ព្យុះសង្ឃរា Melissa បានបោកបក់ឆ្លងកាត់ប្រទេស Jamaica និងប្រទេសដទៃទៀតនៅតំបន់ការ៉ាប៊ី ជាមួយនឹងល្បឿនខ្យល់លើសពី 290 គីឡូម៉ែត្រក្នុងមួយម៉ោង ដែលធ្វើឲ្យតំបន់ជាច្រើនស្ទើរតែរាប់ស្មើដល់ដី ។

សហគមន៍នានានៅទូទាំងតំបន់ការ៉ាប៊ីនកំពុងប្រឈមមុខនឹងផលវិបាកធ្ងន់ធ្ងរ បន្ទាប់ពីព្យុះ Melissa ដែលជាព្យុះសង្ឃរាខ្លាំងបំផុតរបស់ពិភពលោកនៅឆ្នាំនេះ បានបោកបក់ឆ្លងកាត់ប្រទេស ចាម៉ៃកា គុយបា និងកោះ Hispaniola រួមទាំងប្រទេសហៃទី និងសាធារណរដ្ឋដូមីនីកែនផងដែរ។
មន្ត្រីបាននិយាយថា ការវាយតម្លៃការខូចខាតមិនទាន់បានបញ្ចប់នៅឡើយទេ ប៉ុន្តែរូបភាពផ្កាយរណបបានបង្ហាញពីការខូចខាតដ៏គួរឱ្យភ័យខ្លាចមួយចំនួនដែលព្យុះ Melissa បានបន្សល់ទុកតាមបណ្តោយឆ្នេរសមុទ្រប្រទេសចាមៃការ។ រូបភាពពីលើអាកាសបានបង្ហាញពីទីក្រុងឆ្នេរសមុទ្រពីរគឺ White House និង Black River នៅភាគនិរតីនៃប្រទេស ដែលធ្លាប់ជាភូមិនេសាទដ៏មមាញឹក ឥឡូវនេះបានក្លាយទៅជាភក់ និងកម្ទេចកម្ទី។
ព្យុះ Melissa បានបោកបក់ចូលប្រទេសចាមៃកា នៅថ្ងៃទី 28 ខែតុលា ជាព្យុះធំប្រភេទទី 5 លើមាត្រដ្ឋាន Saffir-Simpson និងជាព្យុះដ៏ខ្លាំងក្លាបំផុតដែលមិនធ្លាប់មានក្នុងប្រវត្តិសាស្ត្ររបស់ប្រទេសកោះនេះ។ វាគឺជាព្យុះដ៏ខ្លាំងក្លាបំផុតមួយក្នុងចំណោមព្យុះដ៏ខ្លាំងក្លាបំផុតដែលមិនធ្លាប់មានក្នុងមហាសមុទ្រអាត្លង់ទិក និងជាព្យុះដ៏ខ្លាំងក្លាបំផុតនៅលើផែនដីនៅឆ្នាំនេះ។ ខ្យល់បានឡើងដល់ល្បឿនជាង 290 គីឡូម៉ែត្រក្នុងមួយម៉ោង (180 ម៉ាយក្នុងមួយម៉ោង) នៅពេលដែលវាបានបោកបក់កាត់តាម New Hope នៅភាគនិរតីនៃប្រទេសចាមៃកា ដែលលើសពីកម្រិត 250 គីឡូម៉ែត្រក្នុងមួយម៉ោងសម្រាប់ព្យុះសង្ឃរាប្រភេទទី 5។
យោងតាមមន្ត្រីមូលដ្ឋាន Desmond McKenzie យ៉ាងហោចណាស់មានមនុស្សបួននាក់នៅក្នុងប្រទេសចាមៃកាបានស្លាប់។ មនុស្សជាង 25,000 នាក់នៅតែស្ថិតនៅក្នុងមជ្ឈមណ្ឌលជម្លៀស ខណៈដែល 77% នៃតំបន់នេះគ្មានអគ្គិសនីប្រើប្រាស់។ តំបន់ខ្លះគ្មានការទំនាក់ទំនងទាំងស្រុង ដែលធ្វើឱ្យពិបាកក្នុងការវាយតម្លៃការខូចខាត។
ភាពវឹកវរបានរីករាលដាលនៅពេលដែលមនុស្សចេញពីជម្រកដើម្បីឃើញផ្ទះរបស់ពួកគេត្រូវបានបំផ្លាញ ផ្លូវថ្នល់ត្រូវបានគ្របដណ្ដប់ដោយភក់ កំទេចកំទី និងខ្សែភ្លើងដែលដាច់។ វីដេអូពីលើអាកាសដែលបង្ហោះដោយនាយករដ្ឋមន្ត្រី Andrew Holness បានបង្ហាញផ្នែកខាងលិចនៃកោះនេះជាសមរភូមិ។
“ខ្ញុំមិនដែលឃើញអ្វីដែលគួរឱ្យរន្ធត់បែបនេះទេ” បុគ្គលិកម្នាក់នៅមន្ទីរពេទ្យ Black River បានប្រាប់នាយករដ្ឋមន្ត្រីនៅពេលដែលលោកបានទៅទស្សនា។ ពួកគេបាននិយាយថាក្នុងអំឡុងពេលព្យុះ អគ្គិសនីត្រូវបានកាត់ផ្តាច់ទាំងស្រុង គ្រូពេទ្យត្រូវប្រើពិល និងចង្កៀងប្រេងកាតដើម្បីថែទាំអ្នកជំងឺ ខណៈពេលដែលកញ្ចក់បែក និងវត្ថុផ្សេងៗបានហោះទៅគ្រប់ទីកន្លែង៕

រូបថត​: Reuters