ភ្នំពេញ៖ បើយោងតាមរបាយការណ៍របស់គ្រឹះស្ថានអង្គរចេញផ្សាយនៅថ្ងៃចន្ទទី ០១ ខែមិថុនា ឆ្នាំ២០២៦នេះ បានបង្ហាញថា កម្ពុជារកចំណូលបានជាង ១៧,២ លានដុល្លារ ពីការលក់សំបុត្រចូលទស្សនារមណីយដ្ឋានអង្គរនៅក្នុងរយៈពេល ៥ ខែ (មករា-ឧសភា) ២០២៦ ធ្លាក់ចុះជិត ៣០% ធៀបនឹងរយៈពេលដូចគ្នា នៅឆ្នាំ ២០២៥។
របាយការណ៍ដដែល បានបញ្ជាក់ថា គិតចាប់ពីខែមករា ដល់ខែឧសភា ២០២៦ ភ្ញៀវទេសចរអន្តរជាតិចំនួនជាង ៣៥ ម៉ឺននាក់ (៣៥៩ ៤៧១) បានទិញសំបុត្រចូលទស្សនារមណីយដ្ឋានអង្គរដែលនាំឱ្យកម្ពុជារកចំណូលបានជាង ១៧ ២០៤ ៣២២ ដុល្លារ ធ្លាក់ចុះ ២៩,៩៨%។
ប្រធានសមាគមមគ្គុទ្ទេសក៍អង្គរខេត្តសៀមរាប លោក ខៀវ ធី បានមានប្រសាសន៍ថា បញ្ហាសង្គ្រាមព្រំដែនកម្ពុជា-ថៃ និងការបារម្ភពីការឆបោកអនឡាញបានធ្វើឱ្យភ្ញៀវទេសចរចូលមកទស្សនាក្នុងខេត្តសៀមរាបធ្លាក់ចុះ។
ជាមួយគ្នានេះ ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATA) លោក ធួន ស៊ីណាន បានយល់ឃើញថា កម្ពុជារងសម្ពាធធ្ងន់ធ្ងរកាលពីឆ្នាំមុន បន្ទាប់ពីជំងឺកូវីដ១៩ ដោយសារការចោទប្រកាន់ពីការឆបោកអនឡាញ និងការឈ្លានពានពីប្រទេសថៃ។
បន្ថែមពីនេះ លោក ស៊ីណាន បានបន្តថា «ភូមិសាស្ត្រនយោបាយកំពុងកើតមានឡើងនៅលើពិភពលោក ពិភពលោក អ្វីក៏អាចកើតមានឡើងគ្រប់ពេលវេលា យើងអត់ដឹងថា តើថ្ងៃស្អែកមានអ្វីកើតឡើង»។
យោងតាមគ្រឹះស្ថានអង្គរ នៅឆ្នាំ ២០២៥ កម្ពុជារកចំណូលបានជិត ៤៥ លានដុល្លារ ពីការលក់សបុត្រចូលទស្សនារមណីយដ្ឋានអង្គរ ធ្លាក់ចុះ ៦,៥១% ប្រៀបធៀបនឹងឆ្នាំ ២០២៤៕ដោយ៖តារា
