ភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភា បានថ្លែងថា កម្ពុជាសុំតែសេចក្តីសុខ និងមិនត្រូវការឈ្លានពានប្រទេសណានោះទេ តែបែរជាថៃចោទប្រកាន់មកលើកម្ពុជាថាយកដីគេ នេះជាការចោទប្រកាន់មួយដែលមិនមែនជាការពិត ព្រោះអតីតកាល គឺកម្ពុជាបានបាត់បង់អស់ច្រើនទៅហើយ ទើបចង់ការពារអ្វីដែលមានស្រាប់តែប៉ុណ្ណោះ។ អ្វីដែលអតីតកាលបានបន្សល់ទុកដោយមានក្បួនខ្នាតត្រឹមត្រូវអំពីអធិបតេយ្យទឹកដីកម្ពុជា គឺកម្ពុជារក្សាតែប៉ុណ្ណឹង មិនត្រូវការពង្រីកទឹកដីបន្ថែមនោះទេ។
សម្ដេចតេជោ ហ៊ុន សែន បានថ្លែងដូចនេះ នៅថ្ងៃទី១៧ ខែវិច្ឆិកា ឆ្នាំ២០២៥ ក្នុងឱកាសអញ្ជើញជាព្រះរាជតំណាងព្រះមហាក្សត្រ បើកអនុសំវច្ចរមហាសន្និបាតមន្ដ្រីសង្ឃទូទាំងប្រទេសលើកទី៣៣។
សម្តេចតេជោ ហ៊ុន សែន បានថ្លែងបន្តថា ពាក់ព័ន្ធនឹងទឹកដីនេះ គឺមានក្រុមជ្រុលនិយមមួយចំនួនបានស្រែកពីក្រៅប្រទេសថា ឱ្យរាជរដ្ឋាភិបាលទៅវាយដណ្តើមយកកោះត្រល់ ទៅវាយយកកម្ពុជាក្រោម និងអ្នកខ្លះចង់ឱ្យទៅវាយដណ្តើមយកតាមបណ្តាខេត្តនៅឯប្រទេសថៃ និងចង់ឱ្យទៅវាយយកទឹកដីពីប្រទេសឡាវមកវិញទៀត។
សម្តេចតេជោ ហ៊ុន សែន បានថ្លែងបញ្ជាក់ថា អ្វីដែលជាសេចក្តីត្រូវការរបស់រាជរដ្ឋាភិបាលកម្ពុជា គឺការពារជាតិរបស់យើងឱ្យខានតែបាន និងមិនធ្វើការដោះដូរទឹកដីជាមួយសន្តិភាពជាដាច់ខាត៕
ដោយ ៖ សិលា
