ភ្នំពេញ៖ យុវជនដែលជាកម្មកររោងចក្រកាត់ដេរម្នាក់ បានក្លាយទៅជាអ្នកទោសស្នេហា ក្រោយពីរូបគេស្គាល់ក្មេងស្រីអាយុ១៥ឆ្ឆ្នាំម្នាក់ទៀតដែលជាកម្មការិនីរោងចក្រជាមួយគ្នាទើបតែបាន២ថ្ងៃ ក៏លួងលោមសុំស្នេហា រហូតនាងបាក់ចិត្តស្រលាញ់ ។ បន្ទាប់មកអ្នកទាំង២អត់ទៅធ្វើការទេ ហើយយុវជននោះក៏ល្បួងនាងនាំទៅដេករួមភេទនៅក្នុងបន្ទប់ផ្ទះជួលរបស់ខ្លួនបានសម្រេច២ដង។ លុះថ្ងៃបន្ទាប់ខាងរោងចក្របញ្ឈប់ការងារនាង ហើយនាងបានព្យាយាមលាក់លៀមរឿងនេះមិនឲ្យម្ដាយរបស់នាងដឹងនោះទេ ។ ប៉ុន្តែក្រោយពេលបាត់កូនស្រី១យប់មិនឃើញចូលផ្ទះ ហើយបែរជាត្រូវរោងចក្របញ្ឈប់ការងារទៀតនោះ ម្ដាយក៏ជជីកសួរនាងតែមិនព្រមប្រាប់សោះ រហូតម្ដាយទ្រាំលែងបានក៏ដាច់ចិត្តវាយ ទើបនាងប្រាប់ការពិត ហើយម្ដាយក៏ប្ដឹងឲ្យនគរបាលឃាត់ខ្លួនយុវជននោះចាត់ការតាមច្បាប់តែម្ដង ។
ហេតុការណ៍ខាងលើបានកើតឡើងកាលពីថ្ងៃទី១៥ ខែមិថុនា ឆ្នាំ២០២៦ នៅចំណុចផ្ទះជួលបន្ទប់លេខ៤៩ ជាន់ទី២ ស្ថិតនៅក្នុងភូមិអង្គកែវ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
យុវជនខាងលើនោះឈ្មោះ សុខ ចាន់ថន អាយុ២៧ឆ្នាំ ជនជាតិខ្មែរ មុខរបរកម្មកររោងចក្រ ស្នាក់នៅបន្ទប់កើត ហេតុខាងលើ និងមានស្រុកកំណើតនៅខេត្តកំពង់ចាម ។ដោយឡែកក្មេងស្រីរងគ្រោះមានអាយុទើបតែ១៥ឆ្នាំប៉ុណ្ណោះ ស្នាក់ផ្ទះជួលស្ថិតនៅក្នុងខណ្ឌពោធិសែនជ័យ រាជធានីភ្នំពេញ ។
សមត្ថកិច្ចបានប្រាប់ឲ្យដឹងថា យុវជនសង្ស័យនិងក្មេងស្រីរងគ្រោះគឺជាកម្មករដេរស៊ីថ្ងៃជាមួយគ្នានៅក្នុងរោងចក្រកាត់ដេរសម្លៀកបំពាក់មួយកន្លែង ស្ថិតនៅតាមបណ្ដោយផ្លូវជាតិលេខ៤ ភូមិកន្ទោកជើង សង្កាត់កន្ទោក ខណ្ឌកំបូល រាជធានីភ្នំពេញ ។ ប៉ុន្តែអ្នកទាំង២ទើបតែស្គាល់គ្នាបាន២ថ្ងៃប៉ុណ្ណោះ ហើយយុវជននោះក៏បានទំនាក់ទំនងលួងលោមសុំស្នេហ៍ពីនាង រហូតនាងទន់ចិត្តព្រមស្រលាញ់ ។
សមត្ថកិច្ចបានប្រាប់ឲ្យដឹងបន្តទៀតថា លុះដល់ថ្ងៃកើតហេតុខាងលើ អ្នកទាំង២អត់បានទៅធ្វើការនោះទេ ដោយយុវជនរូបនោះបានល្បួងនាំនាងទៅកាន់បន្ទប់ជួលរបស់ខ្លួនរួចរួមភេទជាមួយគ្នាបានសម្រេច១ដង។ បន្ទាប់មកនៅថ្ងៃដដែលនោះ យុវជនខាងលើក៏បានជិះម៉ូតូដឹកនាងទៅដើរលេងនៅម្ដុំវត្តជន្លង់ម្លូ ស្ថិតនៅក្នុងភូមិព្រៃរងៀង សង្កាត់ភ្លើងឆេះរទេះ ខណ្ឌកំបូល ។ រហូតដល់វេលាល្ងាចថ្ងៃដដែល ទើបត្រឡប់ទៅកាន់បន្ទប់ជួលរបស់ខ្លួនវិញ ហើយបានល្បួងនាងឲ្យផឹកស្រាជាមួយគ្នារហូតដល់នាងស្រវឹង រួចក៏បានរួមភេទជាមួយគ្នាបានសម្រេច១ដងទៀតជាលើកទី២ ហើយបានឲ្យនាងបិទទូរស័ព្ទ និងលួងលោមឲ្យនាងដេកជាមួយគ្នានៅបន្ទប់ជួលរបស់ខ្លួន១យប់ ។
សមត្ថកិច្ចដដែលបញ្ជាក់ប្រាប់ថា យប់នោះក្នុងបន្ទប់ខាងលើដេកគ្នា៤នាក់រួមមានយុវជនសង្ស័យនិងក្មេងស្រីរងគ្រោះ ព្រមទាំងប្អូនបង្កើតនិងប្អូនថ្លៃរបស់យុវជនខាងលើ ហើយរហូតដល់វេលាព្រឹកថ្ងៃទី១៦ ខែមិថុនា ទើបយុវជននោះដឹកនាងទៅដាក់នៅរោងចក្រ ។ ខណៈ នោះស្រាប់តែខាងរោងចក្របានបញ្ឈប់ក្មេងស្រីរងគ្រោះពីការងារ ព្រោះតែខឹងនាងឈប់អត់ច្បាប់១ថ្ងៃ ដោយនាងរវល់លង់ស្នេហ៍យុវជនខាងលើ ហើយនាងក៏បានត្រលប់ទៅផ្ទះវិញ ។
សមត្ថកិច្ចបានប្រាប់ឲ្យដឹងបន្ថែមថា ពេលទៅដល់ផ្ទះ ម្ដាយរបស់នាងបានសួរដេញដោលរឿងនាងបាត់១យប់អត់ចូលផ្ទះហើយត្រូវរោងចក្របញ្ឈប់ទៀត ប៉ុន្តែទោះជាម្ដាយសួរយ៉ាងណាក៏នាងព្រមអត់ឆ្លើយដែរ រហូតធ្វើឲ្យម្ដាយទ្រាំលែងបាន ក៏វាយទើបនាងព្រមឆ្លើយប្រាប់ការពិត ។ ពេលនោះម្ដាយនាងទូរសព្ទទៅរកជនសង្ស័យដើម្បីដោះស្រាយគ្នាក្រៅប្រព័ន្ធច្បាប់ដែរ ប៉ុន្តែយុវជននោះអត់ព្រមទៅជួបដើម្បីដោះស្រាយគ្នាទេ ព្រមទាំងបានបិទទូរស័ព្ទ និងគេចខ្លួន ថែមទៀត ទើបម្ដាយក្មេងស្រីរងគ្រោះ សម្រេចទៅដាក់ពាក្យបណ្ដឹងនៅប៉ុស្តិ៍ចោមចៅទី៣តែម្ដង ។
នគរបាលបានប្រាប់ថា ក្រោយពេលទទួលបានបណ្ដឹងហើយនគរបាលក៏បានតាមចាប់ខ្លួនជននោះដល់រោងចក្រ ប៉ុន្តែខាងរោងចក្រប្រាប់ថារូបគេឈប់បាត់ហើយ បន្ទាប់មកនគរបាលបានតាមរកដល់បន្ទប់ជួលទៀត ហើយបានជួបតែប្អូនបង្កើតនិងប្អូនថ្លៃរបស់ជនសង្ស័យប៉ុណ្ណោះ ។
ពេលនោះនគរបាលបានពន្យល់ដល់ប្អូនអ្នកទាំង២ឲ្យជួយហៅបងប្រុសរបស់ខ្លួនចូលមកប៉ុស្តិ៍នគរបាល ទើបប្អូនបង្កើតនិងប្អូនថ្លៃទៅនាំខ្លួនបងប្រុសយកទៅប្រគល់ជូននគរបាលប៉ុស្តិ៍ចោមចៅទី៣ កាលពីវេលាយប់ថ្ងៃទី១៨ ខែមិថុនា ។ បន្ទាប់មកនគរបាលប៉ុស្តិ៍ចោមចៅទី៣ បានបញ្ជូនជននោះទៅកាន់អធិការដ្ឋាននគរបាលខណ្ឌពោធិ៍សែនជ័យ
ដើម្បីសាកសួរនិងកសាងសំណុំរឿងចាត់ការតាមច្បាប់ ៕
