ភ្នំពេញ៖ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានថ្លែងថា នៅក្នុងឆ្នាំ២០២៥នេះ កម្ពុជានឹងទទួលបានគម្រោងវិនិយោគប្រមាណ ៦៣០ គម្រោង មានទុនវិនិយោគជាង ១០ ពាន់លានដុល្លារអាម៉េរិក ដើម្បីរួមចំណែកដល់ការអភិវឌ្ឍនៅកម្ពុជា និងក៏ជាការបំបែកឯកកត្តកម្ម ជាបន្តបន្ទាប់ទៀតរបស់រាជរដ្ឋាភិបាល។
ថ្លែងនៅក្នុងសិក្ខាសាលាផ្សព្វ ផ្សាយរបាយការណ៍វាយតម្លៃលើការអនុវត្តផែនទីបង្ហាញផ្លូវ ការអភិវឌ្ឍវិស័យយានយន្ត និងអេឡិចត្រូនិចកម្ពុជាឆ្នាំ២០២៣-២០២៤ នៅថ្ងៃទី២៤ ខែធ្នូ ឆ្នាំ២០២៥នេះ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានថ្លែងបញ្ជាក់ថា ទាក់ទងនិងគម្រោងវិនិយោគ, ក្រុមប្រឹក្សាអភិវឌ្ឍន៍កម្ពុជាខិតខំប្រឹងប្រែងយ៉ាងខ្លាំង រួមជា មួយជាមួយស្ថាប័នពាក់ព័ន្ធនានា ក្នុងការទាក់ទាញអ្នកវិនិយោគមកបណ្តាក់ទុននៅកម្ពុជា ដែលបានកំពុងធ្វើឱ្យចំនួនវិនិយោគនៅក្នុង រយៈពេលប៉ុន្មានឆ្នាំចុងក្រោយនេះ បានកើនឡើងជាបន្តបន្ទាប់។
លោកឧបនាយករដ្ឋមន្ត្រី លើកឡើងបន្ថែមថា ជាក់ស្តែងនៅក្នុងឆ្នាំ២០២៣ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោង វិនិយោគដែលមានលក្ខណៈគ្រប់គ្រាន់មានចំនួន ២៦៨ គម្រោង, ឆ្នាំ២០២៤មានចំនួន ៤១៤គម្រោង។ ចំណែកនៅក្នុងឆ្នាំ ២០២៥ នេះ គិតត្រឹមថ្ងៃសុក្រសប្តាហ៍មុន ក្រុមប្រឹក្សាអភិវឌ្ឍន៍កម្ពុជាបានអនុម័ត មានចំនួន ៦២៦ គម្រោង និងនៅសល់រយៈពេលប៉ុន្មានថ្ងៃ ទៀតនេះ រំពឹងថា នឹងទទួលបានចំនួន ៤ គម្រោងបន្ថែមទៀត ដែលធ្វើឱ្យគម្រោងវិនិយោគសរុបនៅក្នុងបំណាច់ឆ្នាំ២០២៥ មានចំនួន ៦៣០ គម្រោង ដែលមានទុនវិនិយោគជាង ១០ ពាន់លានដុល្លារអាម៉េរិក និងបានបង្កើតការងារជាង ៤០ ម៉ឺនកន្លែង ដែលនេះគឺជា ប្រវត្តិសាស្រ្តរបស់ក្រុមប្រឹក្សាអភិវឌ្ឍន៍កម្ពុជា ដែលមិនធ្លាប់ទទួលនៅក្នុងរយៈពេល៣០ឆ្នាំកន្លងមកនេះ។
គួរជម្រាបជូនថា ជុំវិញគម្រោងវិនិយោគនេះ លោកឧបនាយករដ្ឋមន្ត្រី បានប្តេជ្ញាចិត្តខ្ពស់ក្នុងការទាក់ទាញវិនិយោគិនបរទេស និងការស្វែងរកទីផ្សារ ថ្មីៗបន្ថែមទៀតដូចជា នៅប្រទេសរុស្សីជាដើម និងការបន្តទាក់ទាញវិនិយោគិននៅសហភាពអឺរ៉ុប សហរដ្ឋអាម៉េរិក និងកាណាដា បន្ថែមទៀត ឱ្យមកបណ្តាក់ទុននៅកម្ពុជាកាន់តែច្រើន, ហើយឯកឧត្តមក៏រំពឹងថា នៅឆ្នាំ២០២៦ ខាងមុខ កម្ពុជានឹងទទួលបានភាព ជោគជ័យដ៏ត្រចះត្រចង់ នៃលំហូរវិនិយោគិនបរទេសចូលមកកម្ពុជា បង្កើតរោងចក្រផលិតសម្រាប់ទីផ្សារនាំចេញ និងបង្កើតការងារ៕
ដោយ៖តារា
