ខេត្តព្រៃវែង ៖ លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ និងលោកស្រី កែ សួនសុភី ស សុខា បានអញ្ជើញជាអធិបតីដ៏ខ្ពង់ខ្ពស់ចូលរួមពិធីបុណ្យបញ្ចុះខណ្ឌសីមាព្រះវិហារថ្មី និងឆ្លងសមិទ្ធផលនានានៅវត្តកំចាយមារ ស្ថិតនៅឃុំក្រញូង ស្រុកកំចាយមារ ខេត្តព្រៃវែង នាព្រឹកថ្ងៃទី២៩ ខែវិច្ឆិកា ឆ្នាំ២០២៥។
ក្នុងឆ្នាំ២០២០ ដោយឧបដ្ឋានសាលាមានសភាពចាស់ទ្រុឌទ្រោម ទើបព្រះគ្រូចៅអធិការ អាចារ្យ គណៈកម្មការវត្ត បានផ្តួចផ្តើមនិងឯកភាពសាងសង់ឧបដ្ឋានសាលាថ្មី និងសមិទ្ធផលមួយចំនួនទៀត រួមមាន ក្លោងទ្វាររបងវត្ត និងវិច្ចកុដិ ដែលចំណាយថវិកាចំនួន ៣៩៩.៩៨២ដុល្លារ។ ថវិកាទាំងនោះ ក្រោមការឧបត្ថម្ភពីសម្ដេចក្រឡាហោម និងលោកជំទាវ និងសប្បុរសជន ជិត ឆ្ងាយ ព្រមទាំងបានរៀបចំពិធីបុណ្យឆ្លងដាក់ឱ្យប្រើប្រាស់កាលពីថ្ងៃទី១៥ ខែកុម្ភៈ ឆ្នាំ២០២៤ក្រោមអធិបតីភាពដ៏ខ្ពង់ខ្ពស់ សម្តេចក្រឡាហោមស ខេង ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា ។នេះបើតាមរបាយការណ៍របស់លោកប៊ិន ជីវ័ន្ត អភិបាលនៃគណៈអភិបាលស្រុកកំចាយមារ។
នៅក្នុងពិធីបុណ្យឆ្លងនោះ ដោយពិនិត្យឃើញថា ព្រះវិហារ ដែលកសាងតាំងពីឆ្នាំ១៩៩៣ មានភាពចាស់ទ្រោឌទ្រោមខ្លាំង សម្តេចក្រឡាហោម បានផ្តួចផ្តើមគំនិតក្នុងការកសាងជួសជុលជាថ្មី រួមទាំងសមិទ្ធិផលនានាដែលចាប់ផ្តើមសាងសង់កាលពីថ្ងៃទី១១ ខែវិច្ឆិកា ឆ្នាំ២០២៤ ដោយបានបញ្ចប់នៅថ្ងៃទី១១ ខែវិច្ឆិកា ឆ្នាំ២០២៥ប្រើប្រាស់រយៈពេលសាងសង់១ឆ្នាំគត់ ចំណាយថវិកាសរុប៤៤២.០៩៥ ដុល្លារ ដោយទទួលបានថវិកាសាងសង់ដោយ លោកនាយឧត្តមសេនីយ៍ ស ថេត និងលោកស្រី ស ស៊ីណា។
តាមអភិបាលស្រុកកំចាយមារ ពិធីបុណ្យបញ្ចុះខណ្ឌសីមា និងឆ្លងសមិទ្ធិផលដាក់ឲ្យប្រើប្រាស់ រួមមាន ១-ព្រះវិហារ ទំហំ (៧ម៉ែត្រ X ១៩ម៉ែត្រ) ចំណាយថវិកា២៦៨.៣៦៩ ដុល្លារ ២-ចម្លាក់ព្រះពុទ្ធរូប (ថ្មកែវ) ចំណាយថវិកា១៥.០០០ ដុល្លារ ៣-គំនូរក្នុងព្រះវិហារ ចំណាយថវិកា២៥.៧០០ ដុល្លារ ៤-ដងទង់ (មួយគូរ) ខាងមុខព្រះវិហារ ចំណាយថវិកា៣៥.០០០ ដុល្លារ ៥-ផ្លូវបេតុងចូលវត្ត និងជុំវិញព្រះវិហារ អមដោយសួនច្បារ ចំណាយថវិកា ៦៣.៣២៦ ដុល្លារ ៦-ចាក់សាបខាងមុខសាលាឆាន់ ចំណាយថវិកា៤.០០០ ដុល្លារ ៧-វិច្ឆកុដិ ១ខ្នង ៩បន្ទប់ ចំណាយថវិកា២៨.០០០ ដុល្លារ ៨-លាបថ្នាំអគារបណ្ណាល័យឡើងវិញ ចំណាយថវិកា២.៧០០ ដុល្លារ។
មានប្រសាសន៍សំណេះសំណាលនាឱកាសនោះ លោកអភិសន្តិបណ្ឌិត បានបញ្ជាក់ថា ក្រោមដំបូល នៃម្លប់សន្តិភាព ដែលជាមរតកដ៏ថ្លៃថ្លា នៃនយោបាយឈ្នះ-ឈ្នះរបស់សម្តេចតេជោ ហ៊ុន សែន អតីតនាយករដ្ឋមន្ត្រី និងក្រោមមាគ៌ាដឹកនាំប្រកបដោយដ៏ឈ្លាសវៃ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា វិស័យធម្មការនិងសាសនានៅកម្ពុជា មានការររីកចម្រើនគួរឱ្យកត់សម្គាល់ ទាំងបរិមាណនិងគុណភាព។ គិតមកដល់ឆ្នាំ២០២៥ នេះ វត្តអារាម ត្រូវបានកសាងឡើងជាបន្តបន្ទាប់នៅទូទាំងប្រទេស កើនឡើងរហូតដល់ជាង ៥ពាន់វត្ត និងមានព្រះសង្ឃសរុបជាង ៧ម៉ឺនអង្គ។
គួរបញ្ជាក់ថា ប្រជាពលរដ្ឋក្នុងស្រុកកំចាយមារ មានប្រពៃណីជំនឿគោរពព្រះពុទ្ធសាសនា ១០០%។ បច្ចុប្បន្នស្រុកមានវត្តចំនួន ៣៨ អាស្រម ចំនួន១, និងសាលាពុទ្ធិកៈសិក្សា ៤កន្លែង មានព្រះសង្ឃគង់នៅ ចំនួន ៣៣៨អង្គ ក្នុងនោះ ភិក្ខុចំនួន១២៣អង្គ និងសាមណេរចំនួន ២១៥អង្គ អាចារ្យចំនួន ១១៣នាក់ និងគណៈកម្មការ៣០៦នាក់ ដូនជី ២០នាក់ និងក្មេងវត្ត ចំនួន ២៦នាក់ ។ដោយឡែកក្នុងវត្តកំចាយមារ មានព្រះសង្ឃគង់នៅ និងសិក្សារៀនសូត្រ ចំនួន ១១អង្គ អាចារ្យ ៤នាក់ គណៈកម្មការ ៩នាក់៕
ដោយ ៖ សិលា
