ភ្នំពេញ៖ អាជ្ញាធរអគ្គិសនីកម្ពុជា និងអគ្គិសនីកម្ពុជា បានកម្ពុជា បានដាក់ផែនការពង្រាយទីតាំងស្ថានីយបញ្ចូលថាមពលយានយន្តអគ្គិសនី រាប់រយនៅទូទាំងប្រទេស ដែលយ៉ាងយូរនៅដើមឆ្នាំ២០២៦ខាងមុខឆាប់ៗនេះ ខណៈនិន្នាការនៃការប្រើប្រាស់យានយន្តអគ្គិសនីនៅកម្ពុជា កើនឡើងខ្លាំងគួរឱ្យកត់សម្គាល់ ក្រសួងរ៉ែ និងថាមពល។
បើតាមប្រធានអាជ្ញាធរអគ្គិសនីកម្ពុជា លោក យឹម វិសិដ្ឋ បានឱ្យដឹងថា នៅចុងឆ្នាំ២០២៥នេះ ឬយ៉ាងយូរបំផុតនៅខែមករា ឆ្នាំ២០២៦ អគ្គិសនីកម្ពុជានឹងដាក់បន្ថែមទីតាំងស្ថានីយបញ្ចូលថាមពលយានយន្តអគ្គិសនីចំនួន ៣០ស្ថានីយទៀតទាំងនៅរាជធានីភ្នំពេញ និងនៅតាមបណ្តាខេត្ត ដោយក្នុងមួយខេត្តយ៉ាងហោចណាស់ នឹងមានមួយទីតាំង។ ហើយដើមនៅឆ្នាំ២០២៦ កម្ពុជានឹងមានស្ថានីយបញ្ចូលថាមពលយានយន្តអគ្គិសនី នៅទូទាំងប្រទេសក្នុងមួយខេត្តមាន២ ទៅ៣ កន្លែងយ៉ាងតិច។
លោក យឹម វិសិដ្ឋ បានកត់សម្គាល់ថា មកទល់ពេលនេះ មានស្ថាននីយមួយចំនួន មិនទាន់ស្របច្បាប់នោះទេ ដោយសារមិនទាន់មកសុំបានអាជ្ញាបណ្ណ ខណៈមកទល់ពេលនេះ អាជ្ញាធរទើបតែចេញអាជ្ញាបណ្ណដល់ក្រុមហ៊ុនបានចំនួន៤ ប៉ុណ្ណោះ។
លោកប្រធានអាជ្ញាធរអគ្គិសនីកម្ពុជារូបនេះ ក៏បានលើកទឹកចិត្តដល់ស្ថានីយបញ្ចូលថាមពលយានយន្តអគ្គិសនីទាំងអស់ ដែលមិនទាន់ស្របច្បាប់ ឱ្យមកសុំច្បាប់ទាំងអស់ ដើម្បីទទួលបានប្រយោជន៍ជាច្រើន ដែលធ្វើឱ្យអាជីវកម្មកាន់តែរីកចម្រើន។ អត្ថប្រយោជន៍ទាំងនោះមានដូចជា៖ ពួកគេនឹងទិញបានភ្លើងក្នុងតម្លៃទាប ជាងតម្លៃអ្នកប្រើប្រាស់។ ហើយលើសពីនេះ អាជ្ញាធរអគ្គិសនីកម្ពុជា មិនតម្រូវឱ្យមានការវិនិយោគលើត្រង់ស្វ័រ មិនមានប្រាក់កក់ និងមិនមានប្រាក់ភ្ជាប់ចរន្តឡើយ។
ដោយឡែកចំពោះតម្លៃនៃការសាកយានយន្តវិញ លោកបញ្ជាក់ មិនអាចអនុវត្តលើសពីអ្វីដែលអាជ្ញាធរបានកំណត់ឡើយ។ ក្នុងករណីដែលស្ថានីយដែលមានអាជ្ញាបណ្ណហើយអនុវត្តថ្លៃខុស នឹងត្រូវរងការពិន័យពីអាជ្ញាធរអគ្គិសនី ករណីខ្លះនឹងឈានទៅដល់ការដកអាជ្ញាបណ្ណ។ អាជ្ញាធរអគ្គិសនីកម្ពុជានឹងបន្តតាមដានជាប់ជានិច្ចតាមរយៈ អ៊ែប (App) ជាតិ ដែលអាជ្ញាធរដាក់ឱ្យប្រើប្រាស់ ដោយនៅលើអ៊ែបនេះបានកំណត់ថ្លៃយ៉ាងត្រឹមត្រូវ ប្រសិនបើស្ថានីយណា អនុវត្តខុសពីអ្វីដែលបានកំណត់ អាជ្ញាធរនឹងដឹងភ្លាម។
គួរជម្រាបជូនថា តម្លៃត្រូវបានអាជ្ញាធរអគ្គិសនីកម្ពុជា បានកំណត់ថា៖ ការបញ្ចូលថាមពលតាមចរន្តឆ្លាស់ (AC) តម្លៃ ១០៥០រៀល/kWh, ការបញ្ចូលថាមពលតាមចរន្តជាប់ (DC) ល្បឿនលឿន Fast Charge អានុភាពរហូតដល់ 250 kW តម្លៃ ១៣៥០រៀល/kWh និងការបញ្ចូលថាមពលតាមចរន្តជាប់(DC) ល្បឿនលឿនខ្លាំង Super-fast Charge អានុភាពលើសពី 250 kW ឡើង តម្លៃ១៤៥០រៀល//kWh។
ដោយឡែកយោងតាមក្រសួងសាធារណការ និងដឹកជញ្ជូនបានឱ្យដឹងថា គិតត្រឹមខែកញ្ញា ឆ្នាំ២០២៥ មានយានយន្តអគ្គិសនីចុះបញ្ជីសរុប ១០ ៥៦៨គ្រឿង ក្នុងនោះរថយន្តអគ្គិសនី ៧ ១៨៧គ្រឿង, ត្រីចក្រយានយន្តអគ្គិសនីចំនួន ៦៧១គ្រឿង និងម៉ូតូអគ្គិសនីចំនួន ២៧១០គ្រឿង៕ដោយ៖តារា
