ថ្ងៃផុតកំណត់នៃទីផ្សារដោះដូរកីឡាករក្នុងរដូវរងានៅអង់គ្លេសហាក់ស្ងប់ស្ងាត់មិនធ្លាប់មានខណៈដែលកិច្ចព្រមព្រៀងចំនួនប្រាំពីរត្រូវបានបញ្ចប់កាលពីថ្ងៃចន្ទ។

Crystal Palace បានប្រកាសពីការចុះហត្ថលេខាលើខ្សែប្រយុទ្ធ Jorgen Strand Larsen ពី Wolves ក្នុងកិច្ចព្រមព្រៀងដែលមានតម្លៃរហូតដល់ 48 លានផោន។

មានកិច្ចព្រមព្រៀងចំនួន 5 បន្ថែមទៀតដែលត្រូវបានបញ្ជាក់បន្ទាប់ពីថ្ងៃផុតកំណត់ – ក្នុងចំណោមពួកគេនោះ ក្លឹប Sunderland បាននាំយកខ្សែបម្រើស្លាបអេក្វាឌ័រ Nilson Angulo ពី Anderlecht ក្នុងកិច្ចព្រមព្រៀងតម្លៃ 17.5 លានផោន ខណៈដែល Wolves បានចុះហត្ថលេខាលើខ្សែបម្រើ Angel Gomes ពី Marseille ក្នុងលក្ខខ័ណ្ឌខ្ចីជើង ហើយបានជំនួស Strand Larsen ជាមួយកីឡាករ Adam Armstrong ពីក្រុម Wolves ក្នុងតម្លៃ 7 លានផោន។

នោះបានធ្វើឱ្យការចំណាយសរុបនៅក្នុងក្របខ័ណ្ឌ Premier League ក្នុងអំឡុងពេលរដូវរងារហូតដល់ជាង 390 លានផោន។ Liverpool បានយល់ព្រមលើកិច្ចព្រមព្រៀងមួយនៅថ្ងៃផុតកំណត់ដើម្បីចុះហត្ថលេខាលើខ្សែការពារ Jeremy Jacquet ពី Rennes ប៉ុន្តែការផ្លាស់ប្តូរនោះ – និងការបង់ប្រាក់ចំនួន 60 លានផោន – នឹងកើតឡើងនៅរដូវក្តៅ។

 

ក្លឹបណាខ្លះចំណាយប្រាក់ច្រើនបំផុតក្នុងទីផ្សារផ្ទេររដូវរងា?

 

Manchester City គឺជាក្លឹបដែលចាយធំបំផុតក្នុងទីផ្សារផ្ទេររដូវរងានេះ ខណៈពួកគេចង់បង្កើនឱកាសប្រជែងពាន Premier League ជាមួយ Arsenal។

ពួកគេបានចុះហត្ថលេខានាំយកខ្សែប្រយុទ្ធ Antoine Semenyo ពី Bournemouth ក្នុងតម្លៃ 64 លានផោន កាលពីថ្ងៃទី ៩ ខែមករា ខណៈខ្សែការពារ Marc Guehi បានចូលរួមពី Crystal Palace ក្នុងតម្លៃ 20 លានផោន នៅថ្ងៃទី 16 ខែមករា។

Crystal Palace ក៏ជាក្លឹបចំណាយច្រើនក្នុងថ្ងៃចុងក្រោយនៃទីផ្សារផ្ទេរ ដោយការនាំយក Strand Larsen ធ្វើឲ្យការចំណាយសរុបក្នុងរដូវរងាឡើងដល់ 83 លានផោន បន្ទាប់ពីពួកគេបានចុះហត្ថលេខាជាមួយ Brennan Johnson ពី Tottenham ក្នុងតម្លៃ 35 លានផោន។

Aston Villa ដែលកំពុងឈរលេខ 3 គឺជាក្លឹបតែមួយផ្សេងទៀតក្នុងក្រុមកំពូលទាំងប្រាំមួយ ដែលបានចំណាយប្រាក់ក្នុងទីផ្សារផ្ទេររដូវរងា។ ពួកគេបានចំណាយ 18.25 លានផោន ដើម្បីនាំយកខ្សែប្រយុទ្ធ Tammy Abraham ត្រឡប់មកវិញពី Besiktas និង 10.5 លានផោន សម្រាប់ខ្សែបម្រើស្លាប Alysson ពី Gremio។

ក្រុមកំពូលតារាង Premier League គឺ Arsenal មិនបានធ្វើអាជីវកម្មណាមួយក្នុងទីផ្សារផ្ទេររដូវរងាទេ ខណៈ Manchester United, Chelsea និង Liverpool ដែលឈរលេខ 4 ទី 5 និងទី 6 តាមលំដាប់ ក៏ស្ងៀមស្ងាត់ដូចគ្នា។

ខណៈ Manchester City ចំណាយប្រាក់ដើម្បីបង្កើនកម្លាំងក្រុមសម្រាប់ការប្រជែងពាន នៅផ្នែកខាងក្រោមតារាង West Ham ក៏បានចំណាយប្រាក់យ៉ាងច្រើន ដើម្បីជៀសវាងការធ្លាក់ចុះទៅ Championship។

West Ham ដែលកំពុងឈរលេខទី 3រាប់ពីក្រោម និងមានគម្លាត 6 ពិន្ទុពីតំបន់សុវត្ថិភាព បានចំណាយប្រហែល 21.8 លានផោន លើខ្សែប្រយុទ្ធប្រេស៊ីល Pablo Felipe ពីក្លិប Gil Vicente និងប្រហែល 25 លានផោន លើខ្សែប្រយុទ្ធ Taty Castellanos ពី Lazio។

Tottenham ដែលឈរលេខ 14 បានចំណាយ 35 លានផោន ដើម្បីចុះហត្ថលេខាជាមួយខ្សែបម្រើ Conor Gallagher ពី Atletico Madrid ខណៈ Bournemouth បានប្រើប្រាក់មួយផ្នែកពីការលក់ Semenyo ដើម្បីនាំយកខ្សែប្រយុទ្ធវ័យក្មេង Rayan ពី Vasco da Gama ក្នុងតម្លៃ 24.7 លានផោន និងខ្សែបម្រើហុងគ្រី Alex Toth ពី Ferencvaros ក្នុងតម្លៃ 10.4 លានផោន។

 

ការចំណាយរបស់ Premier League ប្រៀបធៀបនឹងលីគអឺរ៉ុបផ្សេងទៀត

 

ទោះបីជាថ្ងៃចុងក្រោយនៃទីផ្សារផ្ទេររដូវរងាមានភាពស្ងៀមស្ងាត់ក៏ដោយ ក្លឹបនៅ Premier League នៅតែចំណាយប្រាក់សរុបច្រើនជាងគេលើសលប់ បើប្រៀបធៀបនឹងលីគធំៗផ្សេងទៀតនៅអឺរ៉ុប។

លីគដែលចំណាយច្រើនបន្ទាប់គឺ Serie A របស់អ៊ីតាលី ដោយក្លឹបក្នុងលីគនេះបានចំណាយប្រាក់ផ្ទេរកីឡាករសរុបចំនួន 205 លានផោន។

ក្លឹប Sassuolo គឺជាមួយក្នុងចំណោមក្លឹបអ៊ីតាលីដែលសកម្មខ្លាំងបំផុត ដោយបានចំណាយ 22 លានផោន ដើម្បីនាំយកកីឡាករ Ismael Koné និង Darryl Bakola ពីក្លឹប Marseille។

នៅប្រទេសអេស្ប៉ាញ ការធ្វើអាជីវកម្មក្នុង La Liga មានភាពស្ងៀមស្ងាត់ខ្លាំង ដោយការផ្ទេររបស់ Atletico Madrid ក្នុងតម្លៃ 30 លានផោន សម្រាប់ Ademola Lookman គឺច្រើនជាងការចំណាយសរុបរបស់ក្លឹបផ្សេងៗទាំងអស់ក្នុងលីគរួមគ្នា (20.3លានផោន)៕