ប្រធានាធិបតីអាមេរិកលោក Donald Trump និងលោកប្រធានាធិបតីចិន Xi Jinping បានសន្ទនាគ្នាតាមទូរស័ព្ទកាលពីថ្ងៃទី 19 ខែកញ្ញា ដែលនិយាយអំពីជោគវាសនារបស់ TikTok និងពាណិជ្ជកម្មរវាងប្រទេសទាំងពីរ។

ទីភ្នាក់ងារសារព័ត៌មាន Xinhua បានបញ្ជាក់ថា មេដឹកនាំទាំងពីរបានហៅទូរស័ព្ទមួយនៅថ្ងៃទី 19 ខែកញ្ញា ប៉ុន្តែមិនបានផ្តល់ព័ត៌មានលម្អិតអំពីការហៅនោះទេ។ សេតវិមានបាននិយាយថា ការហៅទូរស័ព្ទបានចាប់ផ្តើមនៅម៉ោងប្រហែល 8 ព្រឹកម៉ោងខាងកើត ។
មន្ត្រីសេតវិមានបានស្នើឱ្យអ្នកសារព័ត៌មានតាមដានវេទិកាសង្គម Truth Social ព្រោះព័ត៌មានថ្មីៗទាក់ទងនឹងការហៅទូរស័ព្ទជាមួយលោក Xi Jinping នឹងត្រូវបានចែករំលែកដោយ Donald Trump នៅលើបណ្តាញសង្គមនេះជាមុនសិន។
បន្ទាប់ពីនោះមក នៅលើបណ្តាញសង្គម Truth Social លោក Donald Trump បានវាយតម្លៃការហៅទូរស័ព្ទនេះថា “ផលិតភាព”។ ចៅហ្វាយសេតវិមានបាននិយាយថា លោកនឹងជួបលោក Xi Jinping ក្នុងវេទិកាកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) ក្នុងប្រទេសកូរ៉េខាងត្បូងនាខែវិច្ឆិកាខាងមុខ។
លោកបានសរសេរថា “ខ្ញុំនឹងទៅទស្សនកិច្ចប្រទេសចិននៅដើមឆ្នាំ 2026 ហើយប្រធានាធិបតី Xi Jinping ក៏នឹងទៅបំពេញទស្សនកិច្ចនៅសហរដ្ឋអាមេរិកនៅពេលដ៏សមស្របមួយ” ។
ទន្ទឹមនឹងនេះដែរ ស៊ីនហួបានផ្សាយថា នៅក្នុងការហៅទូរស័ព្ទ “វិជ្ជមាន និងស្ថាបនា” ប្រធានាធិបតីចិន លោក ស៊ី ជីនពីង បានសង្កត់ធ្ងន់ថា ទំនាក់ទំនងរវាងសហរដ្ឋអាមេរិក នឹងចិនមានសារៈសំខាន់ខ្លាំងណាស់ ហើយសហរដ្ឋអាមេរិកគួរតែបដិសេធពីពន្ធឯកតោភាគី។
សេចក្តីសង្ខេបបាននិយាយថា “ទាក់ទងនឹង TikTok លោក Xi Jinping បាននិយាយថា ជំហររបស់ប្រទេសចិនគឺច្បាស់ណាស់។ រដ្ឋាភិបាលចិនគោរពឆន្ទៈរបស់សហគ្រាស និងស្វាគមន៍ក្រុមហ៊ុននានាក្នុងការចរចារអាជីវកម្មដោយផ្អែកលើច្បាប់ទីផ្សារ ដើម្បីឈានទៅដល់ដំណោះស្រាយដែលស្របតាមច្បាប់របស់ប្រទេសចិន និងធ្វើឱ្យមានតុល្យភាពផលប្រយោជន៍”៕ ដោយធីរីណា