តារារ៉េប និងផលិតករជនជាតិអាមេរិក Snoop Dogg បាននិយាយថា គាត់ចង់ក្លាយជាដៃអ្នកក្នុងការជួយជំរុញ Swansea City ឱ្យត្រលប់ទៅលេងនៅ Premier League វិញបន្ទាប់ពីបានវិនិយោគនៅក្នុងក្លឹបនៅ Championshipមួយនេះ ។

Snoop Dogg បានក្លាយជាអ្នកវិនិយោគជាមួយក្រុម Swansea កាលពីខែកក្កដា រួមជាមួយនឹងខ្សែបម្រើសញ្ជាតិក្រូអាត Luka Modric ខណៈដែលស្ត្រីអ្នកជំនួញ និងបុគ្គលិកទូរទស្សន៍ Martha Stewart បានចូលរួមជាសហម្ចាស់ភាគតិចនៅក្នុងខែធ្នូ។

Swansea ស្ថិតក្នុងចំណាត់ថ្នាក់ទី 16 ក្នុងការប្រកួតជើងឯកលំដាប់ទីពីររបស់អង់គ្លេស ជាមួយនឹងការលេងច្រើនជាងពាក់កណ្តាលនៃរដូវកាល និងឆ្ងាយពីកន្លែងត្រូវឡើងទៅក្របខណ្ឌកំពូល ប៉ុន្តែតារារ៉េបអាមេរិកវ័យ 54 ឆ្នាំរូបនេះនៅតែជឿជាក់ថារដូវកាលនេះអាចផ្តល់នូវភាពវិជ្ជមានមួយចំនួន។

គាត់បាននិយាយថា “វាមានស្ថិរភាព ហើយទោះបីជា Swansea គឺជាគម្រោងរយៈពេលវែងក៏ដោយ ពួកយើងនៅតែសុបិន្តសម្រាប់រដូវកាលនេះ។យើងចង់នាំ Swansea ទៅ Premier League ហើយដើម្បីធ្វើដូច្នេះយើងនឹងត្រូវការលុយ – នោះគឺជាការពិតនៃការប្រកួតនាពេលបច្ចុប្បន្ននេះ”។

គាត់បានសរសើរអ្នកគាំទ្រក្រុមដោយនិយាយថាគាត់ចង់ចូលរួមជាមួយពួកគេ និងស្តាប់ទស្សនៈរបស់ពួកគេដើម្បីយល់កាន់តែច្បាស់អំពីក្លឹប៕