ភ្នំពេញ-មន្ត្រីអគ្គស្នងការដ្ឋាននគរបាលជាតិបានឲ្យដឹងនៅល្ងាចថ្ងៃទី 20 ខែធ្នូនេះថាដោយអនុវត្តនូវបទបញ្ជាយ៉ាងម៉ឺងម៉ាត់ពីនាយឧត្តមសេនីយ៍ស ថេត អគ្គស្នងការ នគរបាលជាតិ, កម្លាំងនាយកដ្ឋាននគរបាលព្រហ្មទណ្ឌ ដឹកនាំសហការបង្ក្រាប ករណីលួចមានស្ថានទម្ងន់ទោស (កាច់កម៉ូតូ) យ៉ាងសកម្ម ចាប់ខ្លួនជនដៃដល់ និងអ្នកទទួលផល សរុប៤នាក់។

សមត្ថកិច្ចបានឲ្យដឹងថា នៅថ្ងៃទី១៦ ខែធ្នូ ឆ្នាំ២០២៥ វេលាម៉ោង០៦៖៤៥នាទី មានករណី លួចមានស្ថានទម្ងន់ទោស នៅចំណុចភូមិស្វាយធំ សង្កាត់ក្រាំងអំពិល​ ក្រុងកំពត ខេត្តកំពត ដោយជនសង្ស័យ២នាក់ ភេទ ប្រុស បានធ្វើសកម្មភាពកាច់កម៉ូតូ០១គ្រឿងម៉ាកហុងដាឌ្រីម ពណ៌ខ្មៅ ឆ្នាំផលិត២០២២ ពាក់ផ្លាកលេខ កំពត 1T-7441។

ក្រោយពីទទួលបានព័ត៌មានខាងលើ ក្រោមការចង្អុល បង្ហាញពីអគ្គស្នងការរងទទួលផែន, ប្រធាននាយកដ្ឋានកណ្ដាលនគរបាលយុត្តិធម៌ និងលោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ, នាយកដ្ឋាននគរបាលព្រហ្មទណ្ឌ ដឹកនាំដោយលោកឧត្តមសេនីយ៍ត្រី ហ៊ុន មុន្នីរ័ត្ន, វរសេនីយ៍ឯក ឆាន់ គីមលី និងវរសេនីយ៍ឯក ហែម បូណា អនុប្រធាននាយកដ្ឋាន បានដឹកនាំសហការជាមួយស្នងការដ្ឋាននគរបាលខេត្តកំពត, ខេត្តកំពង់ស្ពឺ និងរាជធានីភ្នំពេញ ធ្វើការស្រាវជ្រាវតាមនីតិវិធី និងជំនាញ រហូតកំណត់បានអត្តសញ្ញាណ និងទីតាំងលាក់ខ្លួនរបស់ក្រុមជនសង្ស័យខាងលើ។

លុះនៅថ្ងៃទី១៩ ខែធ្នូ ឆ្នាំ២០២៥ វេលាម៉ោង ១៧និង ៣០នាទី កម្លាំងជំនាញបានដឹកនាំសហការដោយឃាត់ខ្លួនបានក្រុមជនសង្ស័យខាងលើជាបន្តបន្ទាប់ចំនួន ០៤នាក់រួមមាន៖

១-ឈ្មោះ ហ៊ុន សុវ៉ានដារ៉ា ភេទប្រុស អាយុ៣៥ឆ្នាំ ជនជាតិខ្មែរ ឃាត់ខ្លួនត្រង់ចំណុចភូមិចោមចៅ២ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ។
២-ឈ្មោះ សាំង រក្សា ភេទប្រុស អាយុ៣៨ឆ្នាំ ជនជាតិខ្មែរ ឃាត់ខ្លួនត្រង់ចំណុច ភូមិត្របែក ឃុំស្រង់ ស្រុកគងពិសី ខេត្តកំពង់ស្ពឺ ។
៣-ឈ្មោះ ម៉ាន់ វុទ្ធី ភេទប្រុស អាយុ៥៧ឆ្នាំ ជនជាតិខ្មែរ (ទទួលផលចោរកម្ម) ឃាត់ខ្លួនត្រង់ចំណុច ភូមិសាមគ្គី ឃុំអង្គ ស្រុកអង្គរបុរី ខេត្តតាកែវ ។
៤-ឈ្មោះ នៅ គួក ភេទប្រុស អាយុ៣៥ឆ្នាំ ជនជាតិខ្មែរ (ទទួលផលចោរកម្ម) ឃាត់ខ្លួនត្រង់ចំណុច ភូមិតាមូង ឃុំព្រៃផ្គាំ ស្រុកអង្គរបុរី ខេត្តតាកែវ ។

ដកហូតវត្ថុតាងរួមមាន៖
-ម៉ូតូម៉ាក ហុងដាឌ្រីម ១២៥ ពណ៌ខ្មៅ ចំនួន០៣គ្រឿង ។
-ឧបករណ៍សម្រាប់ធ្វើសកម្មភាពកាច់កម៉ូតូមួយចំនួន ។

បច្ចុប្បន្ន ជនសង្ស័យ និងវត្ថុតាង ខាងលើត្រូវបាននាយកដ្ឋាននគរបាលព្រហ្មទណ្ឌ ប្រគល់ជូនស្នងការដ្ឋាននគរបាលខេត្តកំពត អនុវត្តនីតិវិធីបន្ត៕