ប្រធានាធិបតីអាមេរិក ដូណាល់ ត្រាំ បានសម្តែងទំនុកចិត្តនៅថ្ងៃទី ២៥ ខែតុលា ក្នុងការឈានដល់ «កិច្ចព្រមព្រៀងដ៏ទូលំទូលាយ» ជាមួយប្រធានាធិបតីចិន ស៊ី ជីនពីង ដើម្បីបញ្ចប់ភាពតានតឹងពាណិជ្ជកម្មរវាងប្រទេសដែលមានសេដ្ឋកិច្ចធំជាងគេទាំងពីររបស់ពិភពលោក។

លោក ត្រាំ បានប្រាប់អ្នកយកព័ត៌មាននៅលើយន្តហោះ Air Force One ថា «ខ្ញុំគិតថាយើងមានឱកាសល្អណាស់ក្នុងការឈានដល់កិច្ចព្រមព្រៀងដ៏ទូលំទូលាយមួយ» ។
នៅក្នុងការវិវឌ្ឍពាក់ព័ន្ធមួយ តំណាងពាណិជ្ជកម្មអាមេរិក លោក ជេមីសុន ហ្គ្រេរ ក៏បាននិយាយនៅថ្ងៃទី ២៦ ខែតុលាផងដែរថា ថ្ងៃទីពីរនៃការចរចារវាងមន្ត្រីអាមេរិក និងចិនអាចបើកផ្លូវសម្រាប់ «កិច្ចប្រជុំប្រកបដោយផលិតភាព» រវាងមេដឹកនាំប្រទេសទាំងពីរ។
លោក ហ្គ្រេរ និងរដ្ឋមន្ត្រីក្រសួងហិរញ្ញវត្ថុ លោក ស្កុត ប៊ែសសិន បានជួបជាមួយឧបនាយករដ្ឋមន្ត្រីចិន លោក ហេ លីហ្វេង និងអ្នកចរចាពាណិជ្ជកម្មកំពូលចិន លោក លី ឆេងហ្គាង នៅខាងក្រៅកិច្ចប្រជុំកំពូលអាស៊ានលើកទី ៤៧ និងកិច្ចប្រជុំកំពូលពាក់ព័ន្ធនៅប្រទេសម៉ាឡេស៊ី។ នេះជាការពិភាក្សាទល់មុខគ្នាលើកទីប្រាំចាប់តាំងពីខែឧសភា ដែលធ្វើឡើងខណៈដែលភាគីទាំងពីរស្វែងរកការបន្ធូរបន្ថយភាពតានតឹងពាណិជ្ជកម្ម។
មន្ត្រីសេដ្ឋកិច្ចកំពូលមកពីសហរដ្ឋអាមេរិក និងចិនបានបញ្ចប់ការចរចានៅថ្ងៃដំបូងនៅរដ្ឋធានីគូឡាឡាំពួរនៅថ្ងៃទី ២៥ ខែតុលា ដោយអ្នកនាំពាក្យក្រសួងហិរញ្ញវត្ថុអាមេរិកបានពិពណ៌នាអំពីការចរចានេះថា «មានលក្ខណៈស្ថាបនាខ្លាំង»៕

រូបថត​: TTXVN