ក្រុមជម្រើសជាតិអាមេរិកបានទទួលការគាំទ្រយ៉ាងកក់ក្តៅពីតារាល្បីៗជាច្រើន ក្នុងការប្រកួតដែលពួកគេយកឈ្នះក្រុមអូស្ត្រាលី 2-0 នៅព្រឹត្តិការណ៍ 2026 FIFA World Cup ទោះបីជាអវត្តមានកីឡាករឆ្នើម Christian Pulisic ដោយសាររបួសក៏ដោយ។

នៅកីឡដ្ឋាន Lumen Field ទីក្រុង Seattle តារាល្បីជាច្រើនបានបង្ហាញវត្តមានដើម្បីលើកទឹកចិត្តក្រុមម្ចាស់ផ្ទះរួម ដែលបានធានាកៅអីឡើងទៅវគ្គ 32 ក្រុមចុងក្រោយ។

ក្នុងចំណោមអ្នកលេចធ្លោ មានប្រធានក្រុមនារីអាមេរិក Trinity Rodman ដែលបាននាំបាល់ផ្លូវការចូលទីលាន មុនការប្រកួតចាប់ផ្តើម។

ជាមួយគ្នានោះ តារាចម្រៀងល្បី Ciara ក៏បានចូលរួមក្នុងពិធីបោះកាក់មុនការប្រកួតផងដែរ ដោយមានស្វាមីរបស់នាង គឺអតីតតារាបាល់អាមេរិក Russell Wilson អមដំណើរផងដែរ។

អតីតកីឡាករ Marshawn Lynch ក៏មានវត្តមាននៅក្បែរទីលាន និងបានថ្លែងសុន្ទរកថាលើកទឹកចិត្តអ្នកគាំទ្រយ៉ាងរំភើប មុនការប្រកួតចាប់ផ្តើម។

ក្រៅពីនេះ ក៏មានតារាល្បីៗផ្សេងទៀតដូចជា Paris Hilton, វីរនារីបាល់ទាត់អាមេរិក Alex Morgan និងតារាបាល់បោះ NBA Zach LaVine និង Paolo Banchero ដែលបានអង្គុយទស្សនាការប្រកួតពីកន្លែងអង្គុយអ្នកគាំទ្រ។

ទន្ទឹមនឹងនេះ រដ្ឋមន្ត្រីក្រសួងសុខាភិបាលអាមេរិក Robert F. Kennedy Jr. ក៏បានចូលរួមទស្សនាការប្រកួតពីបន្ទប់ VIP ផងដែរ។ លោកគឺជាសមាជិករដ្ឋាភិបាលចុងក្រោយបំផុតដែលបានបង្ហាញការគាំទ្រក្រុមជម្រើសជាតិអាមេរិក បន្ទាប់ពី Marco Rubio បានចូលរួមទស្សនាការប្រកួតបើកឆាកទល់នឹងប៉ារ៉ាហ្គាយកាលពីថ្ងៃទី 12 មិថុនា។

ទោះបីគ្មាន Pulisic ក៏ដោយ ក្រុមរបស់លោក Mauricio Pochettino បានបង្ហាញទម្រង់លេងដ៏រឹងមាំ និងយកឈ្នះអូស្ត្រាលី 2-0 ដើម្បីបន្តដំណើរយ៉ាងជោគជ័យនៅ World Cup 2026។

គួរបញ្ជាក់ថា ការសម្រេចចិត្តដាក់ Pulisic ឱ្យសម្រាក គឺជាការសម្រេចចិត្តនៅនាទីចុងក្រោយរបស់លោក Pochettino ដើម្បីការពាររបួសកំភួនជើងរបស់កីឡាករឆ្នើមរូបនេះ និងត្រៀមខ្លួនសម្រាប់ការប្រកួតបន្ទាប់៕