ខេត្តកណ្ដាល៖ ជនសង្ស័យ២នាក់ត្រូវបានកម្លាំងនគរបាលស្រុកកៀនស្វាយឃាត់ខ្លួន បន្ទាប់ពីធ្វើសកម្មភាពជួញដូរ និងប្រើប្រាស់គ្រឿងញៀននៅក្នុងផ្ទះទុកចោលមួយកន្លែង។ ក្នុងប្រតិបត្តិការនេះ មេខ្លោងជួញដូរនិងប្រើប្រាស់គ្រឿងញៀនបានរត់គេចខ្លួនបាត់។ ហេតុការណ៍នេះបានកើតឡើងនៅថ្ងៃទី២៧ ខែសីហា ឆ្នាំ២០២៥ វេលាម៉ោង ១៤និង២០នាទី នៅភូមិរាំងដេក ឃុំគគីរធំ ស្រុកកៀនស្វាយ។
លោកវរសេនីយ៍ឯក ព្រុំ សំណាង អធិការនគរបាលស្រុកកៀនស្វាយបានឲ្យដឹងថា ជនសង្ស័យដែលឃាត់ខ្លួនបានមានឈ្មោះ វឿន សុខណា ភេទប្រុស អាយុ២២ឆ្នាំ ដែលជាអ្នកជួញដូរ និងឈ្មោះ រិន ពេជ្រសង្វា (ហៅប្លោក) ភេទប្រុស អាយុ១៨ឆ្នាំ ដែលជាអ្នកប្រើប្រាស់។ ចំណែកជនសង្ស័យមេខ្លោងឈ្មោះចាស់ ភេទប្រុស អាយុប្រហែល៤១ឆ្នាំបានរត់គេចខ្លួនបាត់។ សមត្ថកិច្ចបានដកហូតវត្ថុតាងមានម្សៅក្រាមពណ៌សថ្លាប្រភេទម៉ាទឹកកកចំនួន១កញ្ចប់តូច ដែលមានទម្ងន់ ០,១២ក្រាម, ទូរស័ព្ទដៃ១គ្រឿងនិងសម្ភារៈវេចខ្ចប់ និងប្រើប្រាស់មួយចំនួន។
លោកអធិការបានបន្តថា ក្រោយទទួលបានព័ត៌មានពីប្រជាពលរដ្ឋករណីជួញដូរគ្រឿងញៀន កម្លាំងប៉ុស្តិ៍នគរបាលរដ្ឋបាលគគីរធំបានចុះទៅដល់ទីតាំងភ្លាមៗ ហើយបានឃាត់ខ្លួនជនសង្ស័យទាំង ២នាក់ខាងលើ។ ពេលត្រួតពិនិត្យ សមត្ថកិច្ចរកឃើញថ្នាំញៀន១កញ្ចប់តូច។
នៅចំពោះមុខសមត្ថកិច្ច ជនសង្ស័យឈ្មោះ វឿន សុខណា បានសារភាពថា ថ្នាំញៀននេះគឺជារបស់ឈ្មោះ ចាស់ ដែលបានឲ្យខ្លួនទុកប្រើប្រាស់ និងលក់បន្តចំនួន ៥ដងមកហើយ។ ចំណែកជនសង្ស័យឈ្មោះ រិន ពេជ្រសង្វា សារភាពថា ខ្លួនបានមកទិញថ្នាំញៀនពីឈ្មោះ ចាស់ ក្នុងតម្លៃ ១០.០០០រៀល។
បច្ចុប្បន្ន ជនសង្ស័យទាំង២នាក់រួមទាំងវត្ថុតាងត្រូវបានបញ្ជូនទៅអធិការដ្ឋាននគរបាលស្រុកកៀនស្វាយ ដើម្បីកសាងសំណុំរឿងចាត់ការតាមនីតិវិធី៕
ដោយ៖សុរិយា
