖ លោក សេង បូលីន មន្ត្រីអ្នកនាំពាក្យក្រសួងមហាផ្ទៃ
