លោក Donald Trump នឹងធ្វើអន្តរាគមន៍ដើម្បីរារាំងសហព័ន្ធបាល់ទាត់ពិភព (FIFA) ដែលហាមប្រាមអ៊ីស្រាអែលមិនឱ្យចូលរួមការប្រកួត World Cup នៅសហរដ្ឋអាមេរិកនៅរដូវក្តៅក្រោយ។

អង្គការសហប្រជាជាតិក្នុងសប្តាហ៍នេះ បានជំរុញឱ្យអង្គការនានាផ្អាកក្រុមកីឡារបស់អ៊ីស្រាអែលជុំវិញសង្គ្រាមនៅតំបន់ហ្គាហ្សា បន្ទាប់ពីគណៈកម្មការអង្គការសហប្រជាជាតិបាននិយាយថា អ៊ីស្រាអែលកំពុងប្រព្រឹត្តអំពើប្រល័យពូជសាសន៍នៅក្នុងតំបន់នោះ។ អ៊ីស្រាអែលបានច្រានចោលការចោទប្រកាន់នេះ។

ឥឡូវនេះ យោងតាមសារព័ត៌មាន Sky News អ្នកនាំពាក្យរបស់នាយកដ្ឋានរដ្ឋលោក Marco Rubio បាននិយាយថា “យើងនឹងធ្វើការយ៉ាងដាច់ខាតដើម្បីបញ្ឈប់រាល់កិច្ចខិតខំប្រឹងប្រែងណាមួយក្នុងការប៉ុនប៉ងហាមឃាត់ក្រុមបាល់ទាត់ជម្រើសជាតិអ៊ីស្រាអែលពីការប្រកួត World Cup” ។

FIFA មិនទាន់ឆ្លើយតបនឹងការអំពាវនាវរបស់អង្គការសហប្រជាជាតិនៅឡើយទេ ប៉ុន្តែការលើកឡើងនេះធ្វើឱ្យប្រធានរបស់ខ្លួនលោក Gianni Infantino ស្ថិតក្នុងស្ថានភាពលំបាកមួយ បន្ទាប់ពីបានប្រឹងប្រែងបង្កើតទំនាក់ទំនងជិតស្និទ្ធជាមួយលោក Trump។

នៅក្នុងសុន្ទរកថានៅទីក្រុងញូវយ៉កក្នុងសប្តាហ៍នេះ លោកInfantino បាននិយាយថាវាពិបាកក្នុងការដាក់ទណ្ឌកម្មប្រទេសដែលពាក់ព័ន្ធក្នុងជម្លោះ ប៉ុន្តែបានបន្ថែមថា “ខ្ញុំរងទុក្ខនៅពេលដែលខ្ញុំឃើញកុមាររងទុក្ខ។ ខ្ញុំយំនៅពេលឃើញម្តាយយំ មិនថានៅហ្គាហ្សា… គ្រប់ទីកន្លែងក្នុងពិភពលោក”។

រុស្ស៊ីនៅតែជាប់បម្រាមពីការប្រកួតអន្តរជាតិ ដោយសារតែសង្គ្រាមជាមួយអ៊ុយក្រែន ហើយនឹងមិនលេងនៅ World Cup ដែលចាប់ផ្តើមខែមិថុនាក្រោយ។

អ៊ីស្រាអែលនៅសល់ការប្រកួតជម្រុះចំនួនពីរទៀត ដែលការប្រកួតបន្ទាប់នឹងធ្វើឡើងក្នុងរយៈពេលជាងពីរសប្តាហ៍ទៀតគឺនៅថ្ងៃទី 11 ខែតុលា ជាមួយន័រវេស មុនពេលការប្រកួតចុងក្រោយរបស់ខ្លួនជាមួយនឹងអ៊ីតាលីបីថ្ងៃក្រោយមក។ អ៊ីស្រាអែលស្ថិតនៅលេខ៣ក្នុងតារាងពិន្ទុជាមួយក្រុមលេខ២អីុតាលី ។ អ្នកឈ្នះក្នុងពូលមានលក្ខណៈសម្បត្តិគ្រប់គ្រាន់សម្រាប់ការប្រកួត World Cup ដោយស្វ័យប្រវត្តិ ខណៈដែលចំណាត់ថ្នាក់លេខ 2 ចូលលេងវគ្គ Playoff ។ ប៉ុន្តែមន្ត្រីន័រវេសបាននិយាយរួចហើយថា ខ្លួននឹងបរិច្ចាគប្រាក់ចំណេញណាមួយពីហ្គេមនោះ ដល់អង្គការជំនួយមនុស្សធម៌នៅហ្គាហ្សា។ ហើយមានការជឿជាក់កាន់តែខ្លាំងឡើងដែលថាប្រទេសបាល់ទាត់នៅអឺរ៉ុបចង់ឲ្យអ៊ីស្រាអែលត្រូវបានហាមឃាត់ពីWorld Cup ឆ្នាំក្រោយ៕