សារព័ត៌មាន Reuters បានផ្សាយថាព្យុះស៊ីក្លូន Ditwah បានបោកបក់កាត់ប្រទេសស្រីលង្កា នៅថ្ងៃសុក្រកន្លងមកនេះ ដោយបន្សល់ទុកមនុស្សស្លាប់ចំនួន 69នាក់ និង 34នាក់ទៀតបាត់ខ្លួន។ អាជ្ញាធរបានព្រមានថា ភ្លៀងធ្លាក់ខ្លាំង និងខ្យល់បោកបក់ខ្លាំងត្រូវបានរំពឹងថានឹងបង្កឱ្យមានទឹកជំនន់ធ្ងន់ធ្ងរបន្ថែមទៀតក្នុងរយៈពេល១២ម៉ោងខាងមុខ។

មន្ត្រីបានបញ្ជាក់ថា ការស្លាប់ភាគច្រើនបណ្តាលមកពីការបាក់ដី។ ប្រជាជនជិត ៤៤,០០០នាក់បានរងផលប៉ះពាល់នៅទូទាំងប្រទេស ហើយមនុស្សជាច្រើនបានស្វែងរកទីជម្រកនៅតាមសាលារៀន។
ទីផ្សារហ៊ុនកូឡុំបូបានផ្អាកការជួញដូរមុនម៉ោង ហើយសាលារៀននិងសេវារថភ្លើងនៅតែបន្តផ្អាក។ កងកម្លាំងយោធានិងប៉ូលិសជាង២០,០០០នាក់ បានសម្របសម្រួលការជម្លៀសប្រជាជន រួមទាំងការជួយសង្គ្រោះតាមឧទ្ធម្ភាគចក្រសម្រាប់អ្នកដែលជាប់នៅលើស្ពាននិងដំបូលផ្ទះ។
ភ្លៀងធ្លាក់ខ្លាំងក៏បានរំខានដល់ប្រតិបត្តិការនៅអាកាសយានដ្ឋានអន្តរជាតិ Bandaranaike ដោយបង្ខំឱ្យជើងហោះហើរចំនួន ១៥ ត្រូវបង្វែរទៅកាន់អាកាសយានដ្ឋាននៅភាគខាងត្បូងប្រទេសឥណ្ឌា។ ទន្ទឹមនឹងនេះ ប្រទេសឥណ្ឌាបានផ្តល់ជំនួយស្បៀងអាហារ ៦.៥តោន ដើម្បីជួយដល់ស្រីលង្កា ខណៈដែលព្យុះនេះកំពុងធ្វើដំណើរឆ្ពោះទៅកាន់ភាគខាងត្បូងនៃប្រទេសឥណ្ឌា៕ ដោយធីរីណា

រូប​ថត​: VOV