ភ្នំពេញ​៖​ នៅថ្ងៃទី​២៦​ ខែមករា​ ឆ្នាំ​២០២៦នេះ​ តម្លៃហាងឆេងមាស បានកើនឡើងដល់ ៦១៥០ដុល្លារក្នុងមួយតម្លឹង នៅលើទីផ្សារកម្ពុជា។​ បើទោះបីជាតម្លៃមាសកើនឡើងដល់ជាង ៦០០០ដុល្លារក្នុងមួយតម្លឹងក៏ដោយ ប៉ុន្តែនៅតាមបណ្តាហាងលក់មាសខ្លះមិនបានស្ងាត់នោះទេ ដោយនៅតែមានអ្នកទៅទិញមាសទុកលក់ចំណេញ ដោយពួកគេរំពឹងថា តម្លៃមាសនឹងបន្តកើនឡើងថែមទៀត ព្រោះស្ថានភាពពិភពលោកស្ថិតក្នុងភាពមិនល្អប្រសើរ។

បើតាមការលើកឡើងពីក្រុម​អាជីវករលក់មាសនៅតាមបណ្ដាផ្សារក្នុង​រាជធានី​ភ្នំពេញ​ បានឱ្យដឹងថា នៅព្រឹកថ្ងៃទី២៦​ មករានេះ សន្ទុះនៃអ្នកមកទិញមាសទុកបានកើនឡើងច្រើន សម្រាប់ទុកលក់ចំណេញ ដោយពួកគាត់រំពឹងថា តម្លៃមាសនឹងកើនឡើងថែមទៀតនៅពេលខាងមុខ។

អាជីវករ​ដដែល​ បន្តថា​៖«ថ្ងៃនេះអ្នកមកទិញច្រើន ប្រហែលភ្ញៀវដែលមកទិញមាសដុំច្រើនក្នុងអំឡុងពេលនេះ គាត់មើលហាងឆេងអន្តរជាតិ ដោយគាត់គិតថា អាចនឹងឡើងខ្ពស់ជាងនេះទៀត។ បើធៀបជាមួយនឹងកាលហាងឆេងឡើងដល់ ៥៩០ក្នុងមួយជី ភ្ញៀវបុកមកលក់ច្រើន តែពេលឡើងដល់ ៦០០ក្នុងមួយជីមិនសូវមានភ្ញៀវយកមកលក់ទេ ហើយម្សិលមិញឡើងដល់ ៦០៥ក្នុងមួយជីក៏អត់មានភ្ញៀវមកលក់ដែរ មានតែភ្ញៀវមកទិញ»។

ជាមួយគ្នានេះ ក្រុម​អាជីវករ​ខ្លះ​ ក៏​បានលេីកឡេីងថា​ ខណៈមាសឡើងដល់ជាង ៦០០០ដុល្លារក្នុងមួយតម្លឹង មានអ្នកយកមកលក់ច្រើន។ តែយ៉ាងណាក៏នៅតែមានអ្នកមកទិញគួរឱ្យកត់សម្គាល់ ដើម្បីទុកលក់ចំណេញនៅពេលខាងមុខ។

ដោយឡែក​អ្នកតាមដានតម្លៃហាងមាស នៅលើទីផ្សារអន្តរជាតិ លោក សុខ ហេង នាយកអភិវឌ្ឍន៍ធុរកិច្ច នៃក្រុមហ៊ុន GFGI បានឱ្យដឹងថា តម្លៃមាសក្នុងទីផ្សារ កំពុងស្ថិតក្នុងនិន្នាការកើនឡើង ដែលការកើនឡើងនេះ កើតឡើងគឺដោយសារវិនិយោគិនមានការបារម្ភពីអស្ថិរភាពសេដ្ឋកិច្ច និងនយោបាយសកល។

ជាមួយគ្នានេះ មានកត្តាផ្សេងៗដែលកំពុងមានឥទ្ធិពលលើមាសក្នុងពេលនេះ ដូចជា គោលនយោបាយរូបិយវត្ថុរបស់អាមេរិក (Fed)ដោយសារការរំពឹងទុកលើការកាត់បន្ថយអត្រាការប្រាក់ ដោយធនាគារកណ្តាលអាមេរិក ជាកត្តាជំរុញឱ្យតម្លៃមាសឡើងថ្លៃ។ នៅពេលអត្រាការប្រាក់ចុះថោក ប្រាក់ដុល្លារអាមេរិកចុះខ្សោយ ដែលធ្វើឱ្យមាសមានភាពទាក់ទាញជាងមុន។
ទន្ទឹមគ្នានេះ ភាពតានតឹងភូមិសាស្ត្រនយោបាយ ក៏ជាកត្តាដែលជះឥទ្ធិពលដល់ការកើនឡើងតម្លៃផងដែរ។ លោកបានពន្យល់ថា «ដូចដែលយើងបានពិភាក្សាពីមុន អស្ថិរភាពរវាង អាមេរិក-អ៊ីរ៉ង់ និងជម្លោះនៅមជ្ឈិមបូព៌ា បានជំរុញឱ្យវិនិយោគិនសម្រុកទិញមាសទុក ដើម្បីការពារហានិភ័យពីសង្គ្រាម»។

លោកបន្តថា កត្តាមួយទៀតគឺ អតិផរណាសកល។ បើទោះបីជាអតិផរណានៅប្រទេសមួយចំនួនមានការថយចុះ ប៉ុន្តែតម្លៃទំនិញប្រើប្រាស់នៅតែខ្ពស់ ដែលធ្វើឱ្យមាសត្រូវបានគេប្រើប្រាស់ជាឧបករណ៍សម្រាប់ការពារតម្លៃលុយ៕ ដោយ​៖តារា​