ក្រុមជម្រើសជាតិអង់គ្លេសបានចាប់ផ្តើមយុទ្ធនាការ FIFA World Cup 2026 របស់ខ្លួនយ៉ាងជោគជ័យ បន្ទាប់ពីយកឈ្នះក្រូអាតក្នុងការប្រកួតដ៏ស្វិតស្វាញ និងពោរពេញដោយគ្រាប់បាល់នៅទីក្រុងដាឡាស។

ក្រុមរបស់លោក Thomas Tuchel បានបង្ហាញពីសមត្ថភាពវាយប្រហារដ៏គ្រោះថ្នាក់ ប៉ុន្តែក៏បង្ហាញពីចំណុចខ្សោយក្នុងតំបន់ការពារផងដែរ។ ទោះជាយ៉ាងណា កម្លាំងប្រយុទ្ធដ៏មុតស្រួចបានជួយឱ្យពួកគេយកឈ្នះក្រុមក្រូអាត និងដាក់មូលដ្ឋានរឹងមាំសម្រាប់ការប្រជែងក្នុងពូល L។

អង់គ្លេសបានបើកការនាំមុខនៅនាទីទី១២ តាមរយៈគ្រាប់បាល់ប៉េណាល់ទីរបស់ Harry Kane បន្ទាប់ពី Luka Modric បង្កកំហុសលើ Noni Madueke ក្នុងប្រអប់គ្រោះថ្នាក់។ អ្នកចាំទី Dominik Livakovic បានសង្គ្រោះការទាត់លើកដំបូង ប៉ុន្តែត្រូវបានអាជ្ញាកណ្តាលពិន័យដោយសារចាកចេញពីបន្ទាត់ទីមុនពេលបាល់ត្រូវបានទាត់ ធ្វើឱ្យ Kane មានឱកាសទាត់សារឡើងវិញ និងសម្រេចបានជោគជ័យ។

ក្រូអាតបានតាមស្មើវិញនៅនាទីទី៣៦ ដោយការស៊ុតយ៉ាងខ្លាំងរបស់ Martin Baturina ដែលបាល់ហោះចូលទី ទោះបីអ្នកចាំទី Jordan Pickford បានប៉ះបាល់ក៏ដោយ។

ប៉ុន្តែ Kane បានស្តារការនាំមុខឱ្យអង់គ្លេសវិញនៅនាទីទី៤២ ដោយការតែតបាល់បញ្ចូលទីយ៉ាងខ្លាំងពីបាល់ជ្រុងរបស់ Declan Rice។ គ្រាប់បាល់នេះបានធ្វើឱ្យ Kane តាមស្មើកំណត់ត្រា 10 គ្រាប់នៅ World Cup របស់ Gary Lineker និងជាគ្រាប់ទី 81 របស់គេក្នុងការបង្ហាញខ្លួន 115 ប្រកួតឱ្យអង់គ្លេស។

ទោះជាយ៉ាងណា ខ្សែការពារអង់គ្លេសនៅតែបង្កការព្រួយបារម្ភ ដោយក្រូអាតរកបានគ្រាប់បាល់តាមស្មើ 2-2 មុនបញ្ចប់តង់ទី១ ត្រឹមប៉ុន្មានវិនាទីប៉ុណ្ណោះ។ Petar Musa បានបញ្ជូនបាល់ចូលទី បន្ទាប់ពីការតែតរបស់ Ivan Perisic។

ចូលដល់តង់ទី២ Jude Bellingham បានបង្ហាញពីមូលហេតុដែលលោក Tuchel ជ្រើសរើសគេលេងជាជម្រើសដំបូងជំនួស Morgan Rogers ដោយរត់សម្រុកយ៉ាងខ្លាំង និងបញ្ចប់ទីយ៉ាងល្អ ដើម្បីជួយអង់គ្លេសនាំមុខសាជាថ្មី។

បន្ទាប់មក Marcus Rashford ដែលចូលលេងជាកីឡាករបម្រុង បានបន្ថែមគ្រាប់បាល់ទី៤ នៅចុងការប្រកួត ដើម្បីបញ្ចប់ក្តីបារម្ភ និងធានាជ័យជម្នះដ៏សំខាន់មួយសម្រាប់ក្រុមតោកំណាច។

ជាមួយនឹងជ័យជម្នះនេះ អង់គ្លេសបានចាប់ផ្តើម World Cup 2026 យ៉ាងល្អឥតខ្ចោះ ហើយនឹងបន្តជួបក្រុមជម្រើសជាតិ ហ្គាណានៅទីក្រុងបូស្តុន ក្នុងការប្រកួតបន្ទាប់៕