Alphabet បានឈានដល់តម្លៃទីផ្សារ 4 ទ្រីលានដុល្លារ ជាបណ្ដោះអាសន្ននៅថ្ងៃចន្ទ ខណៈការផ្តោតខ្លាំងឡើងវិញលើបច្ចេកវិទ្យាបញ្ញាសិប្បនិម្មិត (AI) របស់ក្រុមហ៊ុនមេ Google បានផ្លាស់ប្តូរយុទ្ធសាស្ត្ររបស់ខ្លួន និងជំរុញឲ្យក្រុមហ៊ុនត្រឡប់មកកាន់មុខជួរនៃការប្រកួតប្រជែងដ៏តានតឹងខ្ពស់ម្តងទៀត។

ជាសញ្ញាចុងក្រោយបង្ហាញថាកិច្ចខិតខំរបស់ខ្លួនកំពុងទទួលបានលទ្ធផលល្អ Alphabet បានប្រកាសថា ម៉ូឌែល AI ជំនាន់ថ្មីរបស់ Apple នឹងផ្អែកលើ Gemini របស់ Google តាមរយៈកិច្ចព្រមព្រៀងរយៈពេលច្រើនឆ្នាំ។

ភាគហ៊ុនថ្នាក់ A របស់ក្រុមហ៊ុន Alphabet បានកើនឡើងរហូតដល់ 1.7% ទៅដល់តម្លៃ 334.04 ដុល្លារ ដើម្បីបង្កើតកំណត់ត្រាថ្មីមួយ មុនពេលបោះបង់ចោលការកើនឡើងទាំងនោះវិញ។

របាយការណ៍មួយរបស់ Reuters នៅដើមឆ្នាំនេះបានឱ្យដឹងថា ក្រុមហ៊ុន Samsung Electronics  មានគម្រោងបង្កើនទ្វេដងក្នុងឆ្នាំនេះ ចំនួនឧបករណ៍ចល័តរបស់ពួកគេដែលមានមុខងារ AI ដោយប្រើបច្ចេកវិទ្យា Gemini។

Alphabet បានកើនលើស Apple ក្នុងការវាយតម្លៃទីផ្សារ (market capitalization) ជាលើកដំបូងចាប់តាំងពីឆ្នាំ 2019 កាលពីសប្ដាហ៍មុន ដោយក្លាយជាក្រុមហ៊ុនដែលមានតម្លៃខ្ពស់ទីពីរនៅលើពិភពលោក៕