ខ្លាឃ្មុំព្រៃមួយក្បាលនៅជប៉ុនបានវាយប្រហារផ្សារទំនើបមួយក្នុងទីក្រុង Numata ដោយបានធ្វើឱ្យអតិថិជនពីរនាក់រងរបួស និងវាយឆ្មក់តំបន់លក់ស៊ូស៊ី និងត្រី។

ប៉ូលិសបាននិយាយថា ពួកគេបានទទួលទូរស័ព្ទនៅម៉ោងប្រហែល ៧ និង ៣០ នាទីយប់ នៅថ្ងៃទី 8 ខែតុលារាយការណ៍ថាខ្លាឃ្មុំវាយប្រហារអតិថិជននៅខាងក្នុងផ្សារទំនើបមួយក្នុងទីក្រុង Numata ចម្ងាយប្រហែល 130 គីឡូម៉ែត្រខាងជើងទីក្រុងតូក្យូ។
ខ្លាឃ្មុំនេះត្រូវបានគេជឿថាបានវាយទៅលើមនុស្សម្នាក់នៅក្នុងចំណតរថយន្ត មុនពេលវាយប្រហារអតិថិជនផ្សេងទៀតនៅក្នុងផ្សារទំនើប។ ជនរងគ្រោះ២នាក់បានរងរបួស ប៉ុន្តែជីវិតពួកគេមិនមានគ្រោះថ្នាក់ឡើយ ។
ខ្លាឃ្មុំដែលមានកម្ពស់ប្រហែល 1.4 ម៉ែត្រ បន្ទាប់មកបានបន្តស្វែងរកត្រី និងតំបន់ស៊ូស៊ី មុនពេលចាកចេញ។ អ្នកគ្រប់គ្រងបាននិយាយថា មានអតិថិជនប្រហែល 30 ទៅ 40 នាក់នៅក្នុងផ្សារទំនើបនៅពេលនោះ។
អ្នកគ្រប់គ្រងផ្សារទំនើបបាននិយាយថា “វាហាក់បីដូចជាខ្លាឃ្មុំចង់ចាកចេញភ្លាមៗបន្ទាប់ពីចូលទៅក្នុងផ្សារទំនើប ប៉ុន្តែមិនអាចរកផ្លូវចេញបាន ហើយបានវង្វេង” ។ នៅពេលដែលអ្នកគ្រប់គ្រងបានណែនាំអតិថិជនឱ្យជម្លៀសចេញ ខ្លាឃ្មុំបានរកឃើញផ្លូវចេញ។ អ្នកគ្រប់គ្រងបាននិយាយថា “ខ្ញុំតែងតែលឺអំពីសត្វខ្លាឃ្មុំចូលហាង ប៉ុន្តែខ្ញុំមិនដែលគិតថាខ្លាឃ្មុំនឹងចូលហាងរបស់យើងទេ”។
ការវាយប្រហាររបស់សត្វខ្លាឃ្មុំស្រដៀងគ្នាចំនួនពីរកាលពីដើមខែនេះបានសម្លាប់មនុស្ស 2 នាក់ ដែលនាំឱ្យចំនួនសរុបនៃការស្លាប់ដោយខ្លាឃ្មុំនៅក្នុងប្រទេសជប៉ុនក្នុងឆ្នាំនេះកើនឡើងដល់៧នាក់។ នេះគឺជាចំនួនអ្នកស្លាប់ប្រចាំឆ្នាំខ្ពស់បំផុតចាប់តាំងពីកំណត់ត្រាបានចាប់ផ្តើមក្នុងឆ្នាំ 2006 ។
អ្នកជំនាញនិយាយថា ខ្លាឃ្មុំកំពុងផ្លាស់ទីឆ្ងាយពីទីជម្រកប្រពៃណីរបស់ពួកគេ និងចូលទៅក្នុងទីក្រុងដើម្បីស្វែងរកអាហារ ដោយសារការប្រែប្រួលអាកាសធាតុកាត់បន្ថយប្រភពអាហារធម្មជាតិរបស់សត្វ។
កាលពីថ្ងៃទី៧ ខែតុលា កសិករម្នាក់ត្រូវខ្លាឃ្មុំវាយប្រហារនៅតំបន់ភាគខាងជើងនៃក្រុង Akita។ ប៉ុន្មានថ្ងៃមុននេះ អ្នកទេសចរជនជាតិអេស្បាញម្នាក់បានរងរបួសដោយសារខ្លាឃ្មុំពេលដើរនៅជិតចំណតឡានក្រុងក្នុងភូមិ Shirakawa ដែលជាតំបន់ទេសចរណ៍ដ៏ពេញនិយមនៅកណ្តាលប្រទេសជប៉ុន៕

រូបថត​: asahi