អ្នកផលិតឱសថគ្រោងនឹងដំឡើងតម្លៃលើថ្នាំម៉ាកយ៉ាងហោចណាស់ 350 មុខរួមទាំងវ៉ាក់សាំងប្រឆាំងនឹង COVID, RSV និងជំងឺរើម និងការព្យាបាលជំងឺមហារីក Ibrance   នៅសហរដ្ឋអាមេរិក ទោះបីជារដ្ឋបាល Trump ដាក់សម្ពាធលើពួកគេឱ្យកាត់បន្ថយក៏ដោយ នេះបើយោងតាមទិន្នន័យដែលផ្តល់ផ្តាច់មុខដោយក្រុមហ៊ុនស្រាវជ្រាវថែទាំសុខភាព 3 Axis Advisors ។

ចំនួននៃការកើនឡើងតម្លៃសម្រាប់ឆ្នាំ 2026 គឺកើនឡើងពីចំណុចដូចគ្នាកាលពីឆ្នាំមុន នៅពេលដែលអ្នកផលិតថ្នាំពេទ្យបានបង្ហាញផែនការសម្រាប់ការដំឡើងថ្លៃថ្នាំជាង 250 មុខ។ មធ្យមភាគនៃការដំឡើងតម្លៃនៅឆ្នាំនេះគឺប្រហែល 4% – ស្របតាមឆ្នាំ 2025។

នៅពេលជាមួយគ្នានេះអ្នកផលិតឱសថក៏មានគម្រោងកាត់បន្ថយតម្លៃបញ្ជីឱសថប្រហែលប្រាំបួនផងដែរ។ នោះរួមបញ្ចូលទាំងការកាត់បន្ថយច្រើនជាង 40% សម្រាប់ថ្នាំជំងឺទឹកនោមផ្អែម Boehringer Ingelheim Jardiance និងការព្យាបាលដែលពាក់ព័ន្ធចំនួនបី។

ថ្នាំម៉ាក Jardiance គឺស្ថិតក្នុងចំណោមឱសថទាំង 10 ដែលរដ្ឋាភិបាលសហរដ្ឋអាមេរិកបានចរចាតម្លៃទាបសម្រាប់កម្មវិធី Medicare សម្រាប់មនុស្សដែលមានអាយុចាប់ពី 65 ឆ្នាំឡើងទៅក្នុងឆ្នាំ 2026។ ក្រោមការចរចារនោះក្រុមហ៊ុន Boehringer និង Lilly បានកាត់បន្ថយតម្លៃ Jardiance ពីរភាគបី។ អ្នកជំងឺអាមេរិកបច្ចុប្បន្នចំណាយប្រាក់ច្រើនបំផុតសម្រាប់ថ្នាំតាមវេជ្ជបញ្ជា ជារឿយៗជិតបីដងច្រើនជាងនៅក្នុងប្រទេសអភិវឌ្ឍន៍ផ្សេងទៀត ហើយលោក Trump បាននិងកំពុងដាក់សម្ពាធឱ្យក្រុមហ៊ុនផលិតឱសថបញ្ចុះថ្លៃរបស់ពួកគេ។

ការកើនឡើងនៃឱសថចំនួន 350 បានកើតឡើងនៅពេលដែលលោក Trump បានធ្វើកិច្ចព្រមព្រៀងជាមួយអ្នកផលិតឱសថចំនួន 14 លើតម្លៃឱសថមួយចំនួនរបស់ពួកគេសម្រាប់កម្មវិធី Medicaid របស់រដ្ឋាភិបាលសម្រាប់ប្រជាជនអាមេរិកដែលមានចំណូលទាប និងសម្រាប់អ្នកបង់ប្រាក់ជាសាច់ប្រាក់។

Pfizer, Sanofi, Boehringer Ingelheim, Novartis និង GSKស្ថិតក្នុងចំណោមក្រុមហ៊ុនទាំងនោះ ហើយក៏មានគម្រោងដំឡើងថ្លៃថ្នាំមួយចំនួននៅថ្ងៃទី 1 ខែមករា៕