ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានបង្ហាញសុទិដ្ឋិនិយមថា ទំនាក់ទំនងរវាងប្រទេសកម្ពុជា និងអាលីម៉ង នឹងកាន់តែស៊ីជម្រៅបន្ថែមទៀត ដើម្បីគុណប្រយោជន៍រួមសម្រាប់ប្រជាជន និងប្រទេសទាំងពីរ ខណៈសម្តេចមើលឃើញថាទំនាក់ទំនងទ្វេភាគីកម្ពុជា និងអាល្លឺម៉ង់រយៈពេល៣២ឆ្នាំមកនេះបានរីកចម្រើនជាច្រើនវិស័យគួរឲ្យកត់សម្គាល់។
តាមរយៈសារលិខិតផ្ញើរជូន ប្រធានាធិបតីសហព័ន្ធអាល្លឺម៉ង់ លោក ហ្វង វ៉កខឺ ស្តេនម៉ីអឺ និងលោកស្រី អេនគេ រ៉េលីងហ្គឺ ប្រធានក្រុមប្រឹក្សាសហព័ន្ធសាធារណរដ្ឋសហព័ន្ធអាល្លឺម៉ង់ នៃខួបអនុស្សាវរីយ៍លើកទី៣៥ នៃទិវាឯកភាព ជាតិអាល្លឺម៉ង់ កាលពីថ្ងៃទី៣ ខែតុលា ឆ្នាំ២០២៥នេះ សម្តេចតេជោ ហ៊ុន សែន បានលើកឡើងថា ក្នុងនាមប្រជាជន ស្ថាប័ននីតិប្បញ្ញត្តិ និងនីតិប្រតិបត្តិ នៃព្រះរាជាណាចក្រកម្ពុជាព្រមទាំងក្នុងនាម សម្តេចផ្ទាល់ សម្តេចសូមសម្ដែងការអបអរសាទរយ៉ាងកក់ក្តៅបំផុតចំពោះ លោកនិងប្រជាជនជាទីរាប់អាន នៃសាធារណរដ្ឋសហព័ន្ធអាល្លឺម៉ង់ ក្នុងឱកាសដ៏នក្ខត្តឫក្ស នៃខួបអនុស្សាវរីយ៍លើកទី៣៥ នៃទិវាឯកភាព ជាតិអាល្លឺម៉ង់។
សម្តេចតេជោ ហ៊ុន សែន បានគូសបញ្ជាក់ថាថ្ងៃទី៣ ខែតុលា គឺជាខណៈពេលដ៏អស្ចារ្យមួយក្នុងប្រវត្តិសាស្ត្រអាល្លឺម៉ង់ ដើម្បីរំលឹកនូវស្មារតី ឯកភាពជាតិឋិតថេរ និងសមិទ្ធផលគួរកត់សំគាល់ក្នុងការអភិវឌ្ឍសេដ្ឋកិច្ច-សង្គម ស្របពេលដែលកំពុងដើរតួនាទីយ៉ាងសំខាន់នៅក្នុងតំបន់ និងពិភពលោក។ ខ្ញុំមានទំនុកចិត្តថា សាធារណរដ្ឋសហព័ន្ធអាល្លឺម៉ង់ នឹងបន្តនាំមុខក្នុងផ្នែកវិទ្យាសាស្ត្រ ឧស្សាហកម្មធុនធ្ងន់ បច្ចេកវិទ្យា និងនវានុវត្តន៍ ដែលជាការរួមចំណែក យ៉ាងធំធេងក្នុងការរៀបចំរបៀបវារៈអន្តរជាតិសម្រាប់សន្តិភាព និងការអភិវឌ្ឍប្រកបដោយចីរភាព»។
សម្តេចតេជោ បានបង្ហាញនូវសេចក្តីសោមនស្សរីករាយដោយកត់សម្គាល់ឃើញថា ព្រះរាជាណាចក្រកម្ពុជា និងសាធារណរដ្ឋសហព័ន្ធអាល្លឺម៉ង់ មានការរីកចម្រើនគួរឱ្យកត់សម្គាល់នៅក្នុងវិស័យជាច្រើន ចាប់តាំងពីការបង្កើតទំនាក់ទំនងការទូតរបស់យើងឡើងវិញក្នុងឆ្នាំ១៩៩៣មក។
សម្តេចតេជោប្រមុខរដ្ឋស្ដីទី មានការជឿជាក់យ៉ាងមុតមាំថា តាមរយៈ កិច្ចខិតខំប្រឹងប្រែងរួមគ្នា ទំនាក់ទំនងរវាងប្រទេសរបស់យើងទាំងពីរ(កម្ពុជា-អាលីម៉ង) នឹងកាន់តែស៊ីជម្រៅថែមទៀត ដើម្បីផលប្រយោជន៍ទៅវិញទៅមកសម្រាប់ប្រជាជនយើងទាំងពីរ និងដើម្បីសន្តិភាព ស្ថិរភាព និងវិបុលភាពក្នុងតំបន់ និងពិភពលោក។
តាមរយៈសារលិខិតខាងលើនេះដែរ សម្តេចតេជោ ហ៊ុន សែន ក៏បានជូនពរ លោកប្រធានាធិបតី និងលោកស្រីប្រធានក្រុមប្រឹក្សាសហព័ន្ធ សាធារណរដ្ឋសហព័ន្ធអាល្លឺម៉ង់ ទទួលបានសុខភាពល្អបរិបូរណ៍ សុភមង្គល និងជោគជ័យក្នុងភារកិច្ចដ៏ឧត្ដុង្គឧត្តម និងសូមជូនពរ ប្រជាជនអាល្លឺម៉ង់ ទទួលបាននូវសុខុមាលភាព និងវិបុលភាពផងដែរ៕
ដោយ៖តារា
