OpenAI នឹងទិញសមត្ថភាពកុំព្យូទ័ររហូតដល់ 750 មេហ្គាវ៉ាត់ ក្នុងរយៈពេលបីឆ្នាំពីក្រុមហ៊ុនផលិតឈីប Cerebras ខណៈដែលក្រុមហ៊ុនបង្កើត ChatGPT កំពុងព្យាយាមវាយដណ្តើមតំណែងឈានមុខគេក្នុងការប្រកួតប្រជែងបច្ចេកវិទ្យា AI និងបំពេញតម្រូវការដែលកំពុងកើនឡើង។ ក្រុមហ៊ុនទាំងពីរបានប្រកាសកាលពីថ្ងៃពុធ។

តាមប្រភពដែលដឹងអំពីកិច្ចព្រមព្រៀងនេះ បានប្រាប់ថា កិច្ចព្រមព្រៀងមានតម្លៃលើសពី 10 ពាន់លានដុល្លារ ក្នុងអំឡុងពេលអនុវត្តកុងត្រា។ ក្រុមហ៊ុនបង្កើត ChatGPT គ្រោងនឹងប្រើប្រាស់ប្រព័ន្ធដែលបង្កើតដោយ Cerebras ដើម្បីផ្គត់ផ្គង់ថាមពលដល់ chatbot ដ៏ពេញនិយមរបស់ខ្លួន ដែលជាកិច្ចព្រមព្រៀងថ្មីបំផុតមួយក្នុងចំណោមកិច្ចព្រមព្រៀងតម្លៃរាប់ពាន់លានដុល្លារជាច្រើនដែល OpenAI បានចុះហត្ថលេខាកន្លងមក។

នាយកប្រតិបត្តិរបស់ Cerebras លោក Andrew Feldman បាននិយាយថា ក្រុមហ៊ុនទាំងពីរបានចាប់ផ្តើមការពិភាក្សាក្នុងខែសីហាឆ្នាំមុន បន្ទាប់ពី Cerebras បង្ហាញថា ម៉ូឌែលបើកចំហររបស់ OpenAI អាចដំណើរការបានមានប្រសិទ្ធភាពខ្ពស់ជាងលើឈីបរបស់ខ្លួន ប្រៀបធៀបនឹងលើ GPU ដែលប្រើពីមុន។ បន្ទាប់ពីការចរចារយៈពេលប៉ុន្មានខែ ក្រុមហ៊ុនទាំងពីរបានឈានដល់កិច្ចព្រមព្រៀង ដែល Cerebras នឹងលក់សេវាកម្មមេឃ (cloud services) ដែលបើកដំណើរការដោយឈីបរបស់ខ្លួនទៅឲ្យ OpenAI ជាពិសេសសម្រាប់ម៉ូឌែលវាយតម្លៃ (inference) និងគិតចេញ (reasoning) ដែលភាគច្រើនចំណាយពេល “គិត” មុនពេលបញ្ចេញចម្លើយ។

ជាផ្នែកមួយនៃកិច្ចសន្យា  Cerebras នឹងសង់ ឬជួលមជ្ឈមណ្ឌលទិន្នន័យដែលពោរពេញទៅដោយឈីបរបស់ខ្លួន ខណៈដែល OpenAI នឹងបង់ប្រាក់សម្រាប់ការប្រើសេវាកម្មមេឃរបស់ Cerebras ដើម្បីដំណើរការវាយតម្លៃសម្រាប់ផលិតផល AI របស់ពួកគេ។ សមត្ថភាពនេះនឹងត្រូវចាប់ផ្តើមប្រើប្រាស់ជាចំណែកៗចាប់ពីឥឡូវនេះរហូតដល់ឆ្នាំ 2028។

Cerebras ដែលបានបង្កើតនៅឆ្នាំ 2015 ត្រូវបានគេស្គាល់ក្នុងការផលិតវ៉េហ្វើរអេនជីន (wafer-scale engines) និងឈីបដែលរចនាឡើងដើម្បីបង្កើនល្បឿនបណ្តុះបណ្តាល និងវាយតម្លៃសម្រាប់ម៉ូដែល AI ធំៗ ដែលប្រកួតប្រជែងជាមួយផលិតផលពីក្រុមហ៊ុន Nvidia និងអ្នកផលិតឈីប AI ផ្សេងទៀត។ លោក សាម អាល់តមែន (Sam Altman) ប្រធានប្រតិបត្តិ OpenAI គឺជាអ្នកវិនិយោគដំបូងក្នុងក្រុមហ៊ុន Cerebras៕