ទ្រព្យសម្បត្តិរបស់ លោក Wang Ning ប្រធាន និងជានាយកប្រតិបត្តិនៃក្រុមហ៊ុនផលិតប្រដាប់ក្មេងលេង Labubu Pop Mart International Groupបានធ្លាក់ចុះ 11.3 ពាន់លានដុល្លារអាមេរិកក្នុងរយៈពេល 4 ខែ ចំពេលមានការព្រួយបារម្ភអំពីប្រតិបត្តិការរយៈពេលវែងរបស់ក្រុមហ៊ុន។

បុរសវ័យ 38 ឆ្នាំរូបនេះឥឡូវនេះមានទ្រព្យសម្បត្តិ 16.2 ពាន់លានដុល្លារ ធ្លាក់ចុះ 41% ពីខែសីហា នៅពេលដែលគាត់មានទ្រព្យសម្បត្តិច្រើនជាង Jack Ma ដែលជាសហស្ថាបនិកក្រុមហ៊ុនពាណិជ្ជកម្មអេឡិចត្រូនិកយក្ស Alibaba នេះបើយោងតាមទស្សនាវដ្តី Forbes របស់សហរដ្ឋអាមេរិក។

ភាគហ៊ុនរបស់ Pop Mart ដែលបានចុះបញ្ជីនៅហុងកុងបានធ្លាក់ចុះ 40% មកនៅប្រហែល 200ដុល្លារហុងកុង (25.7ដុល្លារអាមេរិក) ក្នុងរយៈពេលនេះ។

នៅឆ្នាំខាងមុខអាចនាំមកនូវបញ្ហាប្រឈមសំខាន់ៗសម្រាប់ Pop Mart ដោយសារតែកំណើនប្រាក់ចំណូលត្រូវបានគេរំពឹងថានឹងថយចុះមកត្រឹមប្រហែល 30% បើធៀបនឹងការប៉ាន់ប្រមាណ 200% ក្នុងឆ្នាំ 2025 នេះបើយោងតាមលោក Jeff Zhang អ្នកវិភាគភាគហ៊ុនដែលមានមូលដ្ឋាននៅទីក្រុងហុងកុងនៅ Morningstar ។

នៅលើវេទិកាលក់បន្តរបស់ប្រទេសចិន Dewu តម្លៃប្រតិបត្តិការសម្រាប់ស៊េរី Labubu 4.0 ចុងក្រោយបំផុតបានធ្លាក់ចុះប្រហែល 30% មកនៅប្រហែល 115លុយចិន(16.3ដុល្លារអាមេរិក) ក្នុងមួយដុំចាប់តាំងពីការចេញផ្សាយរបស់ពួកគេនៅចុងខែសីហា។ តួលេខបង្ហាញពីការធ្លាក់ចុះ ដែលផ្ទុយពីការព្យាករមុនដោយនាយកប្រតិបត្តិ Pop Mart។

លោក Mark Tanner នាយកគ្រប់គ្រងក្រុមហ៊ុនស្រាវជ្រាវទីផ្សារ China Skinny មានមូលដ្ឋាននៅទីក្រុងសៀងហៃ បាននិយាយថា ហេតុផលមួយដើម្បីរំពឹងថានឹងមានកំណើនយឺតគឺយុទ្ធសាស្រ្តរបស់ Pop Mart ។

តុក្កតា Labubu ដែលប្រមូលបានដោយតារាល្បីៗ រួមមាន Rihanna, Kim Kardashian និង Lisa មកពីក្រុម K-pop Blackpink ធ្លាប់បានបង្កឱ្យមានការរងចាំទិញជាជួរយ៉ាងយូរនៅហាងនានាទូទាំងពិភពលោក ដោយអ្នកទិញទំនិញមួយចំនួនថែមទាំងវាយដណ្តើមគ្នាទិញផលិតផលដែលចេញលក់ដោយមានចំនួនកំណត់៕