ខេត្តកណ្តាល៖ ជនសង្ស័យជាមេក្លោងជួញដូរគ្រឿងញៀន៣នាក់ត្រូវបានសមត្ថកិច្ចនគរបាលស្រុកកណ្តាលស្ទឹងស្រាវជ្រាវបង្រ្កាបឃាត់ខ្លួន រួមជាមួយថ្នាំញៀនប្រភេទមេតំហ្វេតាមីនចំនួន៤កញ្ចប់ធំ ជញ្ជីងថ្លឹងគ្រឿងញៀន២គ្រឿង រថយន្តកាមរីបាឡែន១គ្រឿង និងវត្ថុតាងពាក់ព័ន្ធមួយចំនួនទៀត ដើម្បីកសាងសំណុំរឿងបញ្ជូនទៅកាន់សាលាដំបូងខេត្តកណ្តាលចាត់ការតាមនីតិវិធីច្បាប់ ។
ប្រតិបត្តិការបង្រ្កាបឃាត់ខ្លួនមេក្លោងជួញដូរគ្រឿងញៀនខាងលើនេះធ្វើឡើង កាលពីវេលាម៉ោង១៧និង៤០នាទី ថ្ងៃទី១១ ខែកញ្ញា ឆ្នាំ២០១៦ ស្ថិតក្នុងភូមិកំពង់តាឡុង ឃុំបឹងខ្យាងស្រុកកណ្តាលស្ទឹង ខេត្តកណ្តាល ។
ជនសង្ស័យទាំង៣នាក់នេះជាមុខសញ្ញាជួញដូរគ្រឿងញៀនដ៏សកម្ម ដែលត្រូវសមត្ថកិច្ចកំណត់និងតាមដាននាពេលកន្លងមក ។ លុះមកដល់ថ្ងៃទី១១ ខែកញ្ញា ឆ្នាំ២០១៦ សមត្ថកិច្ចនគរបាលទទួលបានព័ត៌មានថា ជនសង្ស័យទាំង៣នាក់នេះមានរក្សាទុកគ្រឿងញៀននៅជាប់ខ្លួន ដើម្បីធ្វើសកម្មភាពជួញដូរ ទើបសមត្ថកិច្ចដាក់កម្លាំងចាំឃ្លាំមើលរហូតឈានដល់ធ្វើការឃាត់ខ្លួនរួមជាមួយវត្ថុតាងពាក់ព័ន្ធ ដើម្បីកសាងសំណុំរឿងបញ្ជូនទៅកាន់សាលាដំបូងខេត្តកណ្តាលចាត់ការតាមនីតិវិធីច្បាប់ ៕
ដោយ៖ ស្អាងជ័យ
