Bayern Munich បានបំបាក់ក្រុមម្ចាស់ផ្ទះ St. Pauli 5-0 ក្នុងក្របខណ្ឌ Bundesliga កាលពីថ្ងៃសៅរ៍ ដើម្បីបង្កើតកំណត់ត្រាស៊ុតបញ្ចូលទីច្រើនជាងគេក្នុងមួយរដូវកាល ខណៈពេលដែលកំពុងបន្តការនាំមុខរបស់ពួកគេនៅលើកំពូលរហូតដល់ 12 ពិន្ទុជាមួយនឹងការប្រកួតនៅសល់តែចំនួន 5 ទៀតដែលត្រូវលេង។

 

Bayern នឹងធ្វើជាម្ចាស់ផ្ទះទទួល Real Madrid នៅសប្តាហ៍ក្រោយក្នុងការប្រកួត Champions League វគ្គ 1/4 ផ្តាច់ព្រ័ត្រជើងទី 2 របស់ពួកគេបន្ទាប់ពីការឈ្នះ 2-1 នៅក្នុងប្រទេសអេស្ប៉ាញ កំពុងតែជិតបានលើពានរង្វាន់កំពូលអាល្លឺម៉ង់ហើយដោយមាន 76 ពិន្ទុ ចំណែកក្រុមចំណាត់ថ្នាក់លេខពីរ Borussia Dortmund មាន 64 ពិន្ទុបន្ទាប់ពីចាញ់ 1-0 ក្រោមស្នាដៃក្រុម Bayer Leverkusen នៅក្នុងទឹកដីខ្លួនឯង។

 

ការតែតបាល់បញ្ចូលទីនៅនាទីទី 9 ពីកីឡាករ Jamal Musiala បានធ្វើឱ្យក្រុមភ្ញៀវតាមស្មើកំណត់ត្រាចាស់ 101 គ្រាប់ក្នុងមួយរដូវកាលដែលកំណត់ដោយ Bayern ខ្លួនឯងក្នុងយុទ្ធនាការ 1971-72 ។

 

វាជាការចាប់ផ្តើមស្វាគមន៍សម្រាប់ខ្សែបម្រើសញ្ជាតិអាឡឺម៉ង់ Musiala ដែលស្ថិតក្រោមសម្ពាធកាន់តែខ្លាំងក្នុងការទទួលបានការអនុវត្តការលេងឱ្យបានគ្រប់គ្រាន់ បន្ទាប់ពីអវត្តមានពីរបួសដ៏យូររបស់គាត់បន្ទាប់ពីបាក់ជើងកាលពីឆ្នាំមុន និងត្រៀមខ្លួនសម្រាប់ការប្រកួតបាល់ទាត់ពិភពលោក។

 

ក្រុមភ្ញៀវបានបន្ថែមពីរគ្រាប់ទៀតជាប់ៗគ្នាភ្លាមៗបន្ទាប់ពីការចាប់ផ្តើមឡើងវិញក្នុងតង់ទីពីរដោយ Leon Goretzka នៅនាទីទី 53 និង Michael Olise មួយនាទីក្រោយមកដើម្បីធ្វើឱ្យប្រាកដថាទទួលបានបីពិន្ទុ។

 

Nicolas Jackson រកបានគ្រាប់ទី 4 នៅនាទីទី 65 មុនពេល Raphael Guerreiro ស៊ុតបញ្ចូលទី 5-0 ពីរនាទីពីចុងបញ្ចប់ ដោយលោក Kompany បានសម្រាកកីឡាករជាច្រើននាក់ រួមទាំងខ្សែប្រយុទ្ធកំពូល Harry Kane ផងដែរ។

 

Bayern នៅតែស្ថិតក្នុងការប្រជែងដណ្តើមពានបី និងត្រូវជួបជាមួយ Leverkusen ក្នុងវគ្គពាក់កណ្តាលផ្តាច់ព្រ័ត្រ German Cup នៅថ្ងៃទី 22 ខែមេសា៕