ខេត្តបន្ទាយមានជ័យៈ គ្រោះថ្នាក់ចរាចរណ៍បាននិងកំពុងក្លាយទៅជាបញ្ហាដ៏ធំចំពោះអាយុជីវិតក៏ដូចជាការរងរបួសស្រាលធ្ងន់ ខូចខាតទ្រព្យសម្បត្តិប៉ះពាល់ដល់សុខភាពសាធារណៈ និងការអភិវឌ្ឍសេដ្ឋកិច្ចជាតិ។ ដើម្បីដោះស្រាយនូវបញ្ហានេះ រាជរដ្ឋាភិបាលបានដាក់ចេញនូវគោលនយោបាយជាតិស្ដីពីសុវត្ថិភាពចរាចរណ៍ផ្លូវគោកដែលជាត្រីវិស័យសម្រាប់កាត់បន្ថយគ្រោះថ្នាក់ចរាចរណ៍ ពិសេសកាត់បន្ថយ ចំនួនអ្នកស្លាប់និងរបួសដោយសារគ្រោះថ្នាក់ នាព្រឹកថ្ងៃទី ២៨ ខែវិច្ឆិកា ឆ្នាំ ២០២៥ នៅម្ដុំភ្លើងស្តុបក្នុងក្រុងសិរីសោភ័ណ ខេត្តបន្ទាយមានជ័យ។ ក្រុមមន្ត្រីចម្រុះរួមមាន មន្ត្រីនគរបាលចរាចរណ៍នៃស្នងការដ្ឋាននគរបាលខេត្ត មន្ត្រីមន្ទីរសាធារណការនិងដឹកជញ្ជូនខេត្ត និងក្រុមយុវជនសាខាកាកបាទក្រហមខេត្តបានរួបរួមសហការគ្នាចុះធ្វើការអប់រំផ្សព្វផ្សាយចែកជូនខិត្តប័ណ្ណ ស្ទីកចំណាំងប្លាត ចំពោះយានយន្ត ទោចក្រយានយន្តគ្រប់ប្រភេទ និងគោយន្តកន្ត្រៃ ជូនដល់បងប្អូនប្រជាពលរដ្ឋដែលកំពុងធ្វើចរាចរណ៍លើដងផ្លូវសាធារណ:។ គោលបំណងចូលរួមកាត់បន្ថយគ្រោះថ្នាក់ចរាចរណ៍ផ្លូវគោកឲ្យនៅកម្រិតទាប។
លោកស្រី ប៉ាង ច្រិប ដែលជាអនុប្រធានមន្ទីរសាធារណការនិងដឹកជញ្ជូនខេត្តឲ្យដឹងថា÷ ក្រុមការងារចម្រុះបានចុះសហការត្រួតពិនិត្យធ្វើការអប់រំផ្សព្វផ្សាយដល់បងប្អូនប្រជាពលរដ្ឋនៅក្នុងឱកាសនេះចង់ឲ្យបងប្អូនយល់ដឹងនិងចូលរួមគោរពច្បាប់ចរាចរណ៍ផ្លូវគោកដែលជាកត្តាចម្បងត្រូវបើកបរដោយប្រុងប្រយ័ត្ន អត់ធ្មត់ចេះអធ្យាស្រ័យគ្នាទៅវិញទៅមក មិនមានការប្រមាថលើការបើកបរដែលអាចមានគ្រោះថ្នាក់ដល់ខ្លួនឯងនិងអ្នកដទៃ។គួរបញ្ជាក់ផងដែរថា ក្នុងរយៈពេលមួយព្រឹកដែលក្រុមការងារចម្រុះបានចុះធ្វើការអប់រំផ្សព្វផ្សាយក្នុងឱកាសនេះគេសង្កេតឃើញថា បងប្អូនប្រជាពលរដ្ឋធ្វើដំណើរដោយទោចក្រយានយន្តពុំបានពាក់មួកសុវត្ថិភាពប្រមាណ ៦០%។ ដូចនេះឃើញថា មូលហេតុនិងកត្តាសំខាន់ៗនៃគ្រោះថ្នាក់ចរាចរណ៍គឺមាន៤ចំណុច ទី១- បណ្ដាលមកពីកំណើនទោចក្រយានយន្ត,ទី២-កត្តាមនុស្ស , ទី៣-កត្តាយានយន្តនិងទី៤-កត្តាផ្លូវថ្នល់។ ជាចុងក្រោយលោកស្រី ប៉ាង ច្រឹបក៏បានធ្វើការអំពាវនាវដល់បងប្អូនប្រជាពលរដ្ឋដែលធ្វើដំណើរតាមដងផ្លូវជិតឬឆ្ងាយក្តីអ្នកបើកបររថយន្តត្រូវដាក់ខ្សែក្រវាត់ អ្នកបើកបរទោចក្រយានយន្តត្រូវពាក់មួកសុវត្ថិភាពឲ្យបានគ្រប់គ្រប់ៗគ្នា៕ ដោយវណ្ណា
