កីឡាករអន្តរជាតិអេហ្ស៊ីប Ramadan Sobhi ដែលបានជួយ Pyramids ឈ្នះជើងឯក CAF Champions League លើកដំបូងរបស់ពួកគេកាលពីរដូវកាលមុន និងធ្លាប់លេងក្នុងក្របខ័ណ្ឌអង់គ្លេស English Premier League ត្រូវបានកាត់ទោសឱ្យជាប់ពន្ធនាគាររយៈពេលមួយឆ្នាំ ពាក់ព័ន្ធនឹងករណីក្លែងបន្លំឯកសារសិក្សា។

Sobhi ត្រូវបានចាប់ខ្លួនក្នុងខែកក្កដា ពេលត្រឡប់មកពីប្រទេសទួរគី បន្ទាប់ពីមានការចោទប្រកាន់ថាបានក្លែងបន្លំឯកសារផ្លូវការ និងមានបុគ្គលម្នាក់ទៀតអង្គុយប្រឡងជំនួសគាត់នៅវិទ្យាស្ថានទេសចរណ៍ និងបដិសណ្ឋារកិច្ចឯកជនក្នុងខេត្ត Giza ភាគកណ្តាលនៃប្រទេសអេហ្ស៊ីប។

តុលាការឧក្រិដ្ឋកម្មរបស់ទីក្រុង Giza បានកាត់ទោស Sobhi អាយុ 28 ឆ្នាំកាលពីថ្ងៃអង្គារ និងជនជាប់ចោទទីពីរឱ្យជាប់គុករយៈពេល 1 ឆ្នាំ ដោយបានរួចផុតពីទោសសម្រាប់ជនទីបី និងបានកាត់ទោសកំបាំងមុខរយៈពេល 10 ឆ្នាំទៅឱ្យជនទី 4 ដែលជាអ្នករត់គេចខ្លួន។ មេធាវីរបស់ Sobhi មិនអាចទាក់ទងបានភ្លាមៗដើម្បីសុំការអត្ថាធិប្បាយបានទេ។

Sobhi ដែលបានលេង 37 ដងឱ្យជម្រើសជាតិអេហ្ស៊ីបបានចាប់ផ្តើមអាជីពរបស់គាត់នៅក្លឹប Al-Ahly មុនពេលផ្លាស់ទៅប្រទេសអង់គ្លេសក្នុងឆ្នាំ 2016 ជាកន្លែងដែលគាត់បានលេងឱ្យ Stoke City និង Huddersfield Town ។

Sobhi បានចូលរួមជាមួយ Pyramids ក្នុងឆ្នាំ 2020 ពី Huddersfield Town បន្ទាប់ពីខ្ចីជើងនៅ Al-Ahly ហើយបានដើរតួយ៉ាងសំខាន់ក្នុងការជួយ Pyramids ទទួលបានពានរង្វាន់ CAF Champions League លើកដំបូងរបស់ពួកគេ បន្ទាប់ពីយកឈ្នះ Mamelodi Sundowns នៅវគ្គផ្តាច់ព្រ័ត្រ៕