ខ្សែការពារ Achraf Hakimi របស់ក្លឹប Paris St-Germain និយាយថា គាត់នឹងត្រូវប្រឈមមុខនឹងការកាត់ទោស បន្ទាប់ពីមានការចោទប្រកាន់ពីបទរំលោភសេពសន្ថវៈមកលើរូបគាត់។

 

ស្ត្រីម្នាក់បានចោទប្រកាន់ប្រធានក្រុមជម្រើសជាតិម៉ារ៉ុកពីបទរំលោភនាងនៅផ្ទះរបស់គាត់ក្នុងរដ្ឋធានីបារាំងក្នុងឆ្នាំ 2023 នៅពេលនាងមានអាយុ 24 ឆ្នាំ។ គាត់បានបដិសេធការចោទប្រកាន់នេះ។

 

ការិយាល័យរដ្ឋអាជ្ញាសាធារណៈនៅ Nanterre ភាគខាងលិចនៃទីក្រុងប៉ារីស បានចាប់ផ្តើមការស៊ើបអង្កេតបឋមនៅក្នុងខែមីនា ឆ្នាំ 2023 ។

 

Hakimi បានបង្ហោះលើបណ្ដាញសង្គម X ថា៖«សព្វថ្ងៃ មានការចោទប្រកាន់អំពើរំលោភតែម្តង គ្រប់គ្រាន់ដើម្បីបញ្ជូនទៅកាត់ក្ដី។ នេះគឺអយុត្តិធម៌ទាំងចំពោះអ្នកស្លូតត្រង់ និងចំពោះជនរងគ្រោះពិតប្រាកដ។ ខ្ញុំរង់ចាំការកាត់ក្ដីនេះដោយស្ងប់ស្ងាត់ ដើម្បីឲ្យសេចក្ដីពិតត្រូវបានបង្ហាញជាសាធារណៈ»។

 

មិនទាន់មានកាលបរិច្ឆេទកំណត់សម្រាប់ការកាត់ក្ដីនៅឡើយទេ។

មេធាវីរបស់ Hakimi បានបញ្ជាក់ថា «ការកាត់ក្ដីត្រូវបានបញ្ជាឲ្យធ្វើឡើង» ហើយលោកនឹងរង់ចាំការកាត់ក្ដីនេះដោយការប្តេជ្ញា ដើម្បីឲ្យយុត្តិធម៌ត្រូវបានអនុវត្ត។

 

សារព័ត៌មាន BBC Sport បានទាក់ទងការិយាល័យអយ្យការនៅ Nanterre សម្រាប់មតិយោបល់ ប៉ុន្តែមិនទាន់មានការឆ្លើយតប។

 

PSG នឹងទទួលស្វាគមន៍ក្រុម Monaco ក្នុងជើងទីពីរ នៃការប្រកួតវគ្គ Play-off ក្របខ័ណ្ឌ UEFA Champions League នៅថ្ងៃពុធ។

Hakimi ត្រូវបានដាក់ឈ្មោះក្នុងបញ្ជីកីឡាករដំបូងរបស់ PSG ដែលបានប្រកាសកាលពីសប្ដាហ៍មុន។

 

កីឡាករវ័យ 27 ឆ្នាំរូបនេះ កើតនៅអេស្ប៉ាញ ប៉ុន្តែតំណាងឲ្យប្រទេសម៉ារ៉ុក ហើយបានបង្ហាញខ្លួន 194 ប្រកួតឲ្យ PSG ដោយឈ្នះពាន Champions League និង Ligue 1 កាលពីរដូវកាលមុន។

 

ការលេងល្អរបស់គាត់បាននាំឱ្យគាត់ទទួលបានកិត្តិយសនៅក្នុងពិធីប្រគល់ពានរង្វាន់បាល់ទាត់ល្អបំផុតរបស់ FIFA ដែលធ្វើឡើងនៅទីក្រុងប៉ារីសកាលពីថ្ងៃចន្ទ ជាកន្លែងដែលគាត់ត្រូវបានគេដាក់ឈ្មោះនៅក្នុងក្រុមបាល់ទាត់ពិភពលោកប្រចាំឆ្នាំរបស់ Fifpro ។

 

ម៉ារ៉ុក នឹងត្រូវប៉ះជាមួយ ស្កុតឡែន ហៃទី និងប្រេស៊ីល ក្នុងព្រឹត្តិការណ៍ World Cup នៅសហរដ្ឋអាមេរិក ម៉ិកស៊ិក និងកាណាដា នៅរដូវក្តៅនេះ៕