ភ្នំពេញ: អ្នកនាំពាក្យអយ្យការអមសាលាដំបូងរាជធានីភ្នំពេញ លោក លី សុផាណា បញ្ជាក់ថា តុលាការសាកសួរលោកស្រី ទេព វន្នី តំណាងសហគមន៍បឹងកក់ នៅព្រឹកថ្ងៃទី៨ ខែកញ្ញា ឆ្នាំ២០១៦ ផ្តោតលើករណីហិង្សាមានស្ថានទម្ងន់ក្បែរវិមានឯករាជ្យ ។

លោក សុផាណា បញ្ជាក់តាមប្រព័ន្ធសង្គម Telegram ថា ” លោក នូ វាសនា ចៅក្រមស៊ើបសួរ បានសាកសួរបន្ថែមទៅលើជនត្រូវចោទឈ្មោះ ទេព វន្នី ពីបទ ហិង្សាដោយចេតនាមានស្ថានទម្ងន់ទោស ប្រព្រឹត្តនៅក្បែរវិមានឯករាជ្យ សង្កាត់ ទន្លេបាសាក់ ខណ្ឌ ដូនពេញ រាជធានីភ្នំពេញ កាលពីថ្ងៃទី ១៣ ខែ មិនា ឆ្នាំ ២០១៣ តាមមាត្រា ២១៨ នៃក្រមព្រហ្មទណ្ឌ នៅក្នុងសំណុំរឿងព្រហ្មទណ្ឌលេខ ៩៥៦ ចុះថ្ងៃទី ២៦ មិនា ២០១៣ ” ។

ស្របជាមួយគ្នានេះ សកម្មជនបឹងកក់ជាង២០នាក់ ក៏កំពុងប្រមូលផ្ដុំមុខតុលាការ ទាមទារឲ្យដោះលែងលោកស្រី ទេព វន្នី ផងដែរ ។

ការសាកសួរនេះ ត្រូវបានធ្វើឡើងជាអសាធាណៈ ខណៈអ្នកសារព័ត៌មានជាច្រើនស្ថាប័ន ពុំបានអនុញ្ញាតឲ្យចូលក្នុងបរិវេណតុលាការ ឡើយ ពោលគឺឈរនៅក្រៅរបងតុលាការទាំងអស់ ៕

ដោយចេស្តា