ជម្រៅព្រិលជាមធ្យមជាង ៣០ សង់ទីម៉ែត្របានគ្របដណ្តប់លើផ្ទៃដី ២១០០ គីឡូម៉ែត្រពីរដ្ឋ New England នៅភាគឦសានដល់រដ្ឋ Arkansas នៅភាគខាងត្បូង ដែលធ្វើឲ្យការដឹកជញ្ជូនជាប់គាំង និងលុបចោលជើងហោះហើរ។

នៅថ្ងៃទី ២៦ ខែមករា ចំនួនអ្នកស្លាប់ដោយសារព្យុះព្រិលដ៏ធំដែលបានគ្របដណ្តប់សហរដ្ឋអាមេរិកបានកើនឡើងដល់ ៣០ នាក់ ខណៈដែលគ្រួសាររាប់រយរាប់ពាន់គ្រួសារនៅតែគ្មានអគ្គិសនីប្រើប្រាស់ ក្រោមសីតុណ្ហភាពត្រជាក់។
សេវាអាកាសធាតុជាតិបានរាយការណ៍ថា តំបន់ភាគខាងជើងនៃទីក្រុង Pittsburgh រដ្ឋ Pennsylvania បានកត់ត្រាព្រិលរហូតដល់ ៥០ សង់ទីម៉ែត្រ និងប្រឈមមុខនឹងខ្យល់ត្រជាក់ ដែលធ្វើឲ្យសីតុណ្ហភាពធ្លាក់ចុះដល់ -៣១ អង្សាសេ នៅចុងថ្ងៃទី ២៦ ខែមករា និងដល់ថ្ងៃទី ២៧ ខែមករា។
រដ្ឋទាំង ៤៨ នៃសហរដ្ឋអាមេរិកត្រូវបានព្យាករណ៍ថានឹងកត់ត្រាសីតុណ្ហភាពជាមធ្យមទាបបំផុតរបស់ពួកគេចាប់តាំងពីខែមករា ឆ្នាំ២០១៤ មក គឺ -១២.៣ អង្សាសេ។
ជាពិសេស ទីភ្នាក់ងារអាកាសធាតុបានព្រមានថា ម៉ាស់ខ្យល់ត្រជាក់ពីតំបន់អាកទិកត្រូវបានគេរំពឹងថានឹងរក្សាសីតុណ្ហភាពត្រជាក់នៅក្នុងតំបន់ដែលគ្របដណ្តប់ដោយព្រិល និងទឹកកករួចហើយ ខណៈដែលព្យុះរដូវរងាមួយទៀតទំនងជានឹងវាយប្រហារនៅតំបន់មួយចំនួននៃឆ្នេរសមុទ្រភាគខាងកើតនៅចុងសប្តាហ៍នេះ។

អ្នកស្លាប់ជាច្រើនត្រូវបានគេរកឃើញនៅខាងក្រៅក្នុងអំឡុងពេលចុងសប្តាហ៍ដ៏ត្រជាក់។ ទន្ទឹមនឹងនេះ យោងតាមគេហទំព័រ poweroutage.com គិតត្រឹមល្ងាចថ្ងៃទី ២៦ ខែមករា មនុស្សជាង ៦៣០.០០០ នាក់នៅតែគ្មានអគ្គិសនីប្រើប្រាស់ ភាគច្រើននៅភាគខាងត្បូង ជាកន្លែងដែលភ្លៀងធ្លាក់ខ្លាំងនៅចុងសប្តាហ៍បានបណ្តាលឱ្យមែកឈើ និងខ្សែភ្លើងដាច់ ជាពិសេសនៅភាគខាងជើងរដ្ឋ Mississippi និងផ្នែកខ្លះនៃរដ្ឋ Tennessee។
យោងតាមគេហទំព័រតាមដានជើងហោះហើរ flightaware.com សហរដ្ឋអាមេរិកបានកត់ត្រាជើងហោះហើរជាង ១២.០០០ ដែលបានពន្យារពេល ឬលុបចោលទូទាំងប្រទេសនៅថ្ងៃទី ២៦ ខែមករា៕

រូប​ថត​: TTXVN