ភ្នំពេញ៖ សមត្ថកិច្ចនគរព្រហ្មទណ្ឌខណ្ឌជ្រោយចង្វាឃាត់ខ្លួនជនសង្ស័យ៤នាក់ ពាក់ព័ន្ធករណីគ្រឿងញៀន និងរកឃើញថ្នាំញៀន២កញ្ចប់ ម៉ូតូ ២គ្រឿង កាលពីម៉ោង ៥ល្ងាច ថ្ងៃទី១១ ខែកញ្ញា ឆ្នាំ២០១៦ នៅភូមិ៣ ស្ថិតក្នុងសង្កាត់-ខណ្ឌជ្រោយចង្វា ។

ប្រភពពីសមត្ថកិច្ចបានឲ្យដឹងថា នៅល្ងាចថ្ងៃទី១១ ខែកញ្ញា ឆ្នាំ២០១៦ កម្លាំងសមត្ថកិច្ចព្រហ្មទណ្ឌខណ្ឌ បានល្បាតនៅក្នុងមូលដ្ឋាន ខណៈពេលដែលកំពុងជិះល្បាត ស្រាប់តែបានប្រទះ ឃើញជនសង្ស័យទាំងនោះ ហើយបានធ្វើការឃាត់ខ្លួនជាបន្តបន្ទាប់ និងរកឃើញថ្នាំញៀន ២កញ្ចប់ ជាប្រភេទម៉ាទឹកកក  និងម៉ូតូ២គ្រឿង ទី១ ម៉ាក ហុងដាឌ្រីសង់ សេ១២៥ ស៊េរី២០០៥ ពណ៌ខ្មៅ ពាក់ស្លាកលេខ ភ្នំពេញ 1J-6948 និងទី២ ម៉ាក ហុងដាឌ្រីសង់ សេ១២៥ ស៊េរី២០១១ ពណ៌ខ្មៅ ពាក់ស្លាកលេខ ភ្នំពេញ 1BS-9757 យកមកអធិការដ្ឋាននគរបាលខណ្ឌ ដើម្បីសាកសួរ ។

តាមការឆ្លើយសារភាពពីជនសង្ស័យទាំង៤នាក់ បាននិយាយប្រាប់ថា ពួកគេទាំង៤នាក់ បានទៅទិញថ្នាំនៅម្តុំរោងចក្រឆ្នាំង ស្ថិតនៅក្នុងសង្កាត់បឹងកក់២ ខណ្ឌទួលគោក ដោយពួកគេទិញក្នុងមួយកញ្ចប់តម្លៃ ១៥០០០រៀលទៅ ២៥០០០រៀល ដើម្បីយកទៅប្រើប្រាស់នៅឯស្រុករបស់ខ្លួន ។

បច្ចុប្បន្នជនសង្ស័យទាំង៤នាក់ រួមនឹងវត្ថុតាង កំពុងឃុំខ្លួនជាបណ្តោះអាសន្ននៅអធិការដ្ឋាននគរបាលខណ្ឌជ្រោយចង្វាដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការបន្តតាមនីតិវិធី ៕

ដោយ៖ ជ្រោយពេជ្រ