អតីតព្រះចៅអធិការវត្តសៅលីនបានសារភាពកំហុស និងទទួលយកការកាត់ទោសដែលតុលាការចិនបានកាត់ទោស។

អតីតព្រះចៅអធិការវត្តចិនដ៏ល្បីល្បាញ ដែលត្រូវបានគេស្គាល់ថាជាកន្លែងកំណើតនៃក្បាច់គុនកុងហ្វូ ត្រូវបានកាត់ទោសឱ្យជាប់ពន្ធនាគារ 24 ឆ្នាំ និងពិន័យជាប្រាក់ចំនួន 3.5 លានយ័ន (ប្រហែលជាង 500,000 ដុល្លារអាមេរិក) ពីបទឧក្រិដ្ឋរួមទាំងការកិបកេង និងការសូកប៉ាន់ នេះបើយោងតាមប្រព័ន្ធផ្សព្វផ្សាយរដ្ឋចិនបានរាយការណ៍នៅថ្ងៃទី 30 ខែឧសភា។
លោក Shi Yongxin អាយុ 60 ឆ្នាំ ត្រូវបានកាត់ទោសនៅក្នុងខែមីនា ឆ្នាំនេះ បន្ទាប់ពីត្រូវបានស៊ើបអង្កេតចាប់តាំងពីខែកក្កដា ឆ្នាំមុន។
តុលាការមួយនៅខេត្ត Henan ភាគកណ្តាលប្រទេសចិន បានប្រកាសកាត់ទោសនេះ ដោយបញ្ជាក់ថា លោក Shi Yongxin បានរំលោភបំពានតួនាទីរបស់គាត់នៅវត្តសៅលីន ដើម្បីកិបកេងប្រាក់សាធារណៈ ទទួល និងផ្តល់សំណូកសរុបប្រហែល 300 លានយ័ន ក្នុងរយៈពេលជិតបីទសវត្សរ៍។
យោងតាមប្រព័ន្ធផ្សព្វផ្សាយរដ្ឋ លោក Shi Yongxin បានសារភាពកំហុស និងបានប្រកាសនៅក្នុងតុលាការថា លោកនឹងមិនប្តឹងឧទ្ធរណ៍ទេ។
«សកម្មភាពទាំងនេះបានបង្កផលវិបាកធ្ងន់ធ្ងរជាពិសេស និងប៉ះពាល់អវិជ្ជមានដល់សង្គម» CCTV បានដកស្រង់សម្តីរបស់តុលាការ។ CCTV បាននិយាយថា Shi Yongxin បានស្ម័គ្រចិត្តបង្ហាញព័ត៌មានលម្អិតដែលភ្នាក់ងារអនុវត្តច្បាប់មិនបានរកឃើញពីមុន ហើយបានសម្តែងការសោកស្តាយ។

កាលពីខែកក្កដា ឆ្នាំមុន វត្ត Shaolin បានប្រកាសថា ព្រះចៅអធិការរបស់ខ្លួនកំពុងស្ថិតនៅក្រោមការស៊ើបអង្កេតរួមគ្នាដោយភ្នាក់ងារជាច្រើន ដោយសង្ស័យថាបានប្រព្រឹត្តបទល្មើសព្រហ្មទណ្ឌ រួមទាំងការកិបកេងប្រាក់ និងការរំលោភលើគោលការណ៍ព្រះពុទ្ធសាសនា ដោយរក្សាទំនាក់ទំនងខុសច្បាប់ជាមួយស្ត្រីច្រើននាក់ក្នុងរយៈពេលយូរ។
ក្នុងអំឡុងពេលនៃការស៊ើបអង្កេត សមាគមពុទ្ធសាសនាចិនបានដកហូតវិញ្ញាបនបត្រព្រះសង្ឃរបស់ Shi Yongxin យ៉ាងឆាប់រហ័ស។ ដើម្បីឆ្លើយតបទៅនឹងសាលក្រម អង្គការនេះបានបញ្ជាក់នៅថ្ងៃទី 29 ខែឧសភាថា លោក «បាននាំមកនូវផលវិបាកមកលើខ្លួនលោក»។
Shi Yongxin ដែលមានឈ្មោះកំណើតថា Liu Yingcheng មុនពេលក្លាយជាព្រះសង្ឃនៅឆ្នាំ 1981 បានគ្រប់គ្រងវត្ត Shaolin ចាប់ពីឆ្នាំ 1987 ហើយបានក្លាយជាព្រះចៅអធិការនៅឆ្នាំ 1999៕

រូប​ថត​:AFP