ភ្នំពេញ៖ នៅថ្ងៃទី១៥ ខែមករា ឆ្នាំ២០២៦ ចៅក្រមបានសម្រេចចេញដីកាបង្គាប់ឱ្យឃុំខ្លួនជនត្រូវលោក លី គួង អាយុ ៥០ឆ្នាំ នៅពន្ធនាគាររាជធានីភ្នំពេញ PJ។

ជននេះត្រូវបានតំណាងអយ្យការចោទប្រកាន់ពីបទល្មើសរួមមាន៖ ការជ្រើសរើសដោយមិនស្របច្បាប់សម្រាប់កេងប្រវ័ញ្ច បទឆបោកមានស្ថានទម្ងន់ទោស ជាក្រុមមានការចាត់តាំង និងបទសម្អាតប្រាក់ ដែលបានប្រព្រឹត្តនៅក្នុងប្រទេសកម្ពុជា និងទីកន្លែងផ្សេងទៀត ចាប់តាំងពីឆ្នាំ២០១៩ រហូតមកដល់បច្ចុប្បន្ន បទល្មើសមានបញ្ញត្តិឱ្យផ្តន្ទាទោសតាមមាត្រា ៣៧៧ និងមាត្រា ៣៨០ នៃក្រមព្រហ្មទណ្ឌ និងមាត្រា ៣៨ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម។

តាមព័ត៌មាន, លោក លី គួង ដែលមានងារជា ឧកញ៉ាផងដែរ បានរកស៊ី និងកាងបទល្មើស Scams Online នេះយ៉ាងខ្លាំង និងជាច្រើនកន្លែងដែលអ្នកល្មមៗមិនសូវស្គាល់ និងលឺឈ្មោះនោះទេ។

សូម្បីតែនៅតំបន់ព្រែកចាក ដែលក្រុមបរទេសរត់ចេញយ៉ាងប្រសេចប្រសាចកាលពីយប់មិញ ក៏ម្នាក់នេះនៅពីក្រោយផងដែរ។

ចាំមើលតើជាប់ពាក់ព័ន្ធជាមួយនរណាខ្លះទៀត ដែលនៅកាងពីក្រោយ?  ។
សូមបញ្ជាក់ថា, នៅតំបន់ព្រែកចាក មានទីតាំងអនឡាញច្រើន ដែលគេបានរក្សាទុកបុគ្គលិក ជនជាតិខ្មែរ ជនជាតិចិន មិនឱ្យចេញក្រៅ ប៉ុន្តែទទួលបានប្រាក់ខែខ្ពស់ ។ កន្លងមក ពេលទទួលដំណឹងថាសមត្ថកិច្ចត្រៀមបង្ក្រាប ក្រុមមេបទល្បែងទាំងនេះ អាចដឹងផែនការមុន ថែមទាំងបានដឹកជញ្ជូនបុគ្គលិក ព្រមទាំងក្រុមជនជាតិចិន ទៅលេងនៅក្រុងបាវិត ៕

ដោយ សិលា