ភ្នំពេញ៖ បុរសម្នាក់ដែរជាកម្មករលាងរថយន្តនៅការ៉ាសយីហោ ឌីឡាយ ដេកស្លាប់បង្កឲ្យភ្ញាក់ផ្អើលដល់សមត្ថកិច្ចមូលដ្ឋានចុះទៅត្រួតពិនិត្យមើលទើបដឹងថា ជនរងគ្រោះស្លាប់នេះគឺដោយសារគាំងបេះដូង ។

ហេតុការណ៍ភ្ញាក់ផ្អើលខាងលើនេះបានកើតឡើងកាលពីវេលាម៉ោង៦ព្រឹកថ្ងៃទី០៧ ខែកញ្ញា ឆ្នាំ២០១៦ នៅចំណុចការ៉ាសលាងរថយន្តយីហោ ឌីឡាយ តាមផ្លូវលេខ២១៤ កែងផ្លូវលេខ១៩ សង្កាត់ជ័យជំនះ ខណ្ឌដូនពេញ ។

ជនរងគ្រោះឈ្មោះ នាង កុយ ភេទប្រុស អាយុ២២ឆ្នាំ ស្នាក់នៅទីតាំងកើតហេតុខាងលើ និងមានទីលំនៅ ស្រុកស្វាយជ្រុំ ខេត្តស្វាយរៀង ។

ប្រភពព័ត៌មានពីសាក្សីនៅកន្លែងកើតហេតុឲ្យដឹងថា នៅមុនពេលកើតហេតុនៅយប់ថ្ងៃទី០៦ ខែកញ្ញា ជនរងគ្រោះបានដេកលេងទូរស័ព្ទហើយក៏នាំគ្នាដេកជាមួយនឹងកម្មករដូចគ្នា ស្រាប់តែព្រឹកឡើងកម្មករដូចគ្នាបានហៅជនរងគ្រោះឲ្យភ្ញាក់ទើបដឹងថាស្លាប់បាត់ទៅហើយ រួចបង្កឲ្យភ្ញាក់ផ្អើលដល់សមត្ថកិច្ចតែម្តង ។

ក្រោយកើតហេតុសមត្ថកិច្ចចម្រុះបានចុះទៅដល់កន្លែងកើតហេតុនិងដោយឆ្លងតាមការពិនិត្យរបស់លោកឧកញ៉ាវេជ្ជបណ្ឌិត នង សុវណ្ណារ័ត្ន គ្រូពេទ្យកោសល្យវិច័យសាលាដំបូងរាជធានីភ្នំពេញ និងសមត្ថកិច្ចជំនាញបានបញ្ជាក់ថាបុរសរងគ្រោះពិតជាស្លាប់ដោយសារគាំងបេះដូងមែន ៕

ដោយ៖ ស ដារ៉ា